Read Baibul, Mizo Numbers 11 Bible Online

Numbers 11 - Baibul, Mizo bible

Numbers 11

¹Tin, mipuite chuan LALPA beng hriatah phunnawi hmangte angin thil tha lo tak an sawi thin a; chu chu LALPA'n a lo hriatin a thin a alh ta a; tichuan LALPA mei chu an zingah chuan a lo thawk a, an riahhmun pawn lam chu a lo kang ta dur dur mai a.

²Chutichuan mipuite chuan Mosia an au a; tin, Mosia chuan LALPA hnenah a tawngtai a, mei chu a rem ta a.

³Chu mi hmun hming chu Tabera an ti a. LALPA mei chu an zinga a lo thawh avang chuan.

⁴Tin, an zinga hnam dang nena inneih pawlhhote chuan tisa chakna an lo nei ta a; Israela thlahte pawh an tap leh a, "Tunge sa ei tur min pe dawn?

⁵Duh duha Aigupta rama sangha kan ei thinte chu kan hre reng a, fanghmate, hmazilte, purun hel ei mite, run balte, purun var mite pawh:

⁶nimahsela tunah chuan kan thling a ro zo ta, engmah reng reng beisei tur a awm lo, mana mai lo hi chu," an ti a.

⁷Manna chu koriader mu ang, a lan danah chuan tuikeplung ang hi a ni.

⁸Mite chuan an chhar khawm a, rawtsawmnaah an rawt sawm a, sumahte an deng a, belah an chhum a, chhangahte an siam a: han ei chuan hriaka kan chhang ang a ni a.

⁹Riahhmuna zana dai a tlakin manna chu a tla tel ve a.

¹⁰Tin, mipuite chu an chhungkua kuain an puan in kawngka theuhvah an tap tih Mosia'n a lo hria a; tin, LALPA thin chu nasa takin a alh ta a. Tin, Mosia pawh a lungni lo a;

¹¹tichuan LALPA hnenah, "Eng vangin nge i chhiahhlawh hi mi tihhreawm, engtizia nge i mit ka tlun loh a, he'ng mipui zawng zawng phurrit hi ka chunga i nghah?

¹²Heng mipui zawng zawng hi ka hrin em an nih? An pi leh pute chhechhama pek i tiam rama hruai lut turin, 'Nau pawmtuin hnute hne lai a pawm angin i angchhungah pawm rawh,' i mi tih atan em ni ka hruai chhuah hlawm?

¹³Heng mipui zawng zawng pek tur hi khawia ta nge sa ka neih ang? Kan ei atana sa mi pe rawh," tia tapin mi bei si a.

¹⁴Heng mipui zawng zawng hi mahni ngawt chuan ka phur zo lo, ka tan a rit lutuk a ni.

¹⁵Hetianga mi tih dawn chuan min khawngaih la, min tihlum daih law law mai la, mi tirethei tawh suh khai," a ti a.

¹⁶Tin, LALPA'n Mosia hnenah, "Israelte upa, mipuite upa leh an hotu nia i hriat mi sawmsarihte kha ka hnenah khan hruai khawm la, inbiakna puan inah nangmah nena ding ho turin han hruai rawh.

¹⁷Tichuan ka lo chhuk ang a, chutah chuan ka rawn bia ang che: tin, nangmaha thlarau chu an chungah ka dah ang a; nangmah chauha phur loin mipuite phurrit chu an phurhpui ang che.

¹⁸Tin, nangin mipui hnenah, 'Naktuk atan hian intithianghlim vek u la, tichuan sa chu in ei mawlh ang: Sa ei tur tuin nge min pe dawn? Aigupta rama kan nawm nen khan, tiin LALPA benghriatah in tap a; chuvangin LALPA'n sa a pe ang che u a, in ei mawlh ang.

¹⁹Ni khat emaw, ni hnih emaw, ni nga emaw, ni sawm emaw, ni sawmhnih emaw mai pawh ni loin,

²⁰thla khat pumhlum, ngei hlui khawp leh luak chhuak hlui kawpin in ei ang: in zinga awm LALPA chu duh lo a, 'Engati nge Aigupta ram ata kan chhuah ni, tia a hmaah in tah avangin,' ti ang che," a ti a.

²¹Tin, Mosia'n, "Ka awmpui mipuiho kea kal theih thiau pawh 6,00,000 an ni a: 'thlakhat pumhlum ei tur sa ka pe ang,' i ti a.

²²Beram rual leh ran rual pawh talhsak i la, an khawpkham dawn em ni? Tuifinriata sangha zawng zawng pawh mansak vek i la, an khawpkham dawn em ni? A ti a.

²³Tin, LALPA'n Mosia hnenah, "LALPA kut chu a tawi ta em ni? I chungah ka thu angin a thlen leh thlan loh chu i hre mai ang," a ti a.

²⁴Tichuan Mosia chu a chhuak a, LALPA thu chu mipuite chu a hrilh a: tin, mipuihote upa sawmsarihte chu a ko khawm a, Puan In velah chuan a dintir a.

²⁵Chutichuan LALPA chu chhumah chuan a lo chhuk a, a rawn bia a, amaha thlarau chu upa sawmsarihte chungah chuan a dah a: tin, heti hi a ni a, thlarau chu an chunga a han awm veleh chuan thu an sawi ta dual dual a; nimahsela chutiang chuan an ti an ti leh tawh lo.

²⁶Amaherawhchu bukah chuan mi pahnih an la awm ta a, pakhata hming chu Eldada a ni a, pakhat leha hming chu Medada a ni: thlarau chu an chungah a awm a, chhiarte zinga tel chu an ni a, inbiakna Puan Inah erawh chuan an kal ve lo: bukah chuan thu an sawi bual bual a.

²⁷Tichuan tlangval pakhat a va tlan a, Mosia a va hrilh a, "Eldada leh Medadan bukah thu an sawi bual bual mai," a ti a.

²⁸Tin, Nuna fapa Josua, a tleirawl tirh atanga Mosia rawngbawltu chuan a chhang a, "Ka pu Mosi, khap rawh khai," a ti a.

²⁹Tin, Mosia'n a hnenah, "Keimah avanga ngaimawh em i nih? LALPA mi zawng zanwgte chuzawlnei ni vek se la LALPA'n an chungah a thlarau chu dah theuh se la tih nak alaiin," a ti a.

³⁰Tichuan Mosia chu bukah chuan a lut leh a, amah leh Israel-ho upate nen.

³¹Tin, LALPA hnen atang chuan thli a lo tleh a, tuifinriat lam ata vahmin a rawn len a, buk lehlam pang ni khat kal, a lehlam pang ni khat kal ve ve awhin buk velchuan tawng hnih laia sangin a tlaktir a.

³²Tin, mipuite chuan chu mi ni nileng leh zankhua leh a tuk nileng chuan vahmim chu an va chhar khawm a: a chhar tlem ber pawhin homer sawm a chhar a: buk velah chuan mahni tan tan an pho theuh a.

³³Tin, chumi sa chu an ei lai, an la ei zawh hmain, mipue chungah LALPA thin chu a alh ta a, mipuite chu hripui nasa takin LALPA'n a hrem ta a.

³⁴Chu mi hmun hmingah chuan Kibrot-hatava an ti a; chutah chuan tisa chakna neitute chu an phum avangin.Tin, Kibrot-hatava atang chuan mipuite chu Jazeroth-ah an kal a; Hazeroth-ah chuan an awm ta a.

³⁵Tin, Kibrot-hatava atang chuan mipuite chu Jazeroth-ah an kal a; Hazeroth-ah chuan an awm ta a.