Read Baibul, Mizo Matthaia 12 Bible Online

Matthaia 12 - Baibul, Mizo bible

Matthaia 12

¹Chu mi lai chuan Isua chu Chawlhniah buh hmunah te a kal tlang a; a zirtirte chu an ril a tam a, buh vuite an thliak a, an ei ta a.

²Tin, Pharisaite'n chu chu an hmuhin, a hnenah, En teh, i zirtirten Chawlhniah tih thiang lo chu an tih hi, an ti a.

³Ani erawh chuan an hnenah, Davida a riltam laia a thiante nena an thil tih kha in chhiar lo em ni?

⁴Khatia Pathian ina a luh a, amah leh a thiante ei thian loh, puithiamte chauh ei thian changdah an ei thu kha?

⁵A nih leh, Chawlhniin Pathian biak ina puithiam awmte chuan, Chawlhni an bawrh pawhin an thiam zel tih Dan thuah chuan in chhiar lo em ni?

⁶Engpawh ni se la, Pathian biak in aia ropui zawk hetah a awm tih ka hrilh a che u.

⁷Nimahsela, 'Inthawina duh loin khawngaihna ka duh e,' tih hi, a awmzia lo hre tawh ni u la chu, mi thiamte chu thiam loh in chantir lo tur.

⁸Mihring fapa hi Chawlhni Lal a ni si a, a ti a.

⁹Tin, chuta tang chuan a kal a, an inkhawmna inah a va lut a.

¹⁰Tin, ngai teh, mi pakhat kut zeng a lo awm a. Tin, an hek theihna'n. Chawlhniin tihdam a thiang em? tiin Isua an zawt a.

¹¹Tin, ani chuan an hnenah, Nangni zingah tupawhin beram pakhat nei u la, chu chu Chawlhniin khuarkhurumah tla ang se la, tu nge chelhin kai chhuak lo ang che u?

¹²Beram pakhat ai chuan mihring pakhat chu a va hlu zawk em! Chuvangin, Chawlhniah tihthat a thiang e, a ti a.

¹³Chu veleh, chu mi hnenah chuan, I kut phar rawh, a ti a. Tichuan, a phar a, a lehlam angin a dam ta viah a.

¹⁴Chutichuan, Pharisaite chu an chhuak a, amah an tihboral theih dan tur ngaihtuahin an inrawn a.

¹⁵Nimahsela, Isua'n chu chu a hriatin chuta tang chuan a kal bo ta a. Tin, mi tam takin amah an zui a, an zain a lo tidam vek a,

¹⁶a chanchin puan loh tur an hnenah a ti tlat a:

¹⁷Zawlnei Isaia'n,

¹⁸En teh u, ka chhiahhlawh, ka thlan, ka duh tak, ka rilruin a lawm em ema hi; A chungah ka thlarau ka dah ang a, tichuan, Jentailte hnenah rorelna thu a hril ang.

¹⁹A hnial lo ang a, a au hek lo ang a, kawtthlerahte pawh tuma'n a aw an hre hek lo ang.

²⁰Hneh tura rorelna a tirh chhuah hma loh zawng luang sawp a titliak fithla lo ang a, la khu pawh a timit lo ang.

²¹Ama hming chu Jentaite chuan an beisei chhan ang, tia a sawi kha a lo thlen theihna turin.

²²Chu mi lai chuan, mitdel tawng thei lo ramhuai man pakhat a hnenah an rawn hruai a; tin, ani chuan a lo tidam a, chutichuan tawng thei lo chu a lo tawng theiin, a lo hmu thei ta a.

²³Tin, mipuiho zawng zawng chuan mak an ti hle a, he mi hi Davida fapa chu a ni lo'm ni? an ti a.

²⁴Nimahsela, Pharisaite'n chu chu an hriat veleh, he mi hian ramhuai lal Beelzebula vang lo chuan ramhuaite a hnawt chhuak lo ang, an ti a.

²⁵Tin, Isua'n an ngaihtuahte chu a lo hria a, an hnenah, Khawii ram pawh mahni indo apiang an boral thin; khawii khua pawh, chhung khat pawh, mahni indo apiang an ding khawchhuak lo ang.

²⁶Tin, Setana'n Setana vek a hnawh chhuah chuan mahni indo a ni ang a sin; a ram chu engtin nge a din chhuah ang le?

²⁷Tin, kei Beelzebula vanga ramhuaite hnawt chhuak thin ka lo nih chuan, in fate'n tu vangin nge an lo hnawh chhuah thin le? Chuvangin, anni chu nangmahni ngaihtuahtu turte an ni ang.

²⁸Amaherawhchu, kei Pathian Thlarau vanga ramhuaite hnawt chhuak thin ka nih chuan, Pathian ram in hnenah a lo thleng tawh a ni ang.

