Read Baibul, Mizo Ezekiela 31 Bible Online

Ezekiela 31 - Baibul, Mizo bible

Ezekiela 31

¹Tin, heti hi a ni a, kum sawm leh kum khatna, thla thumna, chumi thla ni khat niah chuan LALPA thu chu ka hnenah a lo thleng a,

²Mihring fapa, Aigupta lal Pharaoa leh a khua leh a mite hnenah sawi la: Ropuinaah tu nge i an le?

³Ngai rawh, Lebanon zarmawi leh Buk, hlim chhah, sang mawi, A zik chhum kara leng i iang e.

⁴Siktui thiang chawm, lipui siama thang tual tual, A phunna luiten an luan vel a, Ram thing tin, chawmna'n a luantir e.

⁵Chutin ram thing zawng hnehin a sang zual e, A zar a thang a, a tang a sei, Tui tamtak chawm, hnianghnarin.

⁶Bu an khuar e, a zarah, chungleng sava ten, A zar hnuaiah sa tinrengin nau an nei;A hlim hnuaiah hnam ropui zawng an cheng e.

⁷Chutin a mawi, a ropuina, a zar sei zelin, A zung tan tui zawng a hnianghnar e.

⁸Pathian huana sidar thingten an chhing lo e, a zar, far thingin a iang zo lo, a tang pawh thingsiain a iang hek lo, A mawinaah Pathian thing a chhing zo ve.

⁹A tang titamin ka siam mawi a, Pathian huana Eden thing zawngten an itsik e," tiin.

¹⁰Chuvangin LALPA PATHIAN chuan heti hian a ti a ni; A lo san em ema, chhumte zinga a zik a lena, a thinlungin a sanzia chu a chapopui avangin,

¹¹hnamte zinga mi chak tak kutah ka mantir ang: a suahsual zia ang zelin a hrem ang a, ka hnawtchhuak ang.

¹²Tin, awze mi hnamte zinga tihbaiawm takte chuan an kit ang a, an hluihlawn ang: tlangahte, ruamahte a tangte a tla rem rum ang a, chu ram tui luankawr zawng zawngahte a zarte chu a tliak rem rum ang: khawvela mi zawng zawngte chu an hlim ata an chhuak ang a, amah chu an kalsan ang.

¹³A chhiatnaah chuan chungleng sava zawng zawngte an cheng ang a, a tang chungahte chuan ramsate an awm ang.

¹⁴Heng hi tuia chawm thing zawng zawng an intihsan loh a, an zik chhum kara leng lo a, tuia chawm thing reng rengin an sanzia an chhuan hek lohna tur a ni: lei hmun hnuaihnung bera khuarkhuruma chhuk ta, mihring fate zingah kal turin, thihnaa mantir an ni vek tawh si a.

¹⁵Lalpa PATHIAN chuan heti hian a ti a ni: Seola a chhuk ni-ah chuan tui thuk tak chu amah ka suntir a, a luite ka chawlhtir a tui tamtakte chu a luang lo a; Lebanon amah ka suntir bawk aram thing zawng zawngte amah avangin an chau zo ta.

¹⁶Hnamte pawh a tlu thawmah chuan ka tikhur a, khuarkhuruma chhuk tawhte hnena seola ka paihthlak ni chuan; Eden thing zawng zawngte, Lebanon thing tha thate, tuia chawm zawng zawngte chu lei hnuaihnung berah chuan thlamuanin an awm ta.

¹⁷Khandaiha thahte hnenah chuan Seolah an chhuk ta bawk a; ani hnamte zinga a hlim hnuaia cheng thin, a kut ke te ngei pawh chu.Eden thingte zingah ropuina leh lennaah tu nge nang ang awm? Mahse Eden thingte nen chuan lei hmun hnuaihnung berah paihthlak i ni ang; khandaiha thah, serhtan lohte zingah i mu tur a ni, Hei hi Pharaoa leh a khua leh tuite chu an ni, tih hi LALPA PATHIAN thu chhuak a ni.

¹⁸Eden thingte zingah ropuina leh lennaah tu nge nang ang awm? Mahse Eden thingte nen chuan lei hmun hnuaihnung berah paihthlak i ni ang; khandaiha thah, serhtan lohte zingah i mu tur a ni, Hei hi Pharaoa leh a khua leh tuite chu an ni, tih hi LALPA PATHIAN thu chhuak a ni.