Read Baibul, Mizo Habakuka 1 Bible Online

Habakuka 1 - Baibul, Mizo bible

Habakuka 1

¹Zawlnei Habakukan phurrit a hmuh chu.

²Aw LALPA, eng chen nge ka au vang a, Min ngaihthlak loh vang? Inpawngnekna thu I hnenah ka au chhuahpui a, Nangin i chhanhim si lo a.

³Engatinge khawlohna te min entir a, thiltih dik lo tak te hi I en reng? Inrawkna leh Inpawngnekna te Ka hmaah an awm reng si a: Inhauhna leh innghirnghona te a lo chhuah a ni.

⁴Chuvangin dan thu chuan kori a tu hlei thei lo a, Rorelna thu a chhuak ngai hek lo: Mi fel te chu mi suaksualte chuan an hual vel a, Chuvangin rorelna chu dik lo takin a chhuak thin a ni.

⁵Hnamte chu en u la, thlir reng u la, nasa takin mak ti rawh u; In dam chhung hian thil kawngkhat ka tih hi, Chu thil tih chu min hrilh che u mah se la In awih tawp lo ang.

⁶Ngai rawh u, Kaldai mi, hnam kawlhsen tak leh Thu dawn tawi tak, chenna hmun, an ta lo pawh neih tum a lei van paltlang thintute chu ka chawk tho a nia.

⁷An hlauhawmin anrapthlak em em a ni, an rorelna leh an ropuina chu an mahni atanga chhuak bawk a ni.

⁸An sakawrte pawh keite aiin an tuan tha zawk a, Tlailam chinghniate ai pawhin an hlauhawm zawk a ni; An sakawr chungchuang hote chu hla tak ata lo kal an ni; Mupui sapan ang maiin an ding vung vung a.

⁹Pawngnek tumin an lo kal hlawm a, chak takin hma lam an hawi tlat a ni; tiau vaivut ang maia tam salte an man hlawm thin,

¹⁰A ni, lalte pawh an cheksawlh a, Miliante chu an nuihzabur a; Kulh nghet zawng zawngte pawh an tham lo, Lei an chhung pawng a, an la mai thin si a.

¹¹Thli ang maiin an rawn nuai a, An kal tlang pur pur a, A maherawhchu, an chakna chu pathian an neih avangin Thiamloh an chang a ni.

¹²Aw LALPA ka Pathian, ka mi Thianghlim, Chatuan mi i ni lo em ni? I thi ngai lo. Aw LALPA, nangin an ni chu rorelna'n i thlang ta a, Aw lungpui, nangin anni chu thununna'n i din chhuak a ni.

¹³Nang, thilsual hmu thei lokhawpa mit thianghlima In hnehchhiahna en thei lo chuan Engatinge mi vervek taka titute chu i en theih a, mi suaksualten an aia mifel an ei zawh laia i ngawih renga,

¹⁴Mihring hi tuifinriata sanghate leh rannung An chunga roreltu nei bik lote anga i siam ni?

¹⁵Nghakuaiin a khai chhuak vek a, a lenin a man hlawm a, a lenkhang chuan a fun khawm a: Chuvangin a hlimin a lawm a ni.

¹⁶Chutih avang chuan a len hnenah inthawina a hlan a, a lenkhang hnenah rimtui a hal a, Anmahni avanga a chanvo a lo lena eitur a neih tamtak avangin.Chuvangin alen chu tiruak leh thinin, Hnamte thah a hnial lo fo dawn em ni?

¹⁷Chuvangin alen chu tiruak leh thinin, Hnamte thah a hnial lo fo dawn em ni?