Read Baibul, Mizo Matthaia 2 Bible Online

Matthaia 2 - Baibul, Mizo bible

Matthaia 2

¹Tin, lal Heroda a lal laia Judai rama Bethlehem khuaa Isua a lo pianin khaw chhak lam ata mi fingte Jerusalem khuaah an lo kal a.

²Khawiah nge Judate lal lo piang chu? Khaw chhak lamah a arsi kan hmu a, amah chibai buk turin kan lo kal a ni, an ti a.

³Tin, lal Heroda chuan chu chu a hriat veleh a mangang ta a, Jerusalem-a mi zawng zawng pawh an mangang ve a.

⁴Tichuan, puithiam lalte leh lehkha ziaktute zawng zawng a ko khawm a. Krista pianna tur chu a zawt a.

⁵Tin, anni chuan a hnenah Judai rama Bethlehem khuaah heti hian zawlneiin a ziak kha an ti a.

⁶Nang, Bethlehem, Judai rama mi, Judai khawpuite zingah i te ber tawp lo! I chhung atangin awptu a lo chhuak dawn si a, ka mi Israelhote vengtu tur chu, tih hi.

⁷Chu mi hnuah chuan Heroda'n a rukin mi fingte chu a ko a, dilchhut takin arsi lan lai chu a zawt chhuak a.

⁸Tin, anni chu Bethlehem khuaah a kaltir a. Kal ta u la, naute thu chu dilchhut takin zawt chhuak rawh u; tin, kei pawhin amah chu chibai ka rawn buk ve theihna'n in hmuh veleh mi rawn hrilh ang che u, a ti a.

⁹Tin, lal thu chu an hria a, an kal ta a; tin, ngai teh, khaw chhak lama arsi an hmuh kha, naute awmna chung zawn a thlena a din hma loh zawng, an hmaah a kal zel a.

¹⁰Tin, arsi chu an hmuhin an hlim nasa em em a.

¹¹Tin, in chhungah an va lut a, a nu Mari hnena naute chu an hmu a, an bawkkhup a, chibai an buk a; tin, an ro bawmte an hawng a, a hnenah chuan lawman - rangkachak te, beraw te, murra te - an pe a.

¹²Tin, Heroda hnenah kir leh lo turin an manga hrilha an awma vangin, anmahni khaw lamah kawng dangah an haw ta a.

¹³Tin, an hawn hnuin ngai teh, Lalpa vantirhkoh Josefa hnenah a mangah a inlar a. Tho la, naute leh a nu hruai la, Aigupta ramah tlan bo rawh, ka hrilh leh hma loh che zawng chutah chuan awm reng ang che; Heroda'n naute tiboral turin a zawng dawn a ni, a ti a.

¹⁴Tichuan, a tho a, a zan a zanin naute leh a nu chu a hruai a, Aigupta ramah a kal ta a.

¹⁵Heroda thih hma loh zawng chutah chuan a awm reng a; Lalpa'n zawlnei kaah, ka fapa chu Aigupta ram atang ka ko chhuak a, tia a sawi kha a lo thlen theihna'n.

¹⁶Chutih lai chuan Heroda'n, mi fingte tihder a nih a inhriat veleh a thinur em em a, mi a tir a, a hun lai tak thu dilchhut taka mi fingte a zawh chhuah ang khan Bethlehem khua leh a vel zawng zawnga mipa naupang kum hnih chin hnuai lam chu an zain a that ta vek a.

¹⁷Chutih lai chuan zawlnei Jeremia sawi kha a lo thleng ta.

¹⁸Rama khuaah thawm an hria, tap te, mitthi ngaia chiau vawng vawng te; Rakili chuan a fate a tah a, an awm tawh loha vangin a thlamuan theih loh.

¹⁹Tichuan, Heroda thih hnuin Lalpa vantirhkoh chu Aigupta rama awm Josefa mangah a inlar a.

²⁰Tho la, naute leh a nu hruai la, Israel ramah haw rawh: naute thah tumte kha an thi tawh e, a ti a.

²¹Tichuan, a tho a, naute leh a nu chu a hruai a, Israel ramah a lut ta a.

²²Nimahsela, Arkeulasa a pa Heroda ai awhin Judai ramah a lal tih a hriatin chuta kal a hlau ta a; tin, a manga hrilha a awm angin Galili lamah a kal ta daih a.Khaw pakhat Nazaret an tihah chuan a va awm ta a: Ani chu 'Nazaret mi' an ti ang, tia, zawlneite sawi kha a lo thlen theihna'n.

²³Khaw pakhat Nazaret an tihah chuan a va awm ta a: Ani chu 'Nazaret mi' an ti ang, tia, zawlneite sawi kha a lo thlen theihna'n.