Read Baibul, Mizo Malakia 3 Bible Online

Malakia 3 - Baibul, Mizo bible

Malakia 3

¹Ngai teh, u, ka tirhkoh ka rawn tir a, Ka hmaah kawng a buatsaih ang: Tin, in zawn LALPA chu a biakinah a lo kal phut ang; Ngai teh u, thuthlung tirhkoh in lawm em em chu a lo kal e, Sipaihote LALPA chuan a ti.

²Amaherawh chu a lo kal ni chu tu nge tuar zo ang: A lo lan hunah chuan tu nge ding thei ang? Ani chu rawhtuina mei ang leh puan sutute sabawn ang a ni si a:

³Tangkaraw rawhtuina leh tithianghlimtu angin a thu ang a, Levia fate a tithianghlim ang a, Rangkachak leh tangkarua angin an mahni a tifai ang a; LALPA tan chuan felnaa thilhlantute an ni ang.

⁴Chutichuan hmasang nite leh hmasang kumte angin Judai ram leh Jerusalem thilhlan chu LALPA tan duhawm tak a ni leh ang.

⁵Rorel turin ka rawn hnaih dawn a che u; Dawithiamte, uirete, dawta chhechhamtute chungah leh Hmeithai leh fahrah leh inhlawhfa hlawh tikhawlova hnehchhiahtute leh hnamdang lo sathlatute leh mi tih lotute chungah chuan Thu hretu tuantha tak ka ni ang, Sipaihote LALPA chuan a ti.

⁶Kei LALPA hi ka danglam si lo, chuvangin nangni, aw Jakoba fate u, tihboral in ni lo e.

⁷In pute hun ata tawh ka thuruatte in kal pensan a, zawm pawh in zawm ngai lo. Ka hnenah lo kir u la, Tichuan in hnenah ka lo kir ang, Sipaihote LALPA chuan a ti. Nangni erawh chuan, Engahte hian nge kan kir ang? In ti a.

⁸Mihringin pathian ata chu a ruksak tur em ni? Mahse nangni chuan min ruksak thin. Nangni erawh chuan, Engahte hian nge kan ruksak che? In ti a, Sawma pakhat leh thilhlanahte hian.

⁹Anchhia lawh in ni ta; nangni he hnam pumpui hian Kei hi min ruksak si thin a.

¹⁰Ka inah eitur a awm theihna'n sawma pakhat zawng zawng chu thawhlawm inah rawn la rawh u,Van tukverhte chu hawnsak che uin Malsawmna dawn sen loh khawp hial ka vur dawn che u nge dawn lo, mi han fiah teh reng u, Sipaihote LALPA chuan a ti.

¹¹Eiraltu chu ka khapsak ang che u a, tichuan, in lei rahte chu a tihchhiatsak tawh lo ang che u a, Huana in grep rah chu a hlam tla ral tawh hek lo ang, Sipaihote LALPA chuan a ti.

¹²Tin, hnam zawng zawngin engthawl an ti ang che u a, ram duhawm tak in la nih dawn avangin, Sipaihote LALPA chuan a ti.

¹³Ka chunga in thute chu a paukhauh hle, LALPA chuan a ti. Nangni erawh chuan, engah khan nge i chungah chutiang thu kan sawi? In ti a.

¹⁴Pathian rawngbawl hi a thlawn a ni: A thuchah kan zawm leh Sipaihote LALPA hmaa intilunghnur taka kan leng thin hi sawtna eng nge awm?

¹⁵Tin, mi chapote chu an eng a thawl e, kan ti a; Thil suaksual titute chu an dingchang bawk a, Pathian an fiah a, chhanhim an ni bawk thin in ti a ni:

¹⁶Tichuan, LALPA tihtute chu an in be tlang a: LALPA chuan a lo ngaithla a, a lo hria a, LALPA tihtute leh a hming ngaihsak tute tan Hriatrengna lehkhabu chu a hmaah ziak a ni ta a.

¹⁷Rochuam ka siam niah chuan ka ta an ni ang, Sipaihote LALPA chuan a ti; tin, miin a fapa, a rawngbawlsaktu chu a zuat angin an ni chu ka zuat ang.Tichuan, in lamlet ang a, mifel leh mi suaksual, Pathian rawngbawltu leh bawl lo tu chu in thliar thei tawh ang.

¹⁸Tichuan, in lamlet ang a, mifel leh mi suaksual, Pathian rawngbawltu leh bawl lo tu chu in thliar thei tawh ang.