Read Baibul, Mizo Ezekiela 36 Bible Online

Ezekiela 36 - Baibul, Mizo bible

Ezekiela 36

¹Tin, nang mihring fapa, Israel tlangte hnenah thu sawi la, Nangni Israel tlangte u, LALPA thu hi ngaithla rawh u,

²LALPA PATHIAN chuan heti hian a ti a ni: I chungah i hmelmate chuan,'Chei! Hmasang bawlhmun zawng zawngte chu kan ta a ni ta,' antih avangin,

³thu sawi la LALPA PATHIAN chuan heti hian a ti a ni: hnam la awm chhunte ta tura kil tina an ei chia, an tih tiau che avang leh mi kamtamte titi leh sawichhiata an awmtir che u avangin,

⁴nangni Israel tlangte u, LALPA PATHIAN thu hi ngaithla rawh u, LALPA PATHIAN chuan tlangte, mualte, tuikawrte, ruamte leh hmun lo ram tawh te, khawpui tiau tawh, a vela hnam la awm chhunte sahmim tipur mai leh nuihzaburte hnenah heti hian a ti a ni:

⁵Chuvangin lalpa PATHIAN chuan heti hian a ti a ni: hnam la awm chhun leh Edom zawng zawng, rilru lawm taka ka ram neih lo inruat chawpa, mi hmusit taka rallaka siam tumtute chungah chuan thinur em emin thu ka sawi ngei a ni.

⁶Chuvangin Israel ram chungchang thu-ah chuan thu sawi la, tlangte mualte, tuikawrte leh ruamte hnenah chuan LALPA PATHIAN chuan heti hian a ti a ni: Ngai rawh u, hnamdangte cheksawlhna in tuar avangin thinur tak leh thinrim takin tu ka sawi a ni.

⁷Chuvangin LALPA PATHIAN chuan heti hian a ti a ni: I veala hnamte chuan anmahni mualphona an phur ngei ang tiin ka kut ka lek e.

⁸Nangni erawh chuan, Aw Israel tlangte u, zar in chhuah ang a, ka mi Israelte tan rah in chhuah ang; an lo kal mai dawn si a.

⁹Ngai rawh u, in lama tang ka ni si a, in lam ka hawi ang a, rih durin in awm ang a, chi tuhin in awm bawk ang.

¹⁰In chungah mihring ka tipung ang a, Israel chhungte zawng zawng, an vai pawhin; hmun ramte chu siam thatin a awm ang a, khawpuite chu luahin a awm ang.

¹¹In chungah mi leh sa ka tipung ang a, an pungin an hmuingil ang: in awmdan hmasa ang khan luahin ka awmtir ang che u a, atira in awm dan ai maha thain ka siam ang che u: tichuan kei hi LALPA ka ni tih in hria ang.

¹²A ni, in chungah mi ka lentir ang a, ka mi Israelte ngei chu; an luah ang chia, i rochan an ni ang a, tun achinah an fate i chantir ngai tawh lo ang.

¹³Heti hian LALPA PATHIAN chuan a ti a ni: Nang mihringte ei raltu, i mite chan thintu i ni an tih thin che avangin

¹⁴mihringte i eiral tawh lo ang a, i mite pawh i chan ngai tawh hek lo ang, tih hi LALPA PATHIAN thu chhuak a ni;

¹⁵Awze mite hmusitna ka tuartir twah lo ang chia, mite sawichhiat i tuar ngai tawh hek lo ang a, i mite i chan ngai tawh hek lo ang, tih hi LALPA PATHIAN thu chhuak a ni, ti rawh," a ti a.

¹⁶Tin, LALPA thu chu ka hnenah a lo thleng leh a,

¹⁷Mihring fapa, Israel chhungte chu anmahni rama an chen lai khan an awmdan leh an thiltihtein an tibawlhhlawh a; ka hmaa an awmdan chu hmeichhe fel loh laia a thianghlim lohna ang mai a ni a.

¹⁸Chuvangin ram chungah thisen an chhuah a, an milimtea an tihbawlhlawh avangin an chungah ka thinrimna chu ka hrithla a.

¹⁹Hnamte zingah ka tidarh a, ram tinah an darhsarh ta a: an awmdan leh an thiltih ang zelin an chungah thu ka relsak a.

