Read Baibul, Mizo Joela 3 Bible Online

Joela 3 - Baibul, Mizo bible

Joela 3

¹Ngai teh u, chung niahte leh chumi hunah chuan Juda leh Jerusalem tun din leh hunah chuan,

²hnam zawng zawng ka khawm ang a, Jehosaphat ruamah ka hruai ang. Ka mi, ka rochan Israel chunga an thiltih avangin an chung thu ka rel ang; ram dangah ka mite an tidarh a.

³Thum vawrin ka mite an insem a; naupangte chu ahmei apain nawhchizuar leh uain leina'n an hralh a.

⁴Nangni tura leh Sidon, nangni Philistia ram te u, ka chungah phuba lak in tum em ni? Ka chunga phuba lak in tum a nih zawngin rang takin in chungah phuba ka la let ve ang.

⁵Ka tangkarua leh ka rangkachak in la a, ka thil tha tak duhawmte in biak in chhungahte in keng lut ta vei a;

⁶Juda fate leh Jerusalem fate pawh an ramri atanga hla takah in sawn bo theih nan, Grik fapate hnenah in hralh ta mai si a.

⁷Ngai teh u, in hralhna hmun atang khan chawk thoin ka chhuahtir ang a, in thungrulhna chu in lu chung ngeiah ka thungrul ve ang;

⁸in fapate, in fanute chu Juda fate kutah ka hralh ang, anni chuan hla takah Seba mite hnenah anmahni an hralh ang a: LALPA chuan a ti ta a ni.

⁹Hei hi hnam zingah puang u la; indona buatsaih u la: mi chakte chawk tho u la; indo mi zawng zawngte lo hnai se la, lo chho rawh se.

¹⁰In leilehna hmawr zumte khandaihah chher u la, in thei kungah chhumna chemtete chu feiah chher rawh u: mi chak lo pawhin, Ka chak a ni, ti rawh se.

¹¹A vela hnam zawng zawngte u, hmanhmawh u la, lo kal u la, pung khawm rawh u: aw, LALPA, chutah chuan i mi chak takte kal chhuktir rawh.

¹²Hnamte chu inchawk tho se la, Jehosaphata kawr ruamah chuan lo kal chho rawh se: chutah chuan a vela hnam zawng zawng chunga rorel turin ka thu dawn a ni.

¹³An sual em mai a, buh seng angin at u la, a khah hma chu a khura grep rah sawr angin rap sawr rawh u

¹⁴Mi sang tam takte chu Jehosaphat ruamah an awm khawm ta; chutah chuan a ni LALPA ni a lo thlen dawn.

¹⁵Ni leh thla te an thim a, arsiten an eng an thup a.

¹⁶Tin,LALPA chu Zion tlang atangin a rum hum hum ang a, Jerusalem khua atangin a aw a chhuah ang a; van te leh lei an nghing ang a: nimahsela LALPA chu a mite tan inhumhimna a ni ang a, Israel thlahte tan kulhbing a ni ang.

¹⁷Chutichuan LALPA in Pathian ka tlang thianghlim Zion-a cheng ka ni tih in hria ang: tichuan Jerusalem khua chu a thianghlim ang a, mikhual tumah an kal tlang leh tawh hauh lo ang.

¹⁸Chumi niah chuan heti hi a lo ni ang a, tlang sangte chuan uain thlum a fartir ang a, tlangte chu hnute tuiin a luang ang a, Judai ram lui te zawng zawng te chu tuitein a luang ang a; LALPA in atangin tuikhur a lo chik chhuak ang a, Sittim kawr ruam a tihnawng ang.

¹⁹Juda fate chunga rawng taka tia an ramah mi thiam thisen an chhuah avangin, Aigupta ram chu a ram ang a, Edom ram chu thlaler ram ro a ni ang.

²⁰Judai ram erawh chu kumkhuain a awm reng ang a, Jerusalem khua chu chhuan atanga chhuan zel thlengin.Tin, an thisen ka tleng fai ang a: LALPA chu Zion-ah a cheng reng si a.

²¹Tin, an thisen ka tleng fai ang a: LALPA chu Zion-ah a cheng reng si a.