Read Baibul, Mizo Matthaia 18 Bible Online

Matthaia 18 - Baibul, Mizo bible

Matthaia 18

¹Chu mi lai tak chuan zirtirte chu Isua hnenah an lo kal a, Van ramah tu nge ropui ber ang le? an ti a.

²Tin, ani chuan naupang te a ko a, an zingah a dintir a.

³Tih tak meuhin ka ti a che u, in lamlet a, naupang te ang in lo nih loh chuan, van ramah in lut tawp lo ang.

⁴Chutichuan, tupawh he naupang te anga inngaitlawm apiang, chu mi chu van ramah chuan a ropui ber ang.

⁵Tin, tupawh ka hming avanga hetiang naupang te pakhat lawm apiang chu keimah mi lawm an ni ang.

⁶Amaherawhchu, tupawh he'ng mi ringtu mi tete zinga pakhat pawh titlu apiang chu, an nghawngah buh rawt sawmna lung lianpui awrhtirin tuifinriat thuk laiah thlak daih se la an tan a sawt zawk ang.

⁷Tluknate avangin khawvel chung a pik e! Tluknate chu lo awm tur reng zawng a ni a; nimahsela tlukna awmtirtu chung chu a pik e!

⁸Tin, i kutin emaw, i kein emaw a tihtluk che chuan, tan la, paih daih rawh; kut pahnih emaw, ke pahnih emaw neia kumkhaw meia paih ai chuan, piangsualin emaw, kebaiin emaw nunnaa luh i tan a tha zawk e.

⁹Tin, i mitin a tihtluk che chuan kher chhuak la, paih daih rawh; mit khing hnih neia Gehenna meia paih ai chuan, mi khing khat neia nunnaa luh i tan a tha zawk e.

¹⁰Heng mi tete zinga pakhat pawh hi hmusit lo turin fimkhur rawh u; an vantirhkohte'n vanah ka Pa vana mi hmel chu an hmu fo thin tih, ka hrilh che u hi.

¹¹Boralte chhamdam turin mihring fapa hi a lo kal a ni reng a ni.

¹²Engtin nge in ngaih? Mi tupawhin beram za nei se la, an zinga pakhat vak bo se la, sawmkua leh pakuate chu hnutchhiah a, tlanga han kalin, a bo chu a zawng lo ang em ni?

¹³Tih tak meuhin ka hrilh a che u, a hmuh leh hlauh chuan, sawmkua leh pakua vak bo lote chungah ai chuan, a chungah a lawm zawk ang.

¹⁴Chutiang bawkin he'ng mi tete zinga pakhat boral pawh hi in Pa vana mi duhzawng a ni lo e.

¹⁵Tin, i unauin i chungah thil tisual se la, kal la, amah leh nangmah chauha hriatah a sualnaah chuan zilh ang che; a ngaihthlak che chuan i unau chu i hneh a ni tawh ang.

¹⁶A ngaihthlak loh che erawh chuan, mi dang pakhat emaw pahnih emaw i hnenah hruai ang che, chutichuan thu tinreng chu hretu pahnih emaw, pathum emaw kaa tihngheha a awm theihna'n.

¹⁷Tin, anni pawh chu a ngaihthlak duh loh chuan kohhranho hnenah thlen ang che; tin, kohhranho pawh a ngaihthlak duh loh chuan, ani chu i tan Jentail leh chhiahkhawntu ang ni rawh se.

¹⁸Tih tak meuhin ka hrilh a che u, lei chungah engpawh in phuar apiang, vanah phuar a ni ang a; lei chungh engpawh in phelh apiang, vanah phelh a ni ang.

¹⁹Tih tak meuhin ka hrilh leh a che u, lei chungah hian in zinga mi pahnih an thil dil kawnga an thurual chuan, ka Pa vana mi tihsakin an awm ang.

²⁰Mi pahnih emaw pathum emaw ka hminga an inkhawmna apiangah chuan an zingah ka awm si thin a, a ti a.

²¹Chu mi lai chuan Petera a lo kal a, a hnenah, Lalpa, ka unauin vawi engzat nge ka chungah thil tisual se la ka ngaihdam tur? Vawi sarih thlengin em ni ang? a ti a.

²²Isua'n a hnenah, 'Vawi sarih thlengin,' ka ti lo va che. 'Vawi sarih hmun sawmsarih thlengin,' ka ti zawk che a ni.

²³Chu mi avang chuan, van ram chu, lal ber tu emaw a bawihte hnena sum chanchin tihfel tum nen chuan, tehkhin a ni.

²⁴Tin, a han tihfel tan chuan mi pakhat talent singkhat ba, a hnenah an rawn hruai a.

²⁵Tin, pek tur a neih loha vangin, a pu chuan, amah nen, a nupui nen, a fate nen, a neih zawng zawng nen hralha rulh tur thu a pe a.

²⁶Chutichuan bawih chuan, 'Ka pu, ka chungah zahngai rih la, a zain ka pe vek ang che,' tiin bawkkhupin chibai a buk a.

²⁷Tichuan chu bawiha pu chuan a khawngaih ta em em a, a thlah a, a bat chu a ngaidam ta a.

²⁸Nimahsela, chu bawih chu a kal chhuak a, a bawihpuite zinga pakhat a duli za ba a va hmu a; tin, a man a, 'I bat kha mi pe rawh,' tiin, a hrawkah a rek a.

²⁹Chutichuan a bawihpui chu a bawkkhup a, 'Ka chungah zahngai rih la, ka la pe ang che,' tiin a ngen chiam a.

³⁰Nimahsela, a duh lo a; a bat chu a tlak hma loh zawng tan inah a va khung ta a.

³¹Chutichuan, a bawihpuite chuan a thiltih chu an hmuhin, an lungngai em em a, a thiltih zawng zawng chu an pu an va hrilh ta a.

³²Chu veleh a pu chuan a ni chu a ko a, a hnenah, 'Bawih sual, mi dil chiam avang khan i bat zawng zawng kha ka ngaidam che a ni a.

³³'Ka khawngaih che ang khan nang pawhin i bawihpui chu i khawngaih ve tur a ni lo'm ni?' a ti a.

³⁴Tin, a pu chu a thinur ta a, a bat zawng zawng a tlak hma loh zawng nghaisatute hnenah a pe ta a.Mi tinin thinlung taka in unaute inngaihdam loh chuan ka Pa vana mi pawhin chutiang bawkin in chungah a ti ve ang, a ti a.

³⁵Mi tinin thinlung taka in unaute inngaihdam loh chuan ka Pa vana mi pawhin chutiang bawkin in chungah a ti ve ang, a ti a.