²⁰An va kalna hnamte hnen an thlenin ka hming thianghlim an tibawrhbang a, miten, "Hengte hi LALPA mite an ni a, ram ata an lo chhuak a nih hi,' an lo tih thinah hian.

²¹Mahse Israel chhungten an va kalna hnamte zinga an tihbawrhban, ka hming thianghlim chu ka lainat a ni.

²²Chuvangin Israel chhungte hnenah , LALPA PATHIAN chuan heti hian a ti a ni: Aw Israel chhungte u, nangmahni ka lainat avang ni loin, i va kalna hnamte zinga in tihbawrhban, ka hming thianghlim ka lainat avang zawkin hei hi ka ti a ni.

²³Ka hming ropui tak, hnamte zinga bawrhbang, an zinga nangmahni ngeia tihbawrhban chu ka tithianghli dawn a ni; tichuan an mithmuha nangmahnia tihthianghlima ka awm hunah chuan LALPA ka ni tih an hria ang, tih hi LALPA PATHIAN thu chhuak a ni.

²⁴Hnamte zing ata ka hruaichhuak ang che u a, ram zawng zawng ata ka khwm ang che u a, in ram ngeiah ka hruai lut dawn si che u a.

²⁵Tin, in chungah tuifim ka theh ang a, in lo thianghlim ang a, in bawlhhlawhna zawng zawng leh in milimte lak ata ka tlengfai ang che u.

²⁶Thinlung thar ka pe ang che u a, in chungah thlarau thar ka dah ang: in tisa ata thinlung, lung anga sak chu ka la bo ang a, thinlung, tisa anga nem ka pe zawk ang che u.

²⁷Tin, in chungah ka thlarau ka dah ang a, ka dan siamah ka lentir ang che u a, ka thupekte chu in vawng ang a, in zawm ang.

²⁸In pute hnena ram ka pekah chuan in cheng ang; tin, nangni chu ka mite in ni ang a, kei in pathian ka ni ang

²⁹In bawlhhlawhna zawng zawng ata ka chhanchhuak ang che u a, tin, buh thu ka pe ang a, ka tipung ang a, in chungah tam a tla tawh lo ang.

³⁰Thing rahte ka tipung ang a, thlawhhma ka tihlawk ang a, tam avanga hnamte zinga mualphona in tuar twah lo ang.

³¹Tichuan in dan sualte, in thiltih tha lote chu in lo hre tawh thin ang a, in tenawmna leh in khawlohna avang chuan nangmahni mithmuh ngeiah in ten tawh ang.

³²Nangmahni avanga hei hi ti ka ni lo tih lo hre mai rawh u, tih hi LALPA PATHIAN thu chhuak a ni. Aw, Israel chhungte u, in awmdan avang chuan zak u la, kimki rawh u.

³³LALPA PATHIAN chuan heti hian a ti a ni: in khawlohna zawng zawng ata ka tlenfai che u niah chuan, khawpuite chu ka luahtir leh ang a, hmun tiau tawhte chu ka siam leh ang.

³⁴Tin, ram lo tiau tawhte chu an let ang, tunhmain mi veivakte mithmuha tiau tawh hnu ni mah se la.

³⁵Tin, 'he ram tiau tawh hnu hi Eden huan ang mai a lo ni leh ta,' an la ti ang; tin, khawpui chhiaa, lo tiau tawhte chu luah leh kulhin a awm leh ta.

³⁶Tin, in vela hnam la awmte kei LALPA hian hmun chhiate chu ka siam leh ang a, ram lo tiau tawh chu ka tiduah leh ta tih an hria ang: kei LALPA hi ka tawng tawh a, ka ti ngei ang.

³⁷Tin, LALPA PATHIAN chuan heti hian a ti a ni: chu loah pawh hei hi Israel chhungte chu ka la diltir ang' ran rual ang maia an mite tipung turin.Inthawina tur ran rual, kut ni vangthlaa Jerusalem ran rualte ang maiin; chutiangin khawpui ram tawh hnu chu mipui tam takin a la khat ang; tichuan kei hi LALPA chu ka ni tih an hria ang," a ti a.

³⁸Inthawina tur ran rual, kut ni vangthlaa Jerusalem ran rualte ang maiin; chutiangin khawpui ram tawh hnu chu mipui tam takin a la khat ang; tichuan kei hi LALPA chu ka ni tih an hria ang," a ti a.