Read Baibul, Mizo Matthaia 19 Bible Online

Matthaia 19 - Baibul, Mizo bible

Matthaia 19

¹Tin, heti hi a ni a, Isua'n chung thu chu a sawi zawh veleh, Galili ram ata a chhuak a, Jordan lui rala Judai ramah chuan a va kal a.

²Tin, mipui tam takin an zui a; chutah chuan anmahni chu a tidam ta a.

³Tin, Pharisaite a hnenah an lo kal a, amah fiahna'n, Eng vang pawhin miin a nupui mak a thiang em? an ti a.

⁴Tin, ani chuan, A tir ata an siamtu khan hmeichhia leh mipaa a siam leh,

⁵'He mi avang hian mipain a nu leh a pa a kalsan ang a, a nupui a vuan ang; tichuan an pahnih chuan tisa pum khat an lo ni tawh ang,' a ti tih in chhiar lo em ni?

⁶Chutichuan pahnih an ni tawh lo a, tisa pumkhat an ni tawh zawk a ni. Chuvangin Pathianin a zawm tawh chu mihringin then suh se, a ti a, a chhang a.

⁷Anni chuan a hnenah, A nih leh, engati nge Mosia'n inmakna lehkha peka mak tur thu a pek si? an ti a.

⁸Ani chuan an hnenah, Mosia'n in thinlung khauha vangin a sin in nupuite mak a phal ni; nimahsela a tir ata chutiang a ni si lo.

⁹Kei chuan ka ti a che u, 'Tupawh tlangval ngaih vang ni lo a, nupui maa mi dang nei apiang chu, a uire a ni; mak hnu nei apiang pawh a uire a ni, a ti a.

¹⁰Zirtirte chuan a hnenah, Nupui kawngah mipa thu chutiang a nih si chuan inneih hi a tha lo e, an ti a.

¹¹Ani erawh chuan an hnenah, Chu thu chu mi nazawngin an pawm thei lo e, a pekate chauh lo chuan.

¹²Mi tilreh, an nu pum chhung ata chutianga piang rengte an awm a; mi tilreh, mihring kuta rehte an awm bawk a; mi tilreh, van ram avanga tilreha insiam chawpte an awm bawk a. Tupawh a pawm thei apiangin pawm rawh se, a ti a.

¹³Chu mi lai chuan a chunga a kut a nghaha a tawngtaisak turin, a hnenah naupang tete an rawn hruai a; tin, zirtirte chuan an lo hau a.

¹⁴Isua erawh chuan, Naupang tete ka hnenah han kaltir u la, hnar suh u; van ram chu hetiang mite ta a ni si a, a ti a.

¹⁵Tin, an chungah a kut a nghat a, chuta ta chu a kal ta a.

¹⁶Tin, mi pakhat a hnenah a lo kal a, Zirtirtu, chatuana nunna ka neih theihna'n thil tha eng nge ka tih ang? a ti a.

¹⁷Tin, ani chun a hnenah, Thil tha thu engah nge mi zawh? Tha chu pakhat chauh a awm; engpawh ni se la, nunnaa luh i duh chuan thupekte chu zawm rawh, a ti a.

¹⁸Tin, ani chuan a hnenah, A eng ber hi maw? a ti a. Tin, Isua'n, Tual i that tur a ni lo; i uire tur a ni lo; i ru tur a ni lo; Dawtin i hek tur a ni lo.

¹⁹I nu leh i pa chawimawi rawh,' tihte leh, 'Nangmah i inhmangaih angin i vengte i hmangaih tur a ni,' tih hi, a ti a.

²⁰Tlangval chuan a hnenah, Chu'ng thu zawng zawng chu ka zawm thin; eng nge ka la bak? a ti a.

²¹Isua'n a hnenah, Tha famkima awm i duh chuan, kal la, i neih chu hralh la, pachhiate hnenah pe rawh, chutichuan vanah ro i nei ang; tin, lo kal la, mi zui ang che, a ti a.

²²Tlangval erawh chuan chu thu chu a hriatin lungngai takin a kal bo ta a, sum tam tak nei mi a niha vangin.

²³Tin, Isua'n a zirtirte hnenah chuan, Tih tak meuhin ka hrilh a che u, mi hausa tan van rama luh chu harsa tak a ni.

²⁴Tin, ka hrilh leh a che u, mi hausa Pathian rama luh aiin sanghawngsei hriau benga luh tlang a awl zawk, a ti a.

²⁵Tin, zirtirte'n chu chu an hriat chuan mak an ti nasa em em a, tu nge chhandam ni thei ang le? an ti a.

²⁶Tin, Isua'n anni chu a en a, an hnenah, Chu chu mihring tan tih rual a ni lo a; Pathian nen erawh chuan engkim tih theih a ni, a ti a.

²⁷Tin, Petera'n a hnenah, Ngai teh, keini'n engkim kalsanin kan zui ta chia; eng nge kan hmuh ang le? a ti a, a zawt a.

²⁸Tin, Isua'n a hnenah, Tih tak meuhin ka hrilh a che u, Siamtharnaah chuan, Mihring Fapa a ropuina thutphata a thut hunah, nangni mi zuituteho hi, Israel hnam sawm leh hnam hnihte chu ngaihtuahin, lalthutphah sawm leh pahnihah in la thu ve ang.

²⁹Tin, mi tin inte emaw, unaute emaw, farnute emaw, pa emaw, nu emaw, fate emaw, ramte emaw ka hming avanga kalsan apiang chuan a leh za an hmu ang a, chatuana nunna an la chang bawk ang.Nimahsela, mi tam tak, hmasa bera awmte chu, hnuhnung berah an la awm ang a; hnuhnung berte pawh hmasa berah an la awm ang.

³⁰Nimahsela, mi tam tak, hmasa bera awmte chu, hnuhnung berah an la awm ang a; hnuhnung berte pawh hmasa berah an la awm ang.