Read Baibul, Mizo Ezekiela 16 Bible Online

Ezekiela 16 - Baibul, Mizo bible

Ezekiela 16

¹LALPA thu chu ka hnenah a lo thleng leh a,

²Mihring fapa, Jerusalem chu a tenawmnate hriatchhuahtir la, a hnenah,

³LALPA PATHIAN chuan Jerusalem hnenah chun heti hian a ti a ni: I chhuahna ram leh i pianna ram chu Kanan mite ram a ni a, i pa chu Amor mi a ni a, i nu chu Hit mi a ni.

⁴Tin, i pianna thuah chuan i pian ni in i lai hruiah a ni lo a, tifai tur chein tuia bual i ni hek lo.

⁵Lainat tur che a i chunga he'ng hi ti turin tu mit mahin a khawngaih lo che a: tamlakah paih chhuah i ni ta zawk a, i pian ni ata kha lungten i ni si a.

⁶Tin, i kianga ka lo kalin thisena talin ka hmu chia, a ni ka ti che a ni; thisenah awm mah la nung rawh.

⁷Ram thil kuhmum angin ka ti thang lian chia, tin, i thang lian a, khua i mawi ta a; i hnute a lo um a, i sam a lo tha a; ruak leh saruak mai i la ni tho a,

⁸Tin, i kianga ka lo kala ka en chein, ngaih la tham i lo ni ta a, ka puan ka zawn chia, ka saruak chu ka khuh tawh a che: a ni, i hnenah chhia ka chham a, thuthlungah ka luh pui ta chia, ka ta i ni ta e, tih hi LALPA PATHIAN thu chhuak a ni.

⁹Tichuan tuiin ka bual tawh chia, a ni, i thisen chu ka silfai sak var chia, hriak ka hnawih ta che a ni.

¹⁰Puan cheiin ka thuam chia, savun tha mi pheikhawk ka buntir chia, puan zai sinin ka tuam chia, maimaw puan ka khumtir che a ni.

¹¹Cheimawinain ka chei chia, i kutah banbun te, i nghawngah rangkachak khaidiat te,

¹²i hnarah hnar vuah te, i bengah bengbehte, i lu-ah lallukhum mawi tak tein ka chei chia.

¹³Tichuan rangkachak leh tangkarua cheimawi i ni ta a, i silhfen chu puan zai sin tak leh maimaw puan leh puan thui mawi a ni a; i ei chu chhangphut dip leh khawizu leh hriak a ni, i mawi em mai, lalnu pawh i tling ta.

¹⁴I mawina hnamte zingah a thang chhuak a, ka ropuinaa thuamin i famkim ta, tih hi LALPA PATHIAN thu chhuak a ni.

¹⁵Mahse mawina chu i ring lutuk a, i hmingthanna chu i hur phah a, mi veivak na zawng hnenah i hurna chu i tlangphal a, a tuapawh.

¹⁶I silhfente hlipin bawlhmunte i cheimawi a, tah chuan i phalrai a, hetiang hian a awm leh tawh ngai lo ang.

¹⁷Ka rangkachak leh tangkaraw bungbel mawi tak tak ka pek che kha i la a, mipa lem siamna'n i hmang a, i hurpui ta.

¹⁸I silhfen thuimawite chu i la a, anmahni i tuam a, ka hriak te leh ka rimtuite chu an hmaah i hung a.

¹⁹Ka chhang pek che pawh kha chhangphut tha leh hriak leh khawizu ka chawmna Thin te che kha rimtui atan an hmaah i hlui a; heti hi a lo ni ta a, tih hi LALPA PATHIAN thu chhuak a ni.

²⁰Chu loah pawh i fanu, i fapa, mi hrinsakte chu an hnenah in thawina'na hmanral atan i pe a: i hurna hi thil namen a ni em ni?

²¹Ka fate i that a, meipuia paih lutin an hnena i hlan te hi?

²²I tenawmna leh i hurna zawng zawngah chuan i naupan laia saruaka i awm leh i thisen i tal mai mai lai te kha i hre ta lo a.

²³Tin, he'ng i suahsualna zawng zawng hnuah pawh, heti hi a lo ni a, (i chung a pik e! a pik e! LALPA PATHIAN chuan a ti a ni)

²⁴hmun langsarte i in siam a, kawtthler tinah hmun sangte chu i tan i sa a.

