Read Baibul, Mizo Ezekiela 13 Bible Online

Ezekiela 13 - Baibul, Mizo bible

Ezekiela 13

¹Tin, LALPA thu chu ka hnenah a lo thleng leh a,

²Mihring fapa, Israel zawlnei, mahni thinlung mai ata sawi hmangte chungah chuan thu sawi la, LALPA thu chu ngai rawh u,

³LALPA PATHIAN chuan heti hian a ti a ni: Zawlnei a, mahni ngaihdan zuia, engmah hmu si lote chu an chung a pik e!

⁴Aw Israel, i zawlneite chu khawram sihal ang chauh an ni ta.

⁵LALPA nia indonaa ding zo turin a ralti lai in tawn ngam lo a, Israel chhungte humhalhnaah in tangkai hek lo.

⁶LALPA thuchhuak a ni ti tu chuan engmah lo mai leh sawi lawkna lem mai an chang a, LALPA tirh an ni lo reng reng a ni; an thu chu ni ngei tur angin mite an rintir a.

⁷Inlarna lo-thlawn mai in hmuhin thusawi lawk diklo in sawi a ni lo'm ni? LALPA thu chhuak a ni, in la ti leh nghal si a,kei chuan ka sawi tawp si lo a.

⁸Chuvangin LALPA PATHIAN chuan heti hian a ti a ni: engmah lo mai in sawi a dawtmai in hmuh avangin, ngai rawh u, ka dodal che u a ni tih hi LALPA thuchhuak a ni.

⁹Tin, ka kut hian engmah lo hmutute leh dawt sawi lawktute a dodal ang a, ka mite inrawn khawmnaah an tel lo ang a, Israel chhungte hming ziakin an awm hek lo vang; tichuan LALPA PATHIAN chu ka ni tih in hria ang.

¹⁰Muanna awm si lo a,'A muanawm e' tia ka mite an hruai bo avang leh mi bang siama hawlrivap an hnawih mai avangin,

¹¹hawlrivap hnawihtute hnenah chuan'A tla leh mai ang, ruahpui a lo sur ang a, nangni rial lianpui te u, in lo tla ang a, thli nasa takin a tichhia ang,' ti rawh.

¹²Tin, ngai rawh u, bang chu a chim hnu chuan,'In hawlrivap hnawih chu khawiah nge?' an ti dawn lo che u em ni?

¹³Chuvangin LALPA PATHIAN chuan heti hian a ti a ni: ka thinurin thlipui nasa takin ka tichhe vek ang, ka thinurin ruahpui a lo sur ang a, ka thinurin rial nasa tak tiral turin a lo tla ang.

¹⁴Tichuan hawlrivap in hnawih var bang kha ka tichim ang a, lei thlengin a sawp ang a, chutichuan a lungphumte pawh a lang hial ang: tin, a chim ang a, bang chimah chuan ithboralin in awm ang; tichuan LALPA ka ni tih in hria ang.

¹⁵Hetiang hian bang chungah leh hawlrivap hnawihtute chungah ka thinur ka hrithla ang; tin,'Bang chu a awm tawh lo a, a bel tute pawh an awm tawh hek lo,' ka la ti ang che u.

¹⁶Chu chu Israel zawl nei Jerusalem chung thu sawia, muanna awm si loa muanna hmuhsaktute ngei kha, an awm ta lo, tih hi LALPA PATHIAN thu chhuak a ni.

¹⁷Tin, nang mihring fapa, i mite fanute, an thinlung maia sawitute chu hmachhawn la, anmahni kalhin thu sawi rawh,

¹⁸LALPA PATHIAN chuan heti hian a ti a ni: hmeichhia, mite bana thil buntir leh mi nunnate man behna'na milian mite lu khuhna thuitute chu an chung a pik e! Mahni nunna turin ka mite nunna in man ang maw?

¹⁹Barli tlemte leh chhang tlem hmu tura thi lo tur ti thi tur leh nung lo tur tinung tur in in dawt sawi ka miten an awih avangin ka mite zingah ka hming in tibawrhbang a ni.

²⁰Chuvangin LALPA PATHIAN chuan heti hhian a ti a ni: Ngai rawh u, mi nunna, sava anga man tura in thil buntirte chu ka hua a ni; in bante chu ka pawt chhum vek ang a, in mi man turate nunna chu ka chhuah vek ang; sava anga in man turate nuna ngei chu.

²¹In lu khuhnate pawh chu ka pawtthler ang a, ka mite chu in kut ata ka chhuah ang a, in man theih turin in kutah an awm tawh lo ang; tichuan LALPA chu ka ni tih in hria ang.

²²Keia tih lungngaih ni lo a, mifelte thinlung dawtin in tihnat avang leh mi suaksual chu nungdama a awmna tura a sualna kawng ata lamlet lohna turin mi suaksual kutte chu i ti chak a,Chuvangin engmah lo mai, thu sawi lawk dik lo emaw chu in hmu tawh reng reng lo vang; tin, ka mite chu in kut ata ka chhan chhuak ang a, LALPA chu ka ni tih in hria ang, a ti,' tiin sawi rawh," a ti a.

²³Chuvangin engmah lo mai, thu sawi lawk dik lo emaw chu in hmu tawh reng reng lo vang; tin, ka mite chu in kut ata ka chhan chhuak ang a, LALPA chu ka ni tih in hria ang, a ti,' tiin sawi rawh," a ti a.