Read Baibul, Mizo Jeremia 6 Bible Online

Jeremia 6 - Baibul, Mizo bible

Jeremia 6

¹Benjamin fate u, Jerusalem chung ata In himna turin tlan bo u la; Tekoa-ah tawtawrawt ham u la Beth-hakkeremah hriattirna chhuah rawh u. hmar lam aa chhiatna a lo thawk e, Tihchhiatna nasa tak mai chu.

²Zion fanu hmel tha tak leh no tak chu Ka tibo ang.

³Berampute, an beram rualte nen a hnen an lo thleng ang a, A velah an puan inte an kaih ang a, Mahni hmun theuhvah an tla ang.

⁴Amah do turin inpuahchah rawh u, Tho u la, chhun laiah i bei ang u, Kan tan a va pawi em! Ni lo her ta a, Tlai lam hlim a lo sang ta.

⁵Tho u la, zanah i bei mai teh ang u khai! A in tha thate i tichhia ang u.

⁶Sipaihote LALPA chuan heti hian a ti: A thingte kit u la, Jerusalem beihna'n mual pawng siam rawh u, Khawpui hrem tur chu hei hi a ni, A chhungah chuan hnehchhiahna hlir a ni.

⁷Tuichhunchhuahin tui a tichhuak ang maiin A suahsualna chu a tichhuak thin, A chhungah chuan pawngnekna leh inrawkna a awm tih hriat a ni a, Ka hmaah chuan natna leh inhliamnate a awm reng.

⁸Ka rilruin a hransan daih hma che hian Aw, Jerusalem, fimkhur hle rawh, Chutilochuan luahtu nei lo rama siam chein, Ka titiau dah ang che.

⁹Sipaihote LALPA chuan heti hian a ti: Israel awm chhunte chu grep angin lo fai vek u la, Grep lotu angin a zarte chu vai nawn rawh u.

¹⁰An ngaihthlak theihna'n tu nge ka biak ang a, Tunge ka hriattir ang? Ngai teh, beng lam serhtan loh an ni a, an ngaithla thei lo; Ngai teh, LALPA thu chu an tan thil hmuhsitawm a ni a, Lawmna reng an nei ta lo.

¹¹Chuvang chuan LALPA thinurnain ka khat a, Insum hi ka ning ta; Khawlaia naupang chungah hrithla la, tlangval awmkhawmte chungah pawh, A nupui rualin pasal pawh lak a ni ang a, Upate leh tar chhiate pawh.

¹²An inte chu mi dang hnenah pek a ni ang a, An thlawhhmate leh an nupuite nen; chumi rama chengte chungah chuan ka kut ka lek dawn si a, Tih hi LALPA thu chhuak a ni.

¹³A te ber atangin a lian ber thleng pawhin Mi tin, duhamnain an khat si a; zawlneite leh puithiamte meuh pawh, Mi tin, hlemhle takin an che a ni.

¹⁴Ka mite hliamte chu, ngaihsam takin, "A tha alawm, a tha alawm," tiin an thawi a, A tha hauh si lo a.

¹⁵Thil tenawm an tih pawhin an zak em ni? Hnai lo e, an zak tawp lo a, an hmai pawh a sen hek lo: Chuvangin tlute zingah chuan an tlu ve ang: Anni ka hrem hunah chuan paihthlakin an awm ang. LALPA'n a ti.

¹⁶LALPA chuan heti hian a ti: Kalkawngahte ding u la, en rawh u, Kawng tha awmna kawng hlunte chu zawt rawh u, Tah chuan kal u la, I thlarau tan chawlohna in hmu ang; Anni erawh chuan, "tah chuan kan kal lo ang," an ti a.

¹⁷Tin, in tan ralvengtute ka ruat a, "Tawtawrawt ri chu ngaithla rawh u," tiin: Anni erawh chuan, "Kan ngaithla lo ang," an ti a.

¹⁸Chuvangin, aw, hnamte u, ngaithla u la, Aw, pungkhawmhote u, an chunga lo thleng tur chu hre rawh u.

¹⁹Aw, leilung, ngaithla rawh, Ngai teh, he mite chungah hian chhiatna ka rawn thlen dawn: An ngaihtuahna rahte ngei chu; Ka thute an ngaihthlak loh avangin; Ka dante lah chu an paih thla der a.

²⁰Eng atan nge Seba ata beraw te, Ram hla tak ata fute ka hnen a lo thlen thin le? In halral inthawinate lawm tlak a ni lo a, In inthawinate chuan mi tilawm hek lo.

²¹Chuvangin LALPA'n heti hian a ti, Heng mite hnenah hian tluknate ka dah ang a, Tah chuan pate chu an fapate nen an tlu za ang a, Thenawm leh a thian pawh an boral ang.

²²Tin, LALPA chuan heti hian a ti: Ngai rawh u, hmar lam ram ata mite an lo kal e, Lei hmun tap ata hnam ropui tak mai an lo thawk chhuak e.

²³Thal ngul leh fei an keng a, Nunrawng tak, zahngaihna reng reng nei lo an ni, An thawm chu tuipui ri hum hum ang a ni a; Sakawr chungahte an chuang a, Mi tin, raltu mi anga inthuamin, Aw, Zion fanu, an rawn bei dawn a che.

²⁴An thangva kan hria a, kan kutte a zawi zo ta, Na chuan min man ta, Hmeichhe nau vei na ang mai chu.

²⁵Ramah kal chhuak suh u la, Kalkawngah pawh kal hek suh u, Tah chuan hmelma khandaih a awm si a, Kil tinah ral a ti e.

²⁶Aw, ka mi, ka fanu, saiip puan feng la, Vut zingah tal rawh; Fapa mal sun angin sun la, tap vak vak teh, Tichhetu kan chungah a lo thleng thut dawn si.

²⁷Ka mite zingah chhintu-ah leh fiantu-ah ka siam chia, An awm dan i hriat a, i fiah theihna'n.

²⁸An zain helhmang, luhlul tak, Sawichhiat hmanga vak vel, Dar leh thir ang an ni a, Chhe takin an che a.

²⁹Pumin a chhem huau huau a, Meiah chuan suan chu a tuiral a, Tihthianghlim tumna chu a thlawn mai a ni, Mi sualte paih bo an ni si lo.Mite chuan tangkaraw ek chhia an vuah ang, LALPA'n anmahni a hnawl avangin.

³⁰Mite chuan tangkaraw ek chhia an vuah ang, LALPA'n anmahni a hnawl avangin.