Read Baibul, Mizo Matthaia 11 Bible Online

Matthaia 11 - Baibul, Mizo bible

Matthaia 11

¹Tin, heti hi a ni a, Isua'n a zirtir sawm leh pahnihte chu, thu a pek zawh veleh, chuta tang chuan an khuaahte zirtir leh thuhril turin a kal ta a.

²Tin, Johana'n Krista thiltihte chu tan inah chuan a lo hriatin, a hnenah,

³'Lo kal tura chu i ni nge, mi dang kan la ngai ang?' tiin, a zirtirte a palaitir a.

⁴Tin, Isua'n an hnenah, Kal leh ta u lang, thil in hmuh leh in hriat hi Johana hnenah va hrilh rawh u.

⁵Mitdelte an mit a lo var ta, kebaite kein an lo kal ta, pharte an lo thianghlim ta, bengngawngte pawh an beng a lo var ta, mitthite pawh kaihtawhin an awm ta, pachhiate pawhin Chanchin Tha hril an dawng ta.

⁶Tin, tupawh ka chunga lungnih lohna hmu lo chu an eng a thawl e, tiin a lo chhang a.

⁷Chung mite chu an hawn veleh, Isua'n mipui hnenah chuan Johana thu a sawi ta a, Eng en turin nge thlalera in kal chhuah kha? Luang thli chhem nghin maw?

⁸A nih loh leh, eng en tur berin nge in kal chhuah kha? Puan nem sin maw? Ngai rawh u, puan nem sinte chu lal inahte a sin an awm.

⁹A nih loh leh eng vang berin nge in kal chhuah kha? Zawlnei en turin maw? A nih ngei kha, ka ti a che u, zawlnei ai pawha ropui zawk.

¹⁰'En teh u, ka tirhkoh i hmaa'n ka tir a ni. Ani chuan i hmaah i kawng a siam ang,' ti a, a chanchin an ziaka kha, he mi hi a ni.

¹¹Tih tak meuhin ka ti a che u, Hmeichhe hrin zingah Baptistu Johana aia ropui zawk an la chhuak ngai lo; nimahsela van rama mi te deuh pawh ani ai chuan an ropui zawk si a.

¹²Baptistu Johana awm achin tun thlengin, van ram chuan beih vakna a tawk thin a, a bei vakte chuan an pawng lak thin.

¹³Zawlneite zawng zawng leh Dan thu chuan, Johana a lo awm thleng khan an hril lawk thin a ni.

¹⁴In awi duh zawngin, chu chu Elija, lo kal tura chu a ni.

¹⁵Tupawh hriatna tura beng nei chuan hre rawh se.

¹⁶Nimahsela, tun lai chhuante hi eng nen nge ka tehkhin ang? Naupang dawr hmunahte thua, an thiante au a,

¹⁷'Phenglawng kan tumsak che u a in lam si lo a. Kan tap vak a, awm in inchum si lo,' tiate ang hi an ni.

¹⁸Johana chu a lo kal a, a eiin a in lo a, 'Ramhuai a zawl a nih hi,' an ti a.

¹⁹Mihring Fapa a lo kal a, a eiin a in a, 'En teh u, chaw heh mi, uain heh mi, chhiahkhawntute leh mi sualte thian saw!,' an ti si a. Finna chu a thiltih atangin a dikzia a lang a ni.

²⁰Tin,an sim loh avangin,a thilmak tih tamna ber khuate chu a hau ta a;

²¹Korazin, i chung a pik e! Bethsaida, i chung a pik e! Nangmahnia thil mak tak tihte kha Tura leh Sidon khuaa tih ni se la, saiip puan sina vut zinga thuin an sim tawh ang.

²²Nimahsela, ka ti a che u, ngaihtuah niaah chuan nangni tuar ai chuan, Tura leh Sidon khaw tuar tur chu a zia a awm zawk ang.

²³Tin, nang Kapernaum, van thlengin chawimawi i ni dawn em ni? Mitthi khaw thlengin i zuk kal dawn a sin; nangmaha thil mak tak tihte kha Sodom khuaa tih ni se la, tun thlengin a la awm reng ang.

²⁴Nimahsela, ka ti a che u, ngaihtuah niah chuan, i tuar ai chuan Sodom ram tuar tur chu a zia a awm zawk ang, a ti a.

²⁵Chu mi lai chuan Isua'n a bia a, Aw ka pa, lei leh van Lalpa, nangin mi fing leh mi bengvarte hnenah he'ng thu hi i zep a, nausente hnena i puan avang hian ka fak a che.

²⁶A ni, ka Pa, chutiang tih chu i ngaihin a tha a ni.

²⁷Ka pain thil engkim mi kawltir tawh; Pa lo chuan tumahin Fapa hi an hre lo; Fapa leh an hnena Fapain a puan duhnate chauh lo chuan tuma'n Pa chu an hre hek lo.

²⁸Nangni thawk rim leh phurrit phur zawng zawngte u, ka hnenah lo kal u la, keima'n ka chawlhtir ang che u.

²⁹Ka nghawngkawl bat u la, ka hnenah zir rawh u; thuhnuairawlh leh rilrua inngaitlawm tak ka nih hi: tichuan, in thlarau tan chawlhna in hmu ang.Ka nghawngkawl chu a nuam a, ka phur pawh a zang a ni, a ti a.

³⁰Ka nghawngkawl chu a nuam a, ka phur pawh a zang a ni, a ti a.