²⁵Kawtthler lu apiangah hmun langsarte chu i sa a, i mawina chu i tenawmnaah i siam a, veivak apiang hnenah i hlim lang a, i hurna chu a zual thin a ni.

²⁶Aigupta mi, i thenawm, mi rawva tak mai nen chuan in ngaihna sual i ti ta bawk a; mi tithinur turin i hurna chu a ti zual ta a ni.

²⁷Chuvangin ngai rawh, i chungah ka kut ka lek a, i chaw pangngai chu ka tikiam a, nangmah hawtu Philistia fanu, i hur dan zahpui em em thin tu hnenah chuan duh duha a tihah ka pe tawh che a.

²⁸Assuria mite hnenah pawh i hur bo a, tawk tih lem nei hek lo che; a ni, an hnenah i in phalrai a, i la kham chuang hek lo.

²⁹Kanan ramah, Kaldai mite hnena i hurna i latizual ta cheu a, i la kham chuang lo fo.

³⁰I thinlung chu a khawlo ta mang e-i chetziaah hmeichhe luhlul sual tak mai thil i ti a, tih hi LALPA PATHIAN thu chhuak a ni.

³¹Kawtthler lu apianga channa buk i siamah te, kawtthler tina hmun langsar i siamah te hian hlawh i um loh avangin nawhchizuar mai pawh i ni lo e.

³²Nupui uire, pasal te aia mi hrante duh zawktu nu!

³³Nawhchizuar hnenah chuan thil an pe thin a, nang erawh chuan i pe zawk thin-a duhtu che ter hnenah, ram tin, ata an lo kal a, an mutpui theihna'n che i tlawn zawk thin a ni.

³⁴Tin, i hur thua tuma'n an pan lo che hi mi nangmahin a man i pe zawk a, tumahin man an pek loh che hi mi hur dang laka i lamdanna chu a ni; nangmahin a man i pe zawk a, tumahin man an pek loh che hi i danglamna chu a ni.

³⁵Chuvangin aw mi hur nu, LALPA thu chu ngai rawh:

³⁶LALPA PATHIAN chuan heti hian a ti a ni: I tenawmna leih chhuah a niha, i ngaihte nen in inpawlna lama i saruakna thilhlan anih avang leh an hnena i pek i fate thisen avangin,

³⁷Ngai rawh, nangmah ngaitu i nuamtawlpuite zawng zawng leh i lo ngaih tak zawng zawngte leh i huatzawng zawngte chu ka ko khawm ang a, ni, i velah ka hruai khawm ang a, i saruakna zawng zawng an hmuh theihna'n an hnenah i saruakna chu ka ti lang ang.

³⁸Tin, hmeichhia pasal thena, mahni fa thisen chhuah chungthu an rel angin i chung thu chu ka rel ang che; thinurna leh thikna chu i chungah ka rawn thlen ang.

³⁹An kutah ka pe ang chia, i hmun langsarte chu an titlu ang a, i hmun sangte chu an tisawp ang; i silhfente an hlip ang a, i lunghlute an chhuhsak ang chia, saruak leh ruakin an hluihlawn ang che.

⁴⁰I chungah tlang an pun ang a, lungin an deng ang chia, khandaihin an chiu tlang ang che.

⁴¹I in te chu meiin an hal ang a, hmeichhe tam tak mithmuhah i chungah rorelna an hlen ang; i hur hi ka tireh ang a, hlawh pawh i phal tawh lo ang.

⁴²Tichuan ka thinurna i chungah ka hrithla zo ang a, ka thikna che chu a reh tawh ang a, ka ngawi hle hle ang a, ka thinur tawh ngai lo ang.

⁴³I tleirawl lai nite chu i hriat reng loh a, he'ng thilah te hian mi tihvui tak zawk avangin ngai rawh, i chetzia ang ang, i chungah ka thlen ang, tih hi LALPA PATHIAN thu chhuak a ni: tin, i tenawmna zawng zawng belhchhahin he hurna hi i ti tawh lo ang.

