Read Baibul, Mizo Ezekiela 39 Bible Online

Ezekiela 39 - Baibul, Mizo bible

Ezekiela 39

¹Tin, nang mihring fapa, Goga chungah thu sawi la, LALPA PATHIAN chuan heti hian a ti a ni: 'Ngai rawh, Aw Goga, Ros, Mesek leh Tubal hotu ber, ka do che a ni:

²Ka lehhawitir ang chia, ka hruaizel ang chia, hmartawp ret ata ka hruaichhuak ang chia, Israel tlangahte chuan ka thlen ang che:

³i kut veilam ata i thalngul chu ka titliak ang a, i kut ding lam ata i thalte chu ka tithla ang.

⁴Israel tlangahte chuan i tlu ang a, nang leh i sipai rual zawng zawng leh i hnena mipui awmte nen : sava, sahel ei chi tinrengte hnen leh ramsa kawlhte hnenah ei zawh atan ka pe ang che.

⁵Tamlakah i tlu ang; keiin ka sawi tawh si a, tih hi LALPA PATHIAN thu chhuak a ni,' ti rawh.

⁶Magog leh tuikam rama him taka cheng thinte chungah chuan mei ka chhuah ang; tin, kei hi LALPA ka ni tih an hria ang.

⁷Tin, ka mi Israelte zingah chuan ka hming thianghlim tihbawrhban leh chu ka phal tawh hek lo ang: tichuan hnamte chuan kei hi, LALPA, Israel Mi thianghlima chu ka ni tih an hria ang.

⁸Ngai rawh u, a lo thleng e! Hlenin a awm ngei ang, tih hi LALPA PATHIAN thu chhuak a ni; hemi ni hi a ni, ka lo sawi tawh kha.

⁹Tin, Israel khawpuia chengte chu an chhuak ang, hriamhreite chu an tuah ang a, a kang ral ang; phaw lian leh phaw tete, thal leh a ngulte, fei leh tiang zumte chu kum sarih chhung an tuah ang.

¹⁰Tichuan ram thing an phur lo ang a, ngaw thingte an kit hek lo ang, hriamhreite 'chu thingtuah atan an hmang dawn si a, rallaktute chu an rallak ve ang a, a rawktute chu an rawk ve thung ang, tih hi LALPA PATHIAN thu chhuak a ni.

¹¹Tin, chumi niah chuan heti hi a lo ni ang a, Goga tan Israel ramah phumna hmun ka ruat ang a, tuipui chhak, Abarim ruam ngei chu; chu chuan khualzinte chu a dang ang, Goga leh a hote chu an phum dawn si a; tin, chu ruam chu Hamon-gog ruam an vuah ang.

¹²Tin, Israel chhungte chuan an ram thianfaiin thlasarih chhung an phum ang.

¹³A ni, an rama mi zawng zawngin an phum ang; chawimawia ka awm niah chuan ka hmingthanna a ni ang, tih hi LALPA PATHIAN thu chhuak a ni.

¹⁴Tin, an ram thenfaina'n , ruang pmum lohte zawng chhuaka phum turin hnaa nei tur mi an ruat hran ang, thlasarih tawp hnuah an zawng tana ang.

¹⁵Ram fang tute chuan an fanin, mihring ruhte an hmuh chuan chhinchhiahna an siam ang a, Hamon-gog ruama phumtuten an phum hma chu.

¹⁶Tin, Hamon-ah chu khawpui hming a ni ang. Chutiang chuan ram an thian fai ang.

¹⁷Tin, nang, mihring fapa, LALPA PATHIAN chuan heti hian a ti a ni: sava chitinrengte leh sa tinrengte hnenah tu sawi la,'Pung khawm u la, lo kal rawh u, sa in eia thisen in in theihna'n Israel tlanga in thawina ropui tak, in tana ka siam velah chuan rawn in khawm rawh u.

¹⁸Miropui sate in ei ang a, leia hotute thisen in in ang a, berampate, beramnote, kelte, Basan rama bawngpa chawm thau zawng zawngte thisente nen.

¹⁹In tana inthawina ruai ka theh thau chu puar teuhin in ei ang a, a thisen chu rui khawpin in in ang.

²⁰Tichuan sakawrte, tawlailir hnuk mite, mi ropuite leh ral tu mi zawngtein ka chawhluiah in tlai ang,' tih hi LALPA PATHIAN thu chhuak a ni.

²¹Tichuan hnamte zingah chuan ka ropuina ka dah ang a, hnam zawng zawngte chuan a thurel tihtluk tawhte leh an chunga ka kutthlakziate chu an hmu ang.

²²Chumi ni a chinah chuan Israel chhungten kei hi LALPA PATHIAN ka ni tih an hre tawh ang.

²³Tin, hnamte chuan Israel chhungte chu an khawlohna avangin an tang a ni tih an hria ang, ka laka an riawm loh em avangin anmahni lakah ka hmel ka thup a, tichuan an hmelmate kutah ka pe a, khandaihin an tlu ta vek a.

²⁴An thianghlim lohna ang zel leh an bawhchhiatna ang zelin an chungah ka ti ve a, an lakah ka hmel ka thup a ni.

²⁵Chuvangin LALPA PATHIAN chuan heti hian a ti a ni: Tunah chuan Jakob ho awmdan ka let ang a, Israel chhungjaw pumpui chungah zah ka ngai ang, ka hming thianghlim chu ka humhalh tlat ang.

²⁶Tunah tihlautu awm lo a, an rama him taka an chen hunah pawh an bawhchhiatna zawng zawng, ka chunga an bawhchhiatte leh an mualphona chu an phur ang.

²⁷Mite zing ata ka hruai chhuah leha, an hmelmate ram ata dak khawma, anmahnia hnam tamtakte mithmuha tihthianghlima ka awm hunah chuan,

²⁸hnamte zinga sala ka tantir leh, an ram ngeia ka hruaikhawm leh ziaah hian kei hi LALPA an pathin ka ni tih an hria ang; chutah chuan an zinga pakhat mah ka hnutchhiah lo ang;an lakah ka hmel ka thup hek lo ang: Israel chhungte chungah ka thlarau ka leih tawh si a, tih hi LALPA PATHIAN thu chhuak a ni," tiin.

²⁹an lakah ka hmel ka thup hek lo ang: Israel chhungte chungah ka thlarau ka leih tawh si a, tih hi LALPA PATHIAN thu chhuak a ni," tiin.