Read Baibul, Mizo Ezekiela 41 Bible Online

Ezekiela 41 - Baibul, Mizo bible

Ezekiela 41

¹Tin, biak inah chuan mihruai lut a, a bangpengte chua teh a, a sir tuakah tawng ruka chhah ve ve awm a, chu chu biak buk vanglam chen a ni.

²Tin, a luhna chu tawng sawma zau a ni a; a sir tuakah bangpengte chu tawng nga ve ve a ni a, tin, a chhung chu a dung tawng sawmli, a vang tawng sawmhnih a ni a.

³Tin, pindan chhungnungah chuan a lut a, a lihna bangpengte chu tawng hniha chhah ve ve a ni a, a luhna tawng ruka zau a ni a, a luhna bangpengte chu tawng sarih ve ve a ni a.

⁴Tin, pindan chhungnung chu a teh a, a chhungpui bakah a dung lam chu tawng sawmhnih a ni a, a vang lam pawh tawng sawmhnih a ni. Tin, ka hnenah," Hei hi hmun serh ber chu a ni," a ti a.

⁵Tin, a in pui bang chu a teh a, tawng ruka chhah a ni a; tin, a sir tinah chuan pindan tawng lia zau theuh a awm a.

⁶A vela sir pindante tana bang an siam chu rinchhanin, a in pui chu rinchhan loin, in pui bang ngheng loin chu lam chu a ngheng zawk a.

⁷Tin, a sir pindante chu a lo sang deuh deuhin a zau deh deh zel a ni. Tichuan pindan hnuai ber atanga a chung ber thlenga kal turin a laita chu kal tlang tur a ni.

⁸Tin, in pui velah chuan lungrem pawng awminka hmu a, sirpindan lungphum chu tehna tiang, tawng ruk zeta sei chena sang a ni

⁹Sir pindan pawn bang chu tawng ngaa chhah a ni a; sir pindan pawn bang bakah chuan tawng nga a la awl a.

¹⁰Inpui lungrem pawng leh hung chhung pindante inkar chu a velin tawng sawmhniha zau a ni a.

¹¹Sir pindan kawng kharte chu hmun awl lama hawn a ni a, pakhat chu hmaelam hawi a ni a, pakhat chu chhimlam hawi a ni: a vela hmun awl chu tawng ngaa zau a ni.

¹²Tin, thlang lama in pui kawmchar hmun awl piah a in chu tawng sawmsariha zau a ni; chu in bang chu a velin tawng ngaa chhah vek a ni a, a dung chu tawng awmkua a ni.

¹³Tin, in pui chu a tehin tawng zaa sei a ni; in pui kawmchar hmun awl leh chumi in bang chhah lam chhiar telin tawng za a ni bawk;

¹⁴a in pui kawt hmun awl chu tawng zaa zau a ni.

¹⁵Tin, in pui kawmchar hmun awl piah a in dung lam chu a teh a, a sir tawna bangpengte huamin tawng za a ni.

¹⁶Ti a chhungpui te, hmun serh ber te, pawnlam sumhnunte chu thingphelin an thuah a, a pathum chuan a velin hawn theih loh tukverh leh chhuarvel a nei a, a in pui chu luhna kawngka thlengin a chhuat atanga tukverh thlenga a puma thingphela thuah a ni a, (tukverh pawh chu thuah a ni bawk).

¹⁷Kawngka lu chungte, pindan serh ber te leh pawnlam nen, bang zawng zawng chu a chhung lam leh a pawnlam teh vekin.

¹⁸Chung chu cherub lemte leh tum thing lemte a chei a ni a, cherub leh cherub inkarah tum thing a awm zel a; tin, cherub chu hmai pahnih nei theuh a ni.

¹⁹Mihring hmel ang chuan lehlama tum thing lam chu a hawi bawk a, he'ng hi in ve mai chuan an ziak a ni.

²⁰A chhuat atngin kawngka chung thlengin cherub leh tum thinga chei vek a ni; in pui bang chu chuti vek chu a ni.

²¹Chhungpui kawngka biangte chu inbial a ni, hmun thiang hlim ber hmaah chuan thinga siam maicham ang reng a awm a,

²²tawng thuma sang, tawng hniha sei, tawng hniha zau, a kilte a mawngte leh a pangte chu thinga siam vek a ni, tin, a ni chuan ka hnenah,'Hei hi LALPA hmaa dawhkan chu a nih hi,' a ti a.

²³A chhungpui leh Hmun thianghlim ber chuan kawngkhar pahnih ve ve a nei a.

²⁴Kawngkhar chuan phel hnih a nei ve ve a, a phel khat chu thlep thei theuh a ni; kawngkhar pakhatah phel hnih, a dangah phel hnih bawk.

²⁵Banga an ziak ang bawk khan chhungpui kawngkharahte chuan cherub leh tum thing lem an ziah theuh bawk a; sumhmun pawnah chuan thingphel chhah tak tak an zar a.Tin, sumhmun bang tuakahte leh thingphel zarahte chuan tukverh hawn theih loh leh tum thing lem chu a awm bawk a, a in pui sir pindan leh thing phel zar chu chutiang bawk chu a ni.

²⁶Tin, sumhmun bang tuakahte leh thingphel zarahte chuan tukverh hawn theih loh leh tum thing lem chu a awm bawk a, a in pui sir pindan leh thing phel zar chu chutiang bawk chu a ni.