Read Baibul, Mizo Matthaia 15 Bible Online

Matthaia 15 - Baibul, Mizo bible

Matthaia 15

¹Chu mi lai chuan, Jerusalem khua atangin Pharisaite leh lehkhaziaktute Isua hnenah an lo kal a,

²Engati nge i zirtirte'n upate thuro chhiah chu an bawhchhiat thin? Chhang an eiin an kut an sil ngai si lo a, an ti a.

³Tin, ani chuan an hnenah, Nangni pawhin engati nge in thurochhiah vanga Pathian thupek in bawhchhiat ni?

⁴Pathianin, 'I nu leh i pa chawimawi rawh,' 'Tupawh a nu emaw a pa emaw sawichhia apiang chu thi mawlh rawh se,' a ti si a.

⁵Nangni erawh chuan, 'Tupawh a nu emaw, a pa emaw hnena i mi chhawrna tur hi Pathian hnena pek a ni tawh, ti apiang chuan,

⁶a nu leh a pa a chawimawi tur a ni lo e,' in ti thin a. Tichuan, in thurochhiah avangin Pathian thu chu in bawh bo ta a nih hi.

⁷Vervekte u, Isaia hian in chungchang thu a lo hril lawk dik zet mai.

⁸'He miteho hian an kain mi chawimawi a, an thinlung erawh chuan mi hlat si a.'

⁹'Engpawh ni se la, an zirtirnaah mihring thupek an zirtir avangin An mi biak thin hi athlawn mai a ni,' tiin, a ti a, a chhang a.

¹⁰Tin, mipui chu a ko a, an hnenah, Ngaithla u la, lo ngai thiam rawh u;

¹¹Kaa lut chu mihring tibawlhhlawhtu a ni lo a; kaa chhuak chu, chu ngei chu mihring tibawlhhlawhtu a ni zawk e, a ti a.

¹²Chu mi lai chuan a zirtirte an lo kal a, a hnenah, Pharisaite'n kha thu kha an hriata an lung nih loh kha i hria em? an ti a.

¹³Ani erawh chuan, Kung zawng zawng ka Pa vana mi phun loh chu pawh chhuahin a awm ang.

¹⁴Anni chu pawisa suh u; hruaitu mitdel an ni. Tichuan, mitdelin mitdel vek a hruai chuan khuarkhurumah an tla dun ang, a ti a, a chhang a.

¹⁵Tin, Petera'n a hnenah, Tehkhin thu kha min hrilhfiah ta che, tiin a chhang a.

¹⁶Tin, ani chuan, Tun thlengin nangni pawh hriatna nei loin in la awm cheu maw?

¹⁷Kaa lut apiang chu pumah a tla thla a, dailennaa paih chhuahin a awm tih in hre lo'm ni?

¹⁸Kaa chhuakte erawh chu thinlungah a lo chhuak a ni; chung ngei chuan mihring a tibawlhhlawh thin a ni.

¹⁹Thinlungah hian ngaihtuahna sualte tualthahnate, uirenate, inngaihnate, rukruknate, heknate, sawichhiatnate a lo chhuak si thin a.

²⁰Chu'ng chu mihring tibawlhhlawhtu a ni; kut sil loa chaw ei erawh chuan mi a tibawlhhlawh lo e, a ti a.

²¹Tin, Isua chuta ta chu a chhuak a, Tura leh Sidon bialah a kal ta a.

²²Tin, ngai teh, chung ram ata chu Kanaan hmeichhe pakhat a lo chhuak a, Lalpa, Davida Fapa, mi khawngaih rawh; ka fanu ramhuaiin a man tlat a ni, tiin, a au a.

²³Ani eawh chuan kam khat mahin a chhang lo. Tin, a zirtirte chuan, Kan hnungah a au a au si a, kaltir mai ta che, tiin an rawn ngen a.

²⁴Ani erawh chuan, Israel hnam beram bo hnenah lo chuan tirh ka ni lo e, a ti a, a chhang a.

²⁵Nimahsela, hmeichhia chu a lo kal a, Lalpa, mi pui rawh a, tiin, chibai a buk a.

²⁶Tin, ani chuan, Fate chhang laksak a, uite hnena paih chu mawi lo e, a ti a, a chhang a.

²⁷Ani chuan, Lalpa, nih zawng a ni a; nimahsela, uite pawhin an pu dawhkan ata chhang nawi tla chu an ei thin alawm, a ti a.

²⁸Chu veleh Isua chuan a hnenah, Hmeichhia, i rin a nasa em mai; i duh ang takin i chungah awm rawh se, a ti a, a chhang a. Tichuan, a fanu chu, chu mi achinah chuan a lo dam ta mai a.

²⁹Tin, Isua chuta ta chu a kal a, Galili dil kiang a lo thleng a; tin, tlangah chuan a chho a, chutah chuan a thu ta a.

³⁰Tin, mipui tam tak, kebaite, mitdelte, tawng thei lote, piangsualte rawn hruaiin a hnenah an lo kal a, a ke bulah an dah a; tin, a lo tidam ta hlawm a.

³¹Chutichuan, mipui chuan tawng thei lote chu lo tawnga, piangsualte chu lo thaa, kebaite chu kea kala, mitdelte chu hmu theia an hmuhin mak an ti hle a; tichuan Israelte Pathian chu an fak ta a.

³²Tin, Isua'n a zirtirte chu a ko a, Mipuiho hi tunah ni thum ka hnenah an awm tawh a, ei tur engmah an neih loh avangin ka khawngaih em em a ni; chaw ngheiin ka kaltir duh lo e, chutilochuan kawng lakah an chau dah ang e, a ti a.

³³Tin, zirtirte chuan a hnenah, Mipui heti zozai puarna khawp chhangper chuti zozai thlalerah khawi ata nge kan hmuh ang? an ti a.

³⁴Tin, Isua'n an hnenah, Chhangper engzat nge in neih? a ti a. Tin, anni chuan Per sarih, nghate tlemte nen, an ti a.

³⁵Tin, ani chuan leia thu turin mipui chu thu a pe a.

³⁶Tin, chhangper pasarih leh sanghate chu a la a, lawm thu a sawi a, a phel a, zirtirte hnenah a pe a, tin, zirtirte chuan mipuite hnenah an pe a.

³⁷Tin, an vaiin an ei a, an puar ta hlawm a; an ei bang nawi pawh chu bawm sarih an rut khat a.

³⁸A eitute chu, hmeichhia leh naupang tiam loin, patling hlir pawh sangli an ni a.Tin, mipuite chu a tintir hnuin lawngah a chuang a, Magadan ram a lo thleng a.

³⁹Tin, mipuite chu a tintir hnuin lawngah a chuang a, Magadan ram a lo thleng a.