Read Baibul, Mizo Matthaia 22 Bible Online

Matthaia 22 - Baibul, Mizo bible

Matthaia 22

¹Tin, Isua'n anmahni a bia a, an hnenah tehkhin thuin a sawi leh a.

²Van ram chu lal tuemaw a fapa tana lawi chaw siam nen chuan tehkhin a ni.

³Tin, lawi chaw eia a sawmte chu ko turin a bawihte a tir a, nimahsela an lo kal duh lo a.

⁴Tin, ani chuan, 'Ka sawmte hnenah, Ngai teh u, ka ruai chu ka peih ta; ka sebawngpate leh ka ran chawm thaute ka talh a, engkim peih a ni ta e; lawi chaw ei turin lo kal tawh rawh u, ti rawh u,' tiin bawih dangte a tir leh a.

⁵Nimahsela, an lo ngaihsak lo a, an kal ta mai a, pakhat chu a loah a kal a, pakhat chu a sumdawnnaah.

⁶Mi dangte chuan a bawihte chu an man a, zahthlak takin an siam a, an tihlum ta mai a.

⁷Chutichuan, lal chu a thinur ta a; a sipaihote a tir a, chu'ng tualthattute chu a tiboral a, an khua pawh a halsak ta a.

⁸Tin, a bawihte hnenah chuan, 'Lawi chaw peih a ni ta, ka sawmte erawh kha chu ei tlak an ni lo.

⁹Chutichuan, kawng peng thuamahte kal u la, mi in hmuh apiang lawi chaw ei turin sawm rawh u,' a ti a.

¹⁰Tichuan, chung bawihte chu an chhuak a, kawngahte chuan an va kal a, an hmuh apiang mi sual leh mi thate pawh an hruai khawm ta vek a; tichuan lawi chaw pindan chu mi sawmtein an lo khat ta a.

¹¹Nimahsela, lal chu mi sawmte en tura a lo luh chuanin, inneihna puan sin lo mi pakhat chutah chuan a hmu a.

¹²Tichuan, a hnenah, 'Thiana, eng tizia nge ni inneihna puan loin hetah i lo luh le?' a ti a. Tin, ani chu a ngawi reng a.

¹³Tin, lal chuan a bawihte hnenah, 'A kut leh a ke phuar u la, pawn lam thimah paih chhuak rawh u; chutah chuan tah leh ha thial a awm ang,' a ti a.

¹⁴Sawmte chu tam tak an ni a, thlante erawh chu tlemte an ni, a ti a.

¹⁵Chu mi lai chuan Pharisaite chuan a thu sawia an man theihnazia tur an va inrawn a.

¹⁶Tin, an zirtirte, Heroda pawla mite nen, a hnenah an tir a, chu mite chuan, Zirtirtu, mi dik tak i ni a, tih tak zetin Pathian kawng thu i zirtir thin a, pawisak chuan tumah i nei lo tih kan hria e; tumah thlei bik i nei si lo a.

¹⁷Chutichuan, engtin nge i ngaih? Min hrilh teh khai! Kaisara hnena chhiah chawi hi a thiang nge thiang lo? an ti a.

¹⁸Nimahsela, Isua'n an sualzia chu a lo hria a, Vervekte u, engah nge mi fiah?

¹⁹Chhiah tangka chu mi entir rawh u, a ti a. Tin, a hnenah duli an rawn la a.

²⁰Tin, ani chuan an hnenah, Hei hi tu lem leh tu hming nge ni? a ti a.

²¹Anni chuan a hnenah, Kaisara, an ti a. Tin, ani chuan an hnenah, A nih ahnu, Kaisara thilte chu Kaisara hnenah pe u la, Pathian thilte chu Pathian hnenah pe ta che u, a ti a.

²²Chu'ng thu chu an hriatin mak an ti hle a, amah chu an kalsan a, an kal ta daih a.

²³Chu mi ni vek chuan Saddukaiho, thawhlehna a awm lo tite chu a hnenah an lo kal a.

²⁴Zirtirtu, Mosia'n, 'Mi, fa nei loin thi se la, a unaupain a nupui chu neiin a unaupa tan chi a thlahsak tur a ni,' a ti a.

²⁵Aw le, kan zingah sal sarih an awm a; a upa berin nupui a nei a, a thi a, tin, chi a thlah loh avangin a nupui chu a unaupa rochun turin a hnutchhiah a.

²⁶Chutiang bawkin pahnihna chuan a ti a, pathumna chuan a ti bawk a, pasarihna thlengin an ti theuh a.

²⁷Tin, an zaa an thih hnuah chuan hmeichhia pawh chu a thi ta a.

²⁸Chutichuan, thawh leh hunah chuan an pasarihte zingah tu nupui ber nge ni ang? an zain an nei theuh si a, tiin an zawt a.

²⁹Isua'n an hnenah, Pathian Lehkha Thu leh Pathian thiltihtheihna inhriat loh avangin in ngai sual thin a ni.

³⁰Thawhlehnaah chuan nupui pasal an innei dawn tawh lo a, vana vantirhkohte ang an ni dawn zawk a sin.

³¹Tin, mitthi thawhlehna thu chu - Pathianin, 'Kei Abrahama Pathian, Isaaka Pathian, Jakoba Pathian ka ni,' tia in hnena a sawi kha in chhiar lo vem ni?

³²Pathian chu mitthi Pathian a ni lo a, mi nung Pathian a ni zawk, a ti a, a chhang a.

³³Tin, mipuite chuan chu chu an hriatin a thu zirtir chu mak an ti hle a.

³⁴Pharisaite erawh chuan Isua'n Saddukaite chu a hnial dang tih an hriatin an inkhawm ta a.

³⁵Tin, an zinga mi pakhat, dan hretuin,

³⁶Zirtirtu, Dan thuah chuan eng thupek hi nge ropui ber? tiin amah fiahna'n thu a zawt a.

³⁷Tin, ani chuan a hnenah, Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni,' tih hi.

³⁸Chu chu thu pek ropui leh pawimawh ber a ni.

³⁹Tin, a dawttu, a anpui chu hei hi a ni, 'Nangmah i inhmangaih angin i vengte pawh i hmangaih tur a ni,' tih hi.

⁴⁰Chu'ng thupek pahnihah chuan dan thu leh zawlneite thu zawng zawng a inkhaikhawm vek a ni, a ti a.

⁴¹Tin, Pharisaite chu an inkhawm lai chuan, Isua'n anmahni chu thu a zawt a.

⁴²Krista chu engtin nge in ngaih? Tu fapa nge ni? a ti a. Anni chuan a hnenah, Davida fapa, an ti a.

⁴³Ani chuan an hnenah, Davida'n,

⁴⁴'Lalpa chuan, ka Lalpa hnenah, i hmelmate i kephah hnuaia ka dah hma loh zawng Ka ding lamah thu rawh, a ti,' tiin, eng tiziain nge Thlarauin ani chu 'Lalpa' a tih le?

⁴⁵Davida'n ani chu 'Lalpa' a tih si chuan, engtin nge a fapa a nih theih? a ti a.Tin, tuma'n kam khat mahin an chhang thei lo a, chu mi ni achin chu tuma'n thu dang reng reng an zawt ngam tawh hek lo.

⁴⁶Tin, tuma'n kam khat mahin an chhang thei lo a, chu mi ni achin chu tuma'n thu dang reng reng an zawt ngam tawh hek lo.