Read Baibul, Mizo Matthaia 10 Bible Online

Matthaia 10 - Baibul, Mizo bible

Matthaia 10

¹Tin, a zirtir sawm leh pahnihte chu a ko a, anmahni hnawh chhuah theihna turin, ramhuai bawlhhlawhte chunga thuneihna a pe a; dam lohna tinreng leh natna tinreng tihdam theihna turin thuneihna a pe bawk a.

²Tin, tirhkoh sawm leh pahnihte hming chu he'ng hi a ni: A hmasa berah chuan Simona (Petera an tih) leh a unau Andria te; Zebedaia fapa Jakoba leh a unau Johana te;

³Phillipa leh Bartholomaia te; Thoma leh chhiahkhawntu Matthaia te; Alphaia fapa Jakoba leh Thaddaia te.

⁴Kanana mi Simona leh a mantirtu Juda Iskariota te hi.

⁵Chung sawm leh pahnih chu Isua'n a tir chhuak a, an hnenah heti hian thu a pe a: Jentailte kawngah kal suh u la, Samari mite khua reng rengah pawh lut suh ang che u.

⁶Amaherawhchu, Israel hnam beram bote hnenah chuan kal zawk ang che u.

⁷Tin, in kalin, 'Van ram chu a lo hnai,' tiin, hril zel ang che u.

⁸Dam lote tidam u la, mitthite kaitho u la, pharte tithianghlim u la, ramhuaite hnawt chhuak ang che u; athlawnin in hmu a, athlawnin pe ang che u.

⁹In kawnghrenah te chuan rangkachak tangka emaw, tangka emaw, dar tangka emaw keng suh u la,

¹⁰zinna atan ipte emaw, kawr pahnih emaw, pheikhawk emaw, tiang emaw keng hek suh u; hnathawktu chu a ei tur hmu tlak a ni si a.

¹¹Tin, khaw lianah emaw, khaw teah emaw in luhna apiangah, a thleng tlak mi tur che u zawng chhuak u la, in chhuah leh hma loh chuan chutah chuan thleng reng ang che u.

¹²Tin, inah chuan in luh dawnin chibai buk ang che u.

¹³Tin, ina mite chu chibai buk tlak an nih chuan, in thlamuanna thu chu an chungah lo thleng rawh se; an tlak loh erawh chuan, in thlamuanna thu chu in chungah lo kir leh rawh se.

¹⁴Tin, tupawh lawm lo che u a, in thu pawh ngaithla lo apiang, chu mi in atan emaw, chu mi khua ata emaw in chhuah hun chuan, in kephaha vaivut chu thing thla ang che u.

¹⁵Tih tak meuhin ka hrilh a che u. Ngaihtuah niah chuan, chu mi khuate ai chuan Sodom leh Gomorra ram tuar tur chu a zia a awm zawk ang.

¹⁶Ngai teh u, chinghne zinga beram awm angin ka tirh che u hi; chutichuan rul anga fing, thuro anga pawikhawih loin awm ang che u.

¹⁷Nimahsela, mihring lakah chuan fimkhur rawh u; roreltuhote an mantir dawn si che u a, inkhawmna inahte an vua ang che u a.

¹⁸A ni, keimah vangin hotute leh lalte hmaah, anmahni leh Jentailte hriattirna turin, an la hruai ang che u.

¹⁹Nimahsela, an mantir hunah che u chuan, 'Engtinnge, eng thu nge ka sawi ang?' tiin, lungkham suh ang che u; in sawi tur chu a hun takah chuan a hriattir dawn si che u a.

²⁰A sawitu chu nangni in ni dawn si lo a, in Pa Thlarauin nangmahniah a sawi zawk dawn a ni.

²¹Tin, tihhlum turin unaupa leh unaupa an inmantir ang a, pa pawhin a fa a mantir bawk ang; fate pawhin an nu leh an pate an do ang a, an tihhlumtir bawk ang.

²²Keima hminga vangin mi zawng zawng huat in ni ang; nimahsela a tawp thlenga tuar peih apiang chu, chu mi ngei chu chhandamin a awm ang.

²³Chutichuan, he khuaah hian an tihduhdah hunah che u, khaw dangah tlansan ang che u; tih tak meuhin ka hrilh a che u. Mihring Fapa a lo kal hmain Israel khuate chu in fang chhuak lo ang.

²⁴Zirtir a zirtirtu chungah a awm lo; bawih pawh a pu chungah a awm hek lo.

²⁵Zirtir chu a zirtirtu anga lo awm leh, bawih chu a pu anga lo awm chu, a tawk e. In neitupa mah 'Beelzebula,' an tih chuan, a chhungte chu an va ti dawn nasa em!

²⁶Chutichuan, anmahni chu hlau suh ang che u; lang lo tura thuhruk engmah a awm si lo, hriat loh tura zep pawh engmah a awm hek lo.

²⁷Thima ka hrilh che u hi engah sawi ang che u; beng bula in hriat hi in chunga chuangin tlangaupui ang che u.

²⁸Tin, taksa tihluma thlarau tihlum thei lotute chu hlau suh u la; Gehena-a thlarau leh taksa tiboral theitu erawh chu hlau zawk ang che u.

²⁹Chawngzawng pahnih dar tangka pakhatah an hralh thin lo em ni? Nimahsela, an zinga pakhat mah in Pa loin leiah a tla lo ang.

³⁰In samzaite lam pawh hi chhiar vek a ni a sin.

³¹Chuvangin, hlau suh u; chawngzawng tam tak aiin in hlu zawk a ni.

³²Chutichuan, mite hmaa mi tan apiang, ka Pa vana mi hmaah ka tan ve ang.

³³Nimahsela, tupawh mite hmaa mi phat apiang, ka Pa vana mi hmaah ka phat ve ang.

³⁴Khawvelah hian rem lentir tura lo kal emaw mi ti suh u; rem lentir tura lo kal ka ni lo a, khandaih lentir tura lo kal ka ni zawk.

³⁵Mi, a pa dotir turin, fanu a nu dotir turin, mo a pi dotir turin lo kal ka ni a sin.

³⁶Mi a hmelmate chu ama chhungte zinga mi ngei an ni ang.

³⁷Tupawh a nu emaw, a pa emaw keimah aia hmangaih zawk chu, ka mi ni tlak a ni lo; tupawh a fanu emaw, a fapa emaw keimah aia hmangaih zawk pawh, ka mi ni tlak a ni lo.

³⁸Tupawh a kraws pua mi zui lo chu, ka mi ni tlak a ni lo.

³⁹Tupawh a nunna hmu chuan a chan ang a; keimah avanga a nunna chan chuan a hmu ang.

⁴⁰Tupawh a lawm che u chu, mi lawm a ni a, tupawh mi lawm chu mi tirtu lawm a ni.

⁴¹Tupawh zawlnei chu zawlnei a nih avanga lawm chuan, zawlnei lawmman a hmu ang a; tupawh mi fel chu mi fel a nih avanga lawm chuan, mi fel lawmman a hmu ang.Tin, tupawh he'ng mi te tak zinga pakhat hnenah hian, Zirtir a nih avanga tui vawt no khat chauh pawh pe apiang chuan, tih tak meuhin ka hrilh a che u, an lawmman chu an chan tawp lo ang, a ti a.

⁴²Tin, tupawh he'ng mi te tak zinga pakhat hnenah hian, Zirtir a nih avanga tui vawt no khat chauh pawh pe apiang chuan, tih tak meuhin ka hrilh a che u, an lawmman chu an chan tawp lo ang, a ti a.