⁴⁴Ngai rawh, thufing tawi hmang apiangin he thufing tawi hi an hmang ang,' A fanuin a nu a chhun' tih hi.

⁴⁵I nu, mahni pasal leh fate lungtentu fanu kha i ni a, inlaizawnna lamah chuan, mahni pasal leh fate lungtentu laizawn i ni: i nu lah Hit mi a ni a, i pa lah Amor mi a ni.

⁴⁶Tin, i laizawn, i u chu samaria, i veilama cheng thin kha amah leh a fanute nen an ni; i laizawn, i nau lah chu, i dinglama cheng thin kha Sadom leh a fanute an ni.

⁴⁷Mahse anmahni awmdan chu i zawh lo a, an tenawmna ang i ti lo na a, i awmdan zawng zawnga i khawloh zawk zia ngaihtuahin chung chu engmah tham a ni lo.

⁴⁸A nuna ka nun chhung chu, tih hi LALPA PATHIAN thu chhuak a ni, nang leh i faten an tih ang hi i laizawn Sadom leh a fanute pawhin an ti hauh lo.

⁴⁹I laizawn Sadom khawlohna chu he'ng hi a ni: Chapona te, eipuar lutuk te, amah leh a fanute nuam tawlna mai mai te a ni a, mi retheite leh tlachhamte chu a pui chuang hek lo.

⁵⁰Tin, mi chapo tak an ni a, ka hmaa thil tenawm ti tawh an ni; tichuan tha la tih angin ka ti bo hlawm tawh a ni.

⁵¹Samaria lah chuan i sual chanve pawh a ti hek lo; anmahni aiin i tenawmnate i tih nasat zawk avangin i laizawnte chu i tilang ta zawk a ni.

⁵²I laizawn te dik zawk a i lantir avangin nang ngeiin i mualphona chu i phur tur a ni; anmahni aiin thil tenawm nasa zawkte i ti a, i sualna te avangin anni chu nang aiin an fel zawk a ni; a ni, i laizawn te fel zawka i lantirnaah hian nangchuan kimkiin mualphona i chang tur a ni.

⁵³Tin, an awm dan, Sadom leh a fanu awmdan te, samaria leh a fanu awmdan te, anmahni rualin nangma awmdan ngei pawh ka let ang;

⁵⁴an tan thlamuanna i lo nih thinnaa i thiltih tak zawng zawng avanga i zah theih nan.

⁵⁵Tin, i laizawn, Sadom leh a fanute, Samaria leh a fanute chu an awmdan hmasa angin an awm leh ang; nang leh i fanute pawh in awmdan hmasa angin in awm leh ang.

⁵⁶I suahsualna hmuh chhuah a nih hmaa i intihropui niahte khan i laizawn Sadom chu i kamchhe tleuhna a ni thin lo em ni?

⁵⁷Tunah zawng Suria fanu leh a vela mi zawng zawng, Philistia fanute i vela tinawmnahtu che khan an sawi an sawi chhiat tak vak che hi.

⁵⁸I hurna leh i tenawmna i pu zel a ni, tih hi LALPA thu chhuak a ni.

⁵⁹Tichuan LALPA PATHIAN chuan heti hian a ti: Thuthlung bawhchhiain thutiam i pawisak lohzia ang zelin i chungah ka ti ve dawn a ni.

⁶⁰Nimahsela i naupan laia i hnena ka thuthlung chu ka hre reng ang a, i hnenah kum khaw thuthlung ka siam ang.

⁶¹Tichuan i laizawnte, i u leh i naute i pawm hunah chuan i awmdan te i lo hre chhuak ang a, i in zahpui ang: anni chu i fanu atan ka pe chia, i thuthlung avang erawh chuan ni loin.

⁶²I hnena ka thuthlung ka tinghet ang a, LALPA ka ni tih in hre tawh ang.I thiltih zawng zawngte ka ngaihdam vek hunah che chuan i hriat renga i zah avanga kimkia i ka i an ngai tawh lohna'n," tih hi LALPA PATHIAN thu chhuak a ni.

⁶³I thiltih zawng zawngte ka ngaihdam vek hunah che chuan i hriat renga i zah avanga kimkia i ka i an ngai tawh lohna'n," tih hi LALPA PATHIAN thu chhuak a ni.