Read Baibul, Mizo Ezekiela 5 Bible Online

Ezekiela 5 - Baibul, Mizo bible

Ezekiela 5

¹Tin, nang mihring fapa, khandaih hriam tak la la i lu leh i khabe hmul mehna'n lu mettu bakmeh chemah hmang rawh; tin, bukna la la, sam chu then ang che.

²Hmun thuma thena hmun khat chu huala a awm chhung nite a kim hunah chuan khawpui laia meiah i rawh tur a ni a, hmun thuma thena hmun khat leh chu i la ang a, a velah khandaihin i satsawm tur a ni; tin, hmun thuma thena hmun khat leh chu thli len turin i theh darh tur a ni a keiin khandaihin ka um zui ang.

³Tin, tlemte chu i la ang a, i kawrfual hmawrah i bawk tur a ni.

⁴Tin, he'ng a mi hi i la ang a, meiah chuan i theh lut tur a ni a, a kang ang; chumi atang chuan Israel chhungte zawng zawngah mei a lo chhuak ang," a ti a.

⁵LALPA PATHIAN chuan heti hian a ti a ni:"Hei hi Jerusalem khua a ni: hnamte zingah chuan ka dah a, a velah ramte a awm a.

⁶Tin, hnamte aia nasa zawka suahsualna tiin ka thurel chungah a hel a, a vela ramte aia nasain ka dan siam chungah pawh a hel a ni, Ka thurelte chu an paih thla si a, ka dan siam te ang pawhin an awm hek lo

⁷Chuvangin LALPA Pathian chuan heti hian a ti a ni: i vela hnamte aia buai hmang zawkin in awm a, ka dan siam angin in awm loh a, hnamte tana ka thuruatte in tih hek loh avangin,

⁸LALPA PATHIAN chuan heti hian a ti a ni: Ngai rawh u, kei meuh pawh hian ka dodal che u a ni, hnamte mithmuh ngeiin in zingah rorelna ka hlen dawn e;

⁹tin, in tenawmna zawng zawngte avangin thil ka la tih ngai loh, tih pawh ka tih ngai tawh loh tur chu i chungah ka ti dawn e.

¹⁰Chutichuan paten i chhungah an fate an ei ang a, fate pawhin an pate an ei ang; nangma mi la awmchhun zawng zawng chu ka tidarhsarh vek ang.

¹¹Chutichuan hei hi LALPA PATHIAN thu chhuak a ni: I bawlhlawhnate leh i tenawmnatein ka biakin i ti bawlhlawh avangin, a nuna ka nun chhung chu, ka suat ang che u a, ka mitin a hmaih hlek lo ang che u a, ka khawngaih hlek lo ang che u.

¹²Hmun thuma thena hmun khat chu hriin emaw, tamin emaw in zingah an thi ang; hmun thuma thena hmun khat chu i velah khandaihin an thi ang; hmun thuma thena hmunkhat leh chu ka ti darhsarh vek ang a, khandaihin ka um zui ang.

¹³Hetiang hian ka thinurna ka hlen ang a, an chungah ka thinrimna ka hrithla ang a, ka ngaih a tha tawh ang: tin, kei LALPA hian an chunga ka thinurna ka hrikthlak hunah chuan dichim takin ka sawi tawh tih an hre chhuak ang.

¹⁴Chu loah chuan, i vela hnamte zingah leh veivak zawng zawngte mithmuhah chuan khaw ram leh hmuhsitawmah ka siam ang che.

¹⁵Chutichuan, thinur tak leh thinrim em em a, nasa taka zilh a, i chunga thu relte ka hlen hunah i vela hnamte mit hmuhah chuan cheksawlhna leh tihelna leh vaukhanna leh thil rapthlak i ni ang.

¹⁶Kei LALPA hian ka sawi tawh hi. An chungah tamna thal fang tha lo tak, boralna tur nangmahni boralna tur chu ka rawn tlaktir ang; in chungah tamna ka tizual ang a, in chaw, nunna bul chu ka tichhia ang,Tin, in chungah tamna leh ramsa kawlhte ka rawntir ang a, fanau chanin a siam ang che; tin hripui leh thisen chhuahna in zingah a leng ang; tin in chungah khandaih ka rawn lek ang, kei hian ka sawi tawh hi," tiin.

¹⁷Tin, in chungah tamna leh ramsa kawlhte ka rawntir ang a, fanau chanin a siam ang che; tin hripui leh thisen chhuahna in zingah a leng ang; tin in chungah khandaih ka rawn lek ang, kei hian ka sawi tawh hi," tiin.