Read Baibul, Mizo Matthaia 14 Bible Online

Matthaia 14 - Baibul, Mizo bible

Matthaia 14

¹Chu mi lai tak chuan lal Heroda chuan Isua chanchin chu a lo hria a,

²a chhiahhlawhte hnenah, Chu chu Baptistu Johana kha a nih chu; mitthi zing ata a tho leh ta zuk nia; chuvangin chung thiltihtheihnate chuan amahah a thawk a nih chu, a ti a.

³Heroda chuan a unau Philipa nupui Herodi vangin Johana chu a man a, a phuar a, tan inah a lo khung tawh a ni;

⁴Johana chuan a hnenah, Ani i neih hi a thiang lo e, a tihsak avangin.

⁵Tin, Johana chu tihhlum a tumin mipui a hlau a, zawlneia an ruat avangin.

⁶Nimahsela, Heroda pian champhaphak ni chu a lo thlenin Herodi fanu chu a laiah a lam a, Heroda chu a tilawm ta a.

⁷Chu mi avang chuan a dil apiang pe turin chechhamin a tiam ta a.

⁸Tin, ani chuan a nu fuihin, hetah hian thlengin Baptistu Johana lu mi pe rawh, a ti a.

⁹Tin, lal chu a lungngai ta a; nimahsela a thutiamte leh a chaw kilpuite avang chuan pek tur thu a pe a,

¹⁰tichuan mi a tir a, tan ina Johana lu chu a tantir a.

¹¹Tin, a lu chu thlengin an rawn la a, hmeichhe naupang hnenah chuan an pe a; ani chuan a nu hnenah a kalpui ta a.

¹²Tin, zirtirte chuan a ruang chu an va hlawm a, an phum a; tin, Isua an va hrilh a.

¹³Tin, Isua'n chu chu a hriatin, chuta ta chu lawngin thlaler hmunah a kal hrang ta a. Nimahsela, mipuite chuan an hriat veleh khua atangte chuan kea kalin an zui ta a.

¹⁴Tichuan ani chu vaukama a chhuah chuan mipui tam tak a hmu a, a khawngaih em em a, an dam lote a tidam a.

¹⁵Tin, tlai lam a lo nihin zirtirte chu a hnenah an lo kal a, Hei hi thlaler hmun a ni a, khua pawh a lo tlai ta si a; khuaahte kalin an tan ei tur an lei theihna turin mipuite hi kaltir ta che, an ti a.

¹⁶Isua erawh chuan an hnenah, An kal bo a ngai lo e; nangmahni'n ei tur pe rawh u, a ti a

¹⁷Tin, anni chuan a hnenah, Hetah chhangper panga leh sangha pahnih chauh kan nei a ni, an ti a.

¹⁸Tin, ani chuan, Hetah ka hnenah han la rawh u, a ti a.

¹⁹Tin, hlobet chunga thu turin mipuite chu thu a pe a, chhangper panga leh sangha pahnih chu a la a, van lam enin mal a sawm a, a phel a, chhangperte chu zirtirte hnenah a pe a, tin, zirtirte chuan mipuite hnenah an pe a.

²⁰Tin, an vaiin an ei a, an puar ta hlawm a; an ei bang nawi pawh chu bawmrang sawm leh pahnih an rut khat a.

²¹A eitute chu, hmeichhia leh naupang tiam loin, patling hlir pawh sangnga lai an ni a.

²²Tin, mipuite chu a tintir vel chhungin, a kal hmaa ral lehlama lo kal hmasa turin, zirtirte chu lawngah a chuan luihtir ta nghal a.

²³Tin, mipuite chu a tintir hnuin, tawngtai turin tlangah chuan a han kal hrang a; tin, tlai lam a lo nihin chutah chuan amah chauhin a awm ta a.

²⁴Lawng erawh chu dil lai takah a awm tawh a; thliin a ni lozawngin a nem avangin tuifawnin a vawrh a vawrh ta a.

²⁵Tin, khawfing chah dawn laiin, dil chungah kea kalin an hnen lam a rawn pan a.

²⁶Tin, khawfing chah dawn laiin, dil chungah kea kalin an hnen lam a rawn pan a. Tin, zirtirte chuan amah chu dil chunga kea a kal an han hmuh chuan, Hmuithla a nih saw! tiin an thlaphang a, hlauin an au ta vak mai a.

²⁷Nimahsela, Isua'n anmahni a be ta nghal a, Thlamuang takin awm rawh u; keimah ka ni alawm; hlau suh u, a ti a.

²⁸Tin, Petera'n a chhang a, Lalpa, nang i nih chuan tui chunga i hnena lo kal thu mi pe rawh, a ti a.

²⁹Tin, ani chuan, Lo kal ta che, a ti a. Petera chu lawng ata a chhuk a, Isua hnen lam panin tui chungah chuan kein a kal a.

³⁰Nimahsela, thli tleh chu a hmuhin a hlau a; tin, a pil dawn a, Lalpa, mi chhandam rawh, tiin a au ta a.

³¹Tin, Isua'n a ban ta nghal a, amah chu a chelh a, a hnenah, Nang rin tlem, engah nge i rinhlelh le? a ti a.

³²Tin, lawnga an chuan chuan thli chu a bang ta mai a.

³³Tin, lawnga awmte chuan, Pathian Fapa i lo nih tak zet hi, tiin, amah chibai an buk a.

³⁴Tin, ral leh lam an kai chuan Gennesaret ram khawmual an thleng ta a.

³⁵Tin, chu mi hmuna mite chuan amah an hriat veleh, chu mi kiang vel ram zawng zawngah chuan mi an tir a, damlo zawng zawng chu a hnenah an rawn hruai a.Tin, a puan hmawr tal deh theih an dil chiam a; tin, a dek apiang chu an lo dam ta zel a.

³⁶Tin, a puan hmawr tal deh theih an dil chiam a; tin, a dek apiang chu an lo dam ta zel a.