Read Baibul, Mizo Numbers 20 Bible Online

Numbers 20 - Baibul, Mizo bible

Numbers 20

¹Tin, Israela tlah, pungkhawmho zawng zawngte chu thla khatnaah chuan Zin thlalerah an lut a: tin, mipuite chuan Kades-ah awmhmun an khuar a; chutah chuan Miriami chu a thi a, chutah chuan an phum a.

²Tin, pungkhawmho chuan tui an nei ta lo a; Mosia leh Arona chungchang thuah an inpun khawm chiam a.

³Tin, mipui chuan," LALPA hmaa kan unaute an thih lai khan pathianin min lo tihlum ve ta then zawk se la aw!

⁴Engati nge LALPA mipuihote hi thi tura thlalerah hian i hruai luh ni, keimahni leh kan rante nen?

⁵Eng vangin nge he ram tha lo taka min hruai lut turin Aigupta ram ata min tichhuah ni Buhbal te, theipui te, grep kung te, pawmgranet te awm lohna hmun ani a, tui in tur reng reng lah a awm hek lo," tiin Mosia chu an bei vak a.

⁶Tin, Mosia leh Arona chu mipui zing ata chu inbiakna puan in kawngkaah an kal a, an bawkkhup a; tin, LALPA ropuina an hnenah a lo lang a.

⁷Tichuan LALPA'n Mosia chu a bia a,

⁸Tiang la la, pungkhawmhote chu awmkhawmtir la, nang leh i unau Arona nen, an mithmuhah lungpui chu a tui tichhuak turin hrilh la; lungpui ata chu tui i lakchhuahsak ang a; tichuan pungkhawmho leh an rante chu i intir dawn nia," tiin.

⁹Chutichuan Mosia chuan LALPA hma ata tiang chu a thupek ang chuan a la a.

¹⁰Mosia leh Arona chuan pungkhawmho chu lungpui bulah chuan an awmkhawmtir a, an hnenah, "Helhmanghote u, ngai teh u, he lungpui ata hi tui kan lak chhuahsak dawn che u em ni?" an ti a.

¹¹Tin, Mosia chuan a ban aphar a, lungpi chu a tiang chuan vawi hnih a han vua a; tichuan tui a lo chhuak ta dur dur mai a, pungkhawmhote leh an rante chuan an in ta a.

¹²Tin, LALPA'n Mosia leh Arona hnenah chuan, "Mi rin loha Israela thlahte mithmuha mi chawimawi loh avangin he'ng pungkhawmho hi ka pek ramah chuan in hruai lo vang," a ti a.

¹³Hei hi Meriba tuite chu a ni; Israela thlahte chuan LALPA chu an bei vak a, chutah chuan chawimawiin a awm tak avangin.

¹⁴Tin, Mosia'n Kades atangn Edom lal hnenah mi a ti ra, "I unaupa Israela chuan heti hiana ti, 'Kan chunga tuarna lo thleng zawng zawng hi i hria a;

¹⁵kan pi leh pute Aigupta rama an chhuk a, rei tak Aigupta rama kan awm te, Aigupta miten keini leh kan pi leh pute tha lo taka mi tihziate kha.

¹⁶Tichuan LALPA kan au a, kan aw chu a lo hria a, vantirhkoh a rawn tir a. Aigupta ram ata min hruai chhuaki a: tin, ngai teh, i ram dep ber khua Kades-ah kan awm a:

¹⁷kawngaih takin i ram hi kan kal tlang teh ang: lo emaw, grep huanah emaw kan kal lo ang a, tuichhunchhuah tuite kan in hek lo ang: lal lamlianah kan kal zel ang a, i ram kan pelh hma loh chuan ding lam emaw, veilamah emaw kan peng lo ang," a ti a.

¹⁸Tin, Edoma chuan a hnenah "Mi pal tlang tur ani lo, mi pal chuan abei tur chein khandaih nen ka lo thawk ang," a ti a.

¹⁹Chutichuan Israela thlahte chuan a hnenah, "Lamlianah kan kal chho ang a; tin, keimahni leh kan ranin i tui kan in chuan a man chu kan pe ang che; thil dang engmah ti loin a kalin kan kal tlang mai ang e," an ti a.

²⁰Tin, ani chuan, "Kal lo ang," a ti a. Tichuan Edoma chu mipui tam tak nen, mi chak takte nen anmahni bei turin a lo thawk ta a.

²¹Edoma chuan Israel mite chu a rama kal a phal ta lo a; tichuan Israel mite chuan an kirsan leh ta a.

²²Tichuan Kades atangin an chhuak a; Israel thlah, mipuiho zawng zawng chuan Hor tlang an va thleng a.

²³Tin, LALPA'n Mosia leh Arona chu, Edom ram dep Hor tlangah chuan abia a,

²⁴Arona chu a chipuite hnenah hruai a ni ang; Meriba tuiahte khan ka thu dodala in hel avang khan Israel thlahte ka pek ramah chuan a lut dawn lo a ni.

²⁵Arona leh a fapa Eleazara chu Hor tlangah rawn hruai chho rawh:

²⁶Arona chu a silhfente hlhsak la, a fapa Eleazara bel rawh: Arona chu achipuite hnenah hruai ani ang a chutah chuan a thi ang," tiin.

²⁷Tin, Mosia chuan LALPA thupek ang chuan a ti a: mipui zawng zawng mithmuhah Hor tlangah chuan an chho a.

²⁸Tichuan Mosia chuan Arona chu a silhfente a hlihsak a, Eleazara a bel a: tin, Arona chu tlang chhipah chuan a thi ta a; tin, Mosia leh Eleazara chu tlang ata chu an chhuk a.Tin, mipui zawng zawngte chuan Arona a thi tih an hriat chuan, Israel zawng zawngte chuan ni sawmthum an sun a.

²⁹Tin, mipui zawng zawngte chuan Arona a thi tih an hriat chuan, Israel zawng zawngte chuan ni sawmthum an sun a.