Read Baibul, Mizo Ezekiela 22 Bible Online

Ezekiela 22 - Baibul, Mizo bible

Ezekiela 22

¹Tin, LALPA thu chu ka hnenah a lo thleng a, ,

²Tin, nang mihring fapa, thisen chhuah hmang khawpui chu i khing dawn em? I khing dawn em? A tenawmna zawng zawng chu hriattir rawh khai!

³Tin, an hnenah chuan, 'LALPA PATHIAN chuan heti hian a ti a ni: khawpui a hun lo thlenna tura ama chhunga thisen chhuahtu leh mahni intibawlhhlawh tura milim siamtu chu!

⁴I thisen chhuahnaah khan thiamloh i phur a, i milim siamah khan i in tibawlhhlawh a ni; i hunte i tihnai a, i kumte a thleng tep a; chuvangin hnamte hnenah chuan sawichhiatah leh ram zawng zawng cheksawlh atan ka siam che a ni.

⁵I bula mi leh i hlata mite chuan an cheksawlh ang che, nang, hmingchhiat phur leh buainaa khat mi!

⁶Ngai rawh, Israel hotute mi tinin an thiltihtheihna ang zela tihsen chauh mai turin nangmahah an awm a ni.

⁷Nangmahah chuan miin nu leh pate an hmusit a, nangmahah chuan mikhualte an hnehchhiah a, nangmah chuan fahrahte leh hmeithaite an hnehsawh a.

⁸Ka til serhte i hmusit a, ka chawlhnite i bawhchhia a.

⁹Nangmahah chuan thisen chhuah tura mi hek hmangte an awm a, nangmahah chuan bawlhmuna eite an awm a, nangmahah chuan hurna an ching a.

¹⁰Nangmahah chuan an pate saruakna hlimsak an awm a, nangmahah chuan hmeichhe fello lai mutpui an awm a.

¹¹Tin, miin a thenawm nupui chungah thil tenawm a ti a, mi dangin hur takin a mo a tibawlhhlawh a, mi dangin nangmahah chuan a farnu, a pa fanu ngei a tlawm a.

¹²Nangmahah chuan thisen chhuah turin thamna an la a, a no leh a pung i la a; i thenawm chu hnehchiahin duham takin i hlepruksak thin a; kei ngei pawh hi mi theihnghilh a, tih hi LALPA PATHIAN thu chhuak a ni.

¹³Chuvangin, ngai rawh, i lo hleprukna thu-ah te, nangmaha thisen chhuak thu-ah te kut ka ben khum ang che.

¹⁴Nangmah ka beih niah che chuan i thinlungin a tuar zoin i kut a chak thei dawn em ni? Kei LALPA ngei hian ka sawi tawh a, ka ti bawk ang.

¹⁵Tin, hnam zingah chuan ka tidarh ang chia, ram tinah ka titaitam ang che; nangmah atangin i bawlhhlawhnate ka tiral vek ang.

¹⁶Hnamte mithmuhah chuan mahni intibawlhhlawh i ni ang, tin, LALPA chu ka ni tih i lo hria ang, a ti,' ti rawh," a ti a.

¹⁷Tin, LALPA thu chu ka hnenah a lo thleng a,

¹⁸Mihring fapa, Israel chhungte chu ka tan ek chhia mai an lo ni ta a; an zain rawhtuina mei laiah chuan dar te, rangva te, thir te, suan te an ni a, tangkaraw ek chhia mai an ni ta.

¹⁹Chuvangin LALPA PATHIAN chuan heti hian a ti a ni: Ek chhia mai in lo nih tak avangin, ngai rawh u, Jerusalem laiah ka khawm che u a ni.

²⁰Tangkarua te, dar te, thir te, suan te, rangva te rawhtuina meia an dah khawmna, titui tura a chunga mei an chhem angin ka thinurna leh ka thinrimnaah chuan ka khawm ang che u a, ka titui ang che u.

²¹A ni, ka khawm ang che u a, in chungah chuan ka thinurna mei ka chhem ang a, a laiah chuan in lo tui zo ang.

²²Rawhtuina mei laiah tangkarua a tui angin nangni pawh, chumi laiah chuan in tui zo ang a, kei LALPA hian in chungah ka thinurna ka leih a ni tih in hre tawh ang," a ti a.

²³Tin, LALPA thu chu ka hnenah a lo thleng a,

²⁴Mihring fapa, a hnenah chuan sawi la,'Ram tlenfai loh i ni e, thinurna nia ruahtui chang lo.

²⁵Sakeibakneiin rumin a sa seh a zawng ang maiin nangmahah chuan zawlnei phiarnate a awm a ni: mi nunna te an ei zo a, rote leh thil hlute an laksak a, a laiah chuan hmeithai tamtak an siam a.

²⁶A puithiamte pawhin nasa takin ka dan an bawhchhia a, ka thil serhte an tibawlhhlawh a ni, thil serhte leh thil narante reng reng an thlei lo a, mite lah, thil thianghlim leh thianghlim lo an thlei tir chuang hek lo; ka chawlhnite chu an haider a, an zingah chuan tihhmingchhiatin ka awm a.

²⁷A laia hotute chu chinghne koham eitur zawng ang mai an ni a, thisen chhuaha mi nunnate tiboralin hlemhle taka an hlep theihna'n .

²⁸Tin, a zawlneite chuan hawlrivapin bang an bel a, inlarna dawha mai mai an hmu a, dawtin ai an ensak a, LALPA'n engmah a sawi lo chung pawhin, LALPA PATHIAN chuan heti hian a ti, an ti thin a.

²⁹Rama mipuite chuan hnehchhiah an hmang a, rawk an ching a, a ni, mirethei leh tlachhamte chu an hnehsawh a, diklo takin mikhualte an hnehchhiah thin.

³⁰Ram chu ka tihchhiat lohna'n an zing ata dai theu tur leh ram chhana ka hmaa tang tur mi ka zawng a, ka hmu si lo a.Chuvangin an chungah ka thinrimna chu ka leihbaw ta a, ka thinurnain meiin ka halral ta hlawm a ni; an awmdan ngei chu an chungah ka rawn thlen a ni, tih hi LALPA PATHIAN thu chhuak a ni,' ti rawh," a ti a.

³¹Chuvangin an chungah ka thinrimna chu ka leihbaw ta a, ka thinurnain meiin ka halral ta hlawm a ni; an awmdan ngei chu an chungah ka rawn thlen a ni, tih hi LALPA PATHIAN thu chhuak a ni,' ti rawh," a ti a.