Read Baibul, Mizo Jeremia 40 Bible Online

Jeremia 40 - Baibul, Mizo bible

Jeremia 40

¹Judai leh Jerusalem sal zawng zawng, Babulon sala an hruaite zinga Jeremia khaidiat vuan chunga a hruai laia vengtu hotu Nebuzaradanan, Ramah atanga a chhuahtir hnua LALPA hnen ata Jeremia hnena thu lo thleng chu:

²tin, vengtu hotu chuan Jeremia chu a hruai a, a hnenah, "LALPA i Pathian chuan he hmuna thil tha lo thleng tur hi a lo puang tawh a.

³Tin, LALPA chuan a rawn thlentir ta ngei a, a sawi ang zelin a ti ta a; LALPA chungah thil in tisual a, a tawngka in awih loh avangin he thil hi in chungah a lo thleng a nih hi.

⁴Tunah chuan, ngai rawh, vawiin ni hian i kuta khaidiat bun chu ka phelsak a che. Babulona ka hnena lo kal i duh leh lo kal la, i duh loh leh lo kal lo mai rawh; en teh, ram zawng zawng i hmaa a awm hi, kal rem i tih leh tha i tihna apiangah kal ang che," a ti a.

⁵A la kir hmain ani chuan, "Juda khawpuite chunga awptua Babulon lalin a siam Saphana fapa, Ahikama fapa Gedalia hnenah kir la, mite zingah a hnenah awm rawh, anih loh leh kal rem i tihna apiangah kal mai rawh," a ti a.

⁶Tichuan vengtu hotu chuan ei tur leh thilpek a pe a, a kaltir ta a. Tin, Jeremia chu Ahikama fapa Gedalia hnenah Mizpah khuaah a kal a, a hnenah a rama mi la awm chhunte zingah chuan a awm ve ta a.

⁷Tin, sipai pawl hotu zawng zawng ram laka awmte chuan, anmahni leh an hoten Babulon lalin, Ahikama fapa Gedalia chu chumi rama mi rethei berte, Babulon sala hruai loh zawng zawng chu a kawltir tih an lo hriat chuan,

⁸Mizpah khuaah, Gedalia hnenah an lo kal a, - Nethania fapa Ismaela te, Karena fa, Johanana leh Jonathana te, Tanhumetha fapa Seraia te, Netophath khuaa mi Ephaia fate leh Maakath khuaa mi fapa Jezania te leh an hote chu.

⁹Tin, Saphana apa, Ahikama fapa Gedalia chuan anmahni leh an hote hnenah, "Kaldaite rawng bawl chu hlau su hu: ramah hian awm hle hle u la, Babulon lal rawng bawl u la, in tan a tha mai ang.

¹⁰Kei zawng Mizpah khuaah hian ka awm ang a, Kaldai mi ka hnena lo kal turte hmaah chuan nangmahni aiawhin ka ding ang: nangni erawh chuan uain te, nipui thei te, hriak te la khawm u la, in belahte dah u la, khawpui in lak takahte chuan cheng rawh u" tiin chhia a chham a.

¹¹Chutiang bawkin Juda mi zawng zawng, Moab rama cheng te, Amon mite zinga chengte leh Edom rama hengte leh ram danga awmte chuan Babulon lalin Juda mi thenkhat a hnutchhiah a, an chungah Saphana fapa, Ahikama fapa, Gedalia a dah an hriatin,

¹²Juda mi zawng zawng an hnawhdarhna ram zawng zawng atangin an lo kir a, Judai rama Mizpah khuaah Gedalia hnenah an lo thleng a, uain leh nipui thei an la khawm ta teuh mai a.

¹³Chu lo pawh chu Karea fapa Johanana leh sipai pawlte hotu, ram laka awm zawng zawng chu Mizpah khuaah Gedalia hnenah an lo kal a,

¹⁴a hnenah, "Amon mite lal Baalisa chuan i nunna la turin Nethania fapa, Ismaela a tir tih i hria em"? An ti a. Ahikama fapa Gedalia erawh chuan a awih lo a.

¹⁵Tin, Karea fapa Johanana chuan Mizpah khuaah Gedalia hnenah, "Mi kaltir teh khai, Nethania fapa Ismaela chu ka va that mai ang e, tuma'n an hre lo ang: Juda mi i hnena awm khawm zawng zawng an darh vek a, Juda mi zawm chhunte boralna ti turin engah nge i nunna a lak ang"? tiin a ruktein a sawi a.Ahikama fapa Gedalia erawh chuan Karea fapa Johanana hnenah chuan, "He thil hi i ti tur a ni lo; Ismaela i sawi dan hi a dik lo e," a ti a.

¹⁶Ahikama fapa Gedalia erawh chuan Karea fapa Johanana hnenah chuan, "He thil hi i ti tur a ni lo; Ismaela i sawi dan hi a dik lo e," a ti a.