Read Baibul, Mizo Ezekiela 38 Bible Online

Ezekiela 38 - Baibul, Mizo bible

Ezekiela 38

¹Tin, LALPA thu chu ka hnenah a lo thleng a,

²Mihring fapa, Magog rama mi, Ros leh Mesek leh Tubal hotu ber Goga hmachhawn la, a chungah thu sawi la,

³LALPA PATHIAN chuan heti hian a ti a ni: Ngai rawh, aw Goga, Ros, Mesek leh Tubal hotu ber, ka do che a ni;

⁴ka lehhawitir ang chia, i khabeah nghakuaiin ka kuai ang chia, ka khai chhuak ang che; i sipai rual zawng zawngte, sakawr leh a chung chuang mite, ralthuam famkima inthuam zawng zawngte, pawl ropui tak, phaw lian leh phaw te hmang a khandaih keng theuh te nen chuan.

⁵Persia, Kus, Put te nen, an vaia phaw leh thir lukhum neite chu;

⁶Gomer leh a sipai rual zawng zawngte; Togarma chhungte, hmar tawpa mi leh a sipai rual zawng zawngte; i hnen a mi tam tak te nen pawh.

⁷Inralring la, a ni, lo in peih rawh, nang leh i hnena awm khawm, i pawlpui zawng zawngte nen; tin, an vengtu lo ni ang che.

⁸ni tam tak hnuah chuan koh khawm i ni ang a, kum hnuhnungah te chuan khandaih laka chhanchhuah, hnam tamtakte laka ata lak khawmte awmna ram, Israel tlang tiau reng thinte chu i rawn bei ang; hnamte zing ata hruai chhuaha, tuna an vaia thlamuang taka an awmna ram chu.

⁹Tin, i chho ang a, thlipui ang maiin a lo thleng ang a, chhumin ram a tuam mup 'mup ang mai hi i ni ang, nang leh i hnena sipai rual zawng zawng leh i hnena mi tam takte chu.

¹⁰Tin, heti hian LALPA PATHIAN chuan a ti a ni: Chumi niah chuan heti hi a ni ang a, i rilruah thil a lo lut ang a, thil tha lo i suang tuah ang;

¹¹tichuan," kulh neilo khuate ram chu ka run ang a, mi him taka awm hle hle, an zaa kulh loa cheng, kulh kawngkhar leh a kalhna thir nei lohote chu ka bei ang," i ti rilru ang.

¹²Rallak sum leh bungruate la tur leh hmuna tiau hnu luah leh tute leh hnamte zing ata hruai khawm tawh, ranrual le bungruate nghaha, lei lailuma chengte chungah i kut lek i tum ang.

¹³Seba leh Dedan leh Tarsis sumdawngtute leh an sakeibaknei vanglai zawng zawngte chuan i hnenah," Rallak la turin i lo kal em ni? Mi rawk turin i pawlte chu i rawn khawm a ni maw? Tangkarua te, rangkachak te, ran rual leh bungruate, nasa tak chhuhsaka la bo tur i ni maw?" an ti ang che, tiin.

¹⁴'Chuvangin, mihring fapa, thu sawi la, Goga hnenah chuan, LALPA PATHIAN chuan heti hian a ti a ni: Chumi ni, ka mi Israelte him taka an awm hun tur chu i hre lo maw?

¹⁵hmarlam ram tawp ret, i hmun atang chuan i lo kal ang, nang leh i hnena mi tam tak sakawr chung chuang theuh, pawl ropui tak, sipai rual nasa tak mai chu.

¹⁶Chhumin ram a tuam mup mup ang mai hian ka mi Israelte chungah i lo kal ang; heti hi a ni ang a, ni hnuhnungahte chuan ka ram do turin ka hruai ang chia, hnamte chuan mi hria ang, Aw, Goga, an mithmuha nangmaha tihthianghlima ka awm hunah chuan.

¹⁷Tin, LALPA PATHIAN chuan heti hian a ti a ni: Hmasanga ka rawngbawltu Israel zawlnei, chung laia kum tamtak chhunga thu lo sawi thintuten anmahni bei tura ka rawn hruai tur che thu an sawi thina kha i ni em?ti rawh,' a ti a.

¹⁸Tin, chumi niah chuan heti hi a ni ang a, Israel ram bei tura Goga a lo kal tunah chuan ka thinrimna chu ka hnar khu chhuak hluah hluah ang, tih hi LALPA PATHIAN thu chhuak a ni.

¹⁹Ka thin a rima, ka thin a ur lai takin,'Chumi niah chuan Israel ramah Lir nasa takin a nghing ngei ang;

²⁰Chutichuan tuipui sanghate, chungleng savate, ramsate, lei chunga vak rannung zawng zawng, lei chunga mihring zawng zawngte ka hmaah an khur ang a, tlangte tihhniamin an awm ang a, khamte a chim ang a, kulh bangtin leiah a tlu ang,' tiin ka sawi a nih hi.

²¹Ka tlang zawng zawngahte amah beina turin khandaih ka lam ang, mitin khandaih chuan a unaupa a do ang, tih hi LALPA PATHIAN thu chhuak a ni.

²²Tin, thisen chhuah leh hripuiin amah ka bei ang; amah leh a sipai rualte leh a hnena mi tamtakte chungah chuan ruahpui vanawn leh rial nasa tak leh mei leh katte ka surir ang.Tin, ka ropuizia leh ka thianghlimzia ka tilang ang a, tin, hnam tam takte mithmuhah ka intilang ang, tin, kei hi LALPA ka ni tih an hria ang.

²³Tin, ka ropuizia leh ka thianghlimzia ka tilang ang a, tin, hnam tam takte mithmuhah ka intilang ang, tin, kei hi LALPA ka ni tih an hria ang.