Read Baibul, Mizo Daniela 5 Bible Online

Daniela 5 - Baibul, Mizo bible

Daniela 5

¹Lal Belsazzara chuan a miropui sangkhatte ruai ropui tak a thehsak a, sang hmaah chuan uain a in a.

²Belsazzara chuan uain a in deuh chinah chuan rangkachak leh tangkaraw bungbel, a pa Nebukadnezzaran Jerusalem biak in ata a lak chhuah chu, rawn la turin thu a pe a; lal leh a mi ropuite leh a nupui te leh a hmeiten uain an inna atan.

³Tichuan, rangkachak bungbel, Jerusalema Pathian biakin ata lak chhuah te chu an rawn la a; tin, lal leh a mi ropuite, a nupuite, a hmeite chuan inna'n an hmang ta a.

⁴Uain chu an in a, rangkachakte, tangkarua te, dar te, thing te, lungte a siam pathiante chu an chawimawi dur dur a.

⁵Chumi lai tak chuan mihring kut zungtang hi a lo chhuak a, lal in bang kulh, khawnvar dahna ep lamah chuan a rawn ziak ta a; tin, lal chuan a ziaktu kuttum bung chu a hmu a.

⁶Tichuan lal chu a hmel a dang a, a rilru te chu a buai zo a, a kawngruh chuktuahte a zawi zo a, a khup te a in khawng hlawk hlawk ta mai a.

⁷Lal chu, Aikaihthiamte, Kaldai mite, aisanthiamte rawn hruai tur,'' tiin a au vak a. tin, lal chuan Babulon mifingte hnenah chuan, Tupawh he ziak hi chhiara a hrilhfiahna mi entir chu puan senduk sintir a ni ang a, a nghawngah rangkachak khaidiat awrhtir a ni bawk ang a, rama roreltu pathumte zinga pakhat a ni ang,'' tiin a sawi a

⁸Tichuan lal mifingte zawng zawng chuan lo lut a; mahse ziak chu an chhiar thei lo a, a hrilhfiahna lah lal an hriattir thei hek lo.

⁹Tin, lal Belsazzara chua mangang em em mai a, a hmel a dang a, a mi ropuite chu an mangang bawk a.

¹⁰Tin, lal leh a mi ropuite authawm a vang chuan lalnu chu ruaithehna in ah chuan a lo lut a: tin, lalnu chuan, Aw lalber, kumkhuain dam ang che; i rilru chu buai suh se la, i hmel pawh dang hek suh se:

¹¹i ramah hian mipakhat, amaha pathian thianghlimte thlarau awm chu a awm a; i pa hun laiahte pawh enna te, hriatthiamna te, finna te, pathian finna ang mai amahah chuan a awm tih hriat a ni tawh a; aw lalber, i pa lal Nebukadnezzara, i pa ngei chuan dawivaihthiamte, aikaihthiamte, Kaldai mite, aisanthiamte, hotuah a siam a;

¹²amahah chuan rilru tha fawr bik te, hriatna te, hraitthiamna te, mumang hrilfiahna te, thuhar hrilhfiahna te, dawisutthiamna te chu Daniela, lalin Beltesazzara a vuahah chuan a awm tih hriat a ni tawh thin a. Tunah Daniela a chu koh ni se la, a hrilhfiahna chu a entir mai ang,'' tiin a sawi a.

¹³Tichuan, Daniela chu lal hmaah an rawn hruai lut a. Lal chuan Daniela hnenah, "Daniela, Juda saltang fate zinga mi, ka pa lalberin Judai ram ata a rawn hruaia chu i ni em?

¹⁴Nangmahah chuan pathiante thlarau a awm a, enna te, hriat thiamna te, finna tha fawr bik te nangmahah chuan a awm tih hriat a ni, tiin i thu ka lo hria a.

¹⁵Tin, tunah hian he ziak hi chhiar tur leh a hrilhfiahna min hriattir turin mi fingte, aikaihthiamte ka hmaah an rawn hruai lut tawh a; mahse chu thil hrilhfiahna chu min entir thei lo.

¹⁶Nang erawh chuan i hrilhfiah thei a, dawi i sut thiam a ni tih ka lo hria che a; tunah i theih chuan ziak hi chhiar la, a hrilhfiahna mi hriattir la, puan senduk sintir i ni ang a, i nghawng velin rangkachak khaidiat awrhtir i ni ang a, rama roreltu pathumte zinga pakhat i ni ang,'' tiin a sawi a.

¹⁷Tin, Daniela chuan a chhang a, lal hmaah chuan, "I thupek chu nangma tan ni sela, i lawmman chu midang pe ang che; mahse ziak hi lal ka chhiarsak ang a, a hrilhfiahna chu ka hriattir ang e.

¹⁸Aw lalber pathian chungnungber a chuan i pa Nebukadnezzara chu ram te, lenna te, ropuina te, lalna te a pe a;

¹⁹lenna a hnena a pek a vang chuan mitin te, hnam tinte, tawng tinte chuan an hlau a, a hmaah chuan an khur thin a; a duh a piang a that a, a duh a piang a nun a; a duh apiang a chawisang a, a duh apiang a titlawm thin a.

²⁰Mahse a thinlung a lo dak sang a, a rilru a lo sak a, chapo takin a che ta a; a lal thutthleng ata tihtlawm a ni a, a ropuina chu an laksak ta a;

²¹tin, mihring fate zing ata hnaawhchhuahin a awm a, a rilru chu ramsa ang a siam a ni a, a chenna chu ram sabengtungte zingah a ni ta a; sebawng angin hlobetin an chawm a, a taksa chu van daia huh in a awm a: Pathian chungnungber a chuan mihringte lal na ram chungah thu a nei a, a duhsak apiang a luahtir thin a ni tih a hriat hma loh chuan.

²²Tin, nang a fapa, aw Belsazzar, he'ng zawng zawng hi i hre na a, i rilru i tihniam lo a,

²³van lalpa chungah chuan i inchawisang ta zawk a; a ina bungbel te chu i hmaah an rawn la a, nang leh i mi ropuite, i nupui te leh i hmeite nen uain inna'n in hmang a; tin, tangkarua te, rangkachak te, dar te, thir te, thing te, lungtea siam pathian, hmu thei lo, ngaithla thei lo, hre thei lo te chu i chawimawi a; tin, Pathian i nunna leh i kawng zawng zawng a kuta kawltu chu i zah lo a;

²⁴tichuan, a hnen atangin kut tumbung chu tirh a ni ta a, he ziak hi a lo in ziak ta a nih hi.

²⁵Tin, hei hi thu ziaka chu a ni e: MENE, MENE, TEKEL, UPHARSIN.

²⁶Tin, hei hi a hrilhfiahna chu a ni: MENE: Pathianin i ram chu a chhut zo ta a, a tawp a thlen ta.

²⁷TEKEL: bukin i awm a i tling ta lo.

²⁸PERES: i ram chu thenin a awm a, Media leh Persia hnenah pek a ni ta,'' a ti a.

²⁹Tichuan, Belsazzara chuan thu a pe a, Daniela chu puan senduk an sintir a, a nghawng velin rangkachak khaidiat an awrhtir a, a ramah chuan roreltu pathumte zinga pa khat a ni tur a ni, tiina puang ta a.

³⁰Chumi zanah chuan Kaldai lal Belsazzara chu thah a ni a.Tin, Daria, Media mi chuan ram chu an chang ta a, amah chu kum sawmruk leh kumhnih vela upa a ni.

³¹Tin, Daria, Media mi chuan ram chu an chang ta a, amah chu kum sawmruk leh kumhnih vela upa a ni.