²⁹Chuti a nih si loh chuan, miin mi chak chu a phuar hmasak zet loh chuan, engtin nge mi chak ina lutin a sum a laksak theih ang? Chu mi hnuah erawh chuan a in chu a ramsak mai ang.

³⁰Tupawh ka lama tang lo chu, mi do a ni; tupawh mi lak khawmpui lo chuan, a tidarh a ni.

³¹Chuvangin, ka ti a che u, mi an sualna tinrengah leh an Pathian sawichhiatna tinrengah chuan, ngaihdam an ni ang: Thlarau meuh sawichhiatna erawh chu ngaihdamsak a ni lo ang.

³²Tin, tupawh mihring Fapa sawisel apiangte chu, an sawiselna chu ngaihdamsak a ni ang; tupawh Thlarau Thianghlim meuh sawisel apiang erawh chu, an sawiselna chu tun dam chhungah pawh, hun lo la thleng turah pawh ngaihdamsak a ni lo ang.

³³Thing chu a tha, a rah pawh a tha, in tih loh vek leh, thing chu a chhia, a rah pawh a chhia, ti law law rawh u; thing chu a rahah a hriat si a.

³⁴Rul thlahte u, nangni'n, sual reng chungin, engtin nge thu tha in sawi theih ang? Thinlunga khat liam chu kain a sawi thin a sin.

³⁵Mi tha chuan a ro bawm tha ata thil thate a theh chhuak thin a, mi sual chuan a ro bawk chhia ata thil chhiate a theh chhuak thin.

³⁶Tin, ka hrilh a che u, mite'n thu lawi lo an sawi apiang, chu thu chu Rorel niah chuan an sawi fiah a la tul ang.

³⁷I thu chuan thiam a chantir ang chia, i thu vek chuan thiam loh a chantir bawk dawn che a sin, a ti a.

³⁸Chu mi lai chuan lehkhaziaktute leh Pharisaite zinga mi tuten emaw an bia a, a hnenah, Zirtirtu, i hnen ata chhinchhiahna hmuh kan duh e, an ti a.

³⁹Ani erawh chuan an hnenah, Chhuan sual tak leh uire hmang takte chuan chhinchhiahna an zawng a, nimahsela, zawlnei Jona chhinchhiahna chauh lo chu, an hnenah chhinchhiahna reng reng pek a ni lo ang

⁴⁰Jona chu ni thum leh zan thum nghapui kawchhunga a awm ang khan, Mihring Fapa hi ni thum leh zan thum lei kawchhungah a awm bawk dawn a ni.

⁴¹Ninevi khuaa mite chu ngaihtuah hunah chuan, tun lai chhuante hnenah hian an ding ve ang a, thiam loh an chantir ang, Jona thu hrilh avangin an sim si a; ngai teh u, Jona aia ropui zawk hetah hian a awm a sin.

⁴²Chhim lam lalnu kha ngaihtuah hunah chuan, tun lai chhuante hnenah hian a tho ve ang a, thiam loh a chantir ang; Solomona fin ngaithla tur mahin kawlkil ata a lo kal si a; ngai teh u, Solomona aia ropui zawk hetah hian a awm a sin.

⁴³Tin, ramhuai bawlhhlawh chu mi kawchhung ata a chhuahin, chawlhna zawngin tui awm lohna hmunahte a vak a vak a, a hmu thin si lo a.

⁴⁴Tin, 'ka chhuahna inah khan ka kir leh mai ang,' a ti a; tin, a va thlen chuanin, ruak a, phiah fai a, cheimawiin a hmu a.

⁴⁵Chu veleh a va kal a, amah aia sual zawk ramhuai dang pasarih a rawn hruai a, chutah chuan an lut a, an awm reng thin a; chu mihringa awmze hnuhnung chu, a hmasa aiin a lo tha lo zawk thin a ni. Chutiang bawkin tun lai chhuan sual takte chungah hian a la awm ang, tiin a chhang a.

⁴⁶Mipuite hnena thu a la sawi lai chuan, ngai teh, a nu leh a unaute chu amah biak tumin pawnah an ding a.

⁴⁷Tin, mi pakhatin a hnenah, Ngai teh, i nu leh i unaute biak tum chein pawnah sawn an ding reng e, a ti a.

⁴⁸Ani erawh chuan a hrilhtu hnenah chuan, Ka nu chu tu nge ni? Ka unaute pawh chu tute nge ni? tiin a chhang a.

⁴⁹Tin, a zirtirte lamah a kut a phar a, En teh u, ka nu leh ka unaute hi!Tupawh ka Pa vana mi duhzawng ti apiang chu ka unaute, ka farnu te, ka nu te an ni a sin, a ti a.

⁵⁰Tupawh ka Pa vana mi duhzawng ti apiang chu ka unaute, ka farnu te, ka nu te an ni a sin, a ti a.