Read Baibul, Mizo Nahuma 3 Bible Online

Nahuma 3 - Baibul, Mizo bible

Nahuma 3

¹Thisen chhuah hmang khawpui chu a chung a pik e! Dawt leh inrawknain a khat vek a; an sa seh chu a chat lak lo.

²Vuakin vai rik te, tawlailir ke in nghawr ri te, sakawr zuang te, tawlailir tlan hlawk hlawk te nen;

³Sakawr chung chuang mi sakawra chuangte, khandaih tle zawk zawkte, fei tle zawr zawrte nen; mi thah awm rem rumte, ruang awm rei ruite nen: ruangin kin tih reng a nei lo; an ruangte chu an chhuih a:

⁴Chung chu, nawhchizuar hmeltha, dawithiamnu, uirena avanga hnam hralh a, a dawi chinna avanga chhungkaw hralhtu uirena nasa tak avanga lo awm a ni.

⁵Sipaihote LALPA chuan heti hian a ti: Ngai teh, ka do che a ni; i hmai lamah i puan ka hlim ang a; i saruakna hnamte hnenah leh i mualphona lal ramte hnenah ka entir ang.

⁶Bawlhhlawh tenawm takin ka theh ang che a, zahthlak takin ka siam ang che a, ennawm atan ka dah ang che.

⁷Tin, heti hi a ni ang a, a hmu apiang che i lakah an tlan bo ang a, Ninevi khua chu a lo ram ta a ni: tu nge sun ang? Khawi ata nge i tan thlamuantute ka zawn tak ang? an ti ang.

⁸Nile lui luan hual No-amon, a kulh atan tuipui hmang a, a in hung nana tuidil hmang aiin i chak zawk em ni?

⁹Ethiopia leh Aigupta chu a chakna ani a, chu chu tawp chin nei lo a ni; Put leh Lubim chu nangmah tanpuitute an ni.

¹⁰Chuti chung pawh chuan lak boin a awm a, a salah a tang a: kawtthler tin tawpah a naupang te te chu an paih sawmsak a: a mitha te tan thum an vawr a, a milian zawng zawngte chu khaidiatin phuar an ni.

¹¹Nangpawh i rui bawk ang a, thuhrukin i awm ang; hmelma avangin kulh nghet i zawng bawk ang.

¹²I kulh zawng zawngte chu theipui kung, rah hmin hmasa pu ang an ni ang a: an nghin phawtchuan eitu kaah an tla lut thin.

¹³Ngai teh,i chhunga i mipuite chu hmeichhia an ni a; i hmelma te tan i ram kawng-ka chu a in hawng huai a: i in kalhna thir tlawnte chu meiin a kang ral a ni.

¹⁴Hual vela i awm chhung atan tui chawi la, i kulhte tinghet rawh; hlumawmnaah chuan kalla, lungcharna chu chil la, leirawhchanna thuk chu tinghet rawh.

¹⁵Chutah chuan meiin a kangral ang che a, khandaihin a sathlum ang che a, thingnget angin a tiboral ang che: thingnget angin intitam la, khaukhuap angin intitam rawh.

¹⁶I sumdawngtute chu van arsi aia tamin i tipung a: thingngetin a thla azar a, a thlawk bo ang hian an bo zo ta.

¹⁷I mi lallukhum khumte chu khaukhuap ang an ni a, i sipaihotute chu khaw vawh nia pala khau rual fu khawm ang an ni, amaherawhchu ni a lo chhuak a, an thlawk bo a, an awmna hmun reng hriat a ni lo.

¹⁸Aw Assuria lal, i beram vengtute chu an muthlu e: i miliante chu an chawl a: i mipuite chu tlangahte an darh zo a, hruai khawmtu tumah an awm lo.I na damna tur a awm lo a; i hliam chu a nasa hle a ni: i thawm hria apiangin kut an ben khum che; i suahsualnain a chim fo loh tu nge awm?

¹⁹I na damna tur a awm lo a; i hliam chu a nasa hle a ni: i thawm hria apiangin kut an ben khum che; i suahsualnain a chim fo loh tu nge awm?