Read Baibul, Mizo Numbers 12 Bible Online

Numbers 12 - Baibul, Mizo bible

Numbers 12

¹Tin, Miriami leh Arona chuan Mosia'n Kus hmeichhia nupuia a neih avangin an sawichhia a: Kus hmeichhia chu a nei ngei si a.

²Anni chuan, "Mosia hnenah chauh hian em ni LALPA'n thu a sawi bik: Keini hnenah pawh hian a sawi ve lo em ni?" an ti a. Chu chu LALPA'n a lo hria a.

³Mosia chu lei chunga mihring zawng zanga zaidam lawrlak a ni a.

⁴Tin, Mosia leh Arona leh Miriami hnenah LALPA'n, "In pathumin lo chhuak u la, inbiakna puan inah lo kal rawh u," a ti ta thut mai a. Tichuan an pathum chuan an va kal a.

⁵Tin, LALPA chu chhum dingah a lo chhuk a,Puan In kawngkaah a lo ding a, Arona leh Miriami chu a ko a; tin, an pahnih chuan an lo chhuak a.

⁶Tin, ani chuan, "Ka thu hi ngaithla rawh u: in zingah hian zawlnei in awm chuan amah chu kei LALPA hi inlarnain ka inhriattir ang a, mang lamah ka bia ang.

⁷Ka chhiahhlawh Mosia hi zawng chutiang a ni lo: ka chhungkaw thu zawng zawngah chuan a rinawm a ni.

⁸Ani nen zawng tawngkain thuruk awm loin tlang takin kan inbia ang a; LALPA hmel pawh a hmu ang; chuvangin ka chhiahhlawh Mosia hi engtiziaa sawichhe ngam nge in nih?" a lo ti a.

⁹Tichuan LALPA thin chu an chungah a alh a, a kal leh ta a.

¹⁰Tin, Puan In chunga chhum chu a kiang ta a; tin, ngai teh, Miriami chu vur ang maia varin a lo phar ta a; Arona chuan Miriami chu a han en a, ngai teh, phar a lo ni ta reng mai a.

¹¹Chutichuan Aronan Mosia hnenah, "Aw, ka pu, ka chungah sual nghat lul suh ang che, atthlak takin kan lo ti a, kan lo sual ta a ni e.

¹²Mi, a nu chhul ata a lo chhuah tirh atanga thi sa deuhthaw angin awm lul suh se," a ti a.

¹³Tichuan Mosia'n, "Aw Pathian, tidam leh teh khai," tiin LALPA chu a au a.

¹⁴Tin, LALPA'n Mosia hnenah, "A pain a hmaia chil a chhak ngawt pawhin ni sarih chu a zak dawn lo'm ni? Daipawnah ni sarih bibo se la, chu mi zawhah hruai luh leh ni rawh se," a ti a.

¹⁵Chutichuan Miriami chu daipawnah ni sarih a bibo a; Miriami an hruai luh leh hma chuan mipuite chu an tawl sawn lo a.Chumi zawhah chuan mipuite chu Hazeroth ata an chhuak a, Paran thlalerah awmhmun an khuar a.

¹⁶Chumi zawhah chuan mipuite chu Hazeroth ata an chhuak a, Paran thlalerah awmhmun an khuar a.