Read Baibul, Mizo Matthaia 23 Bible Online

Matthaia 23 - Baibul, Mizo bible

Matthaia 23

¹Tin, Isua'n mipuite leh a zirtirte hnenah thu a sawi a.

²Lehkhaziaktute leh Pharisaite chu Mosia thutphahah chuan an thu thin a.

³Chuvangin an hrilh apiang che u chu ti u la, zawm zel ang che u; an thiltih ang erawh chu ti ve suh ang che u, sawi zawng an sawi thin a, an ti si thin lo a ni.

⁴Phur rit hrehawm takte an siam a, mite an bel thin a, anmahni erawh chuan an kut zungtang pawhin an tisawn duh lo.

⁵An thiltih zawng zawng chu mihring hmuha tan a ni, an tih zawk thin ni, an thil bun leh khimte chu an tihlai a, an puan hmawr fem an tibuk thin a.

⁶Ruaithehnaah hmun tha ber te, inkhawmna inah thutphah tha ber te,

⁷dawr hmuna chibai buk te, miten 'Rabbi' an tih te an ngaina si thin a.

⁸Nangni erawh chu 'Rabbi' tihin awm suh u; in zirtirtu chu pakhat chauh a ni a, nangni zawng zawng chu unau in ni si a.

⁹Tin, lei chungah hian tumah 'Ka pa' ti suh u; in Pa chu pakhat chauh a ni, vana mi khi.

¹⁰'Hruaitute' tihin awm hek suh u, in hruaitu chu pakhat chauh a ni, Krista chu.

¹¹In zinga ropui ber chu in rawngbawltuah a awm zawk tur a ni.

¹²Tupawh inngaihlu apiang an tlawm ang a, tupawh inngaitlawm apiang chawimawiin an awm ang.

¹³Nimahsela nangni lehkhaziaktu leh Pharisai vervekte u, in chung a pik e! Van ram kawng chu mite in kharsak si thin.

¹⁴Nangni lah in lut si lo a, mi lut turte pawh luh in phal thin hek lo.

¹⁵Nangni lehkhaziaktu leh Pharisai vervekte u, in chung a pik e! Saphun pakhat pawh siam turin tuifinriat leh khawmual in kal hual si a, tin, chutianga a lo awm veleh ani chu nangmahni leh hnihin Gehena fapaah in siam thin.

¹⁶Nangni, hruaitu mitdel, 'Tupawh Pathian biak in chhala chhechham apiang, chu chu engmah a ni lo; tupawh Pathian biak ina rangkachak chhala chhechham apiang erawh chuan hlen tur a ni,' tite u, in chung a pik e!

¹⁷Nangni mi a, mitdelte u! A eng nge ropui zawk, rangkachak nge, Pathian biak in, rangkachak tithianghlimtu chu?

¹⁸Tin, 'Tupawh maicham chhala chhechham apiang, engmah a ni lo; a chunga thilpek awm chhala chhechham apiang erawh chuan hlen tur a ni' in ti.

¹⁹Nangni mitdelte u! A eng nge ropui zawk, thilpek nge, maicham, thilpek tithianghlimtu chu?

²⁰Chutichuan, tupawh maicham chhala chhechham apiang chuan maicham leh a chunga awm zawng zawng chhalin chhia a chham thin.

²¹Tupawh Pathian biak in chhala chhechham apiang chuan, Pathian biak in leh a chhunga cheng chu chhalin chhia a chham thin.

²²Tupawh van chhala chhechham apiang chuan, Pathian thutphah leh a chunga thu chhalin chhia a chham thin.

²³Nangni lehkhaziaktu leh Pharisai vervekte u, in chung a pik e! Pudina te, mohuri te, zira te chu sawmah pakhat in pe thin a, dan thu pawimawh zawk - felna te, khawngaihna te, rinawmna te chu - in ngaihthah si thin; nimahsela, chung chu a sin in tih tur ni, a dangte chu tih thulh chuang loin.

²⁴Nangni hruaitu mitdel, thosi thlifaia sanghawngsei lem si thinte u!

²⁵Lehkhaziaktu leh Pharisai vervekte u, in chung a pik e! No leh thleng pawn lam in silfai a, a chhung erawh chu hleprukna leh insum lohnain a khat si a.

²⁶Nang Pharisai mitdel, no leh thleng chhung lam chu silfai hmasa rawh, a pawn lam pawh a lo fai theihna turin.

²⁷Lehkhaziaktu leh Pharisai vervekte u, in chung a pik e! Thlan hnawih var, pawn lam mawi taka lang, a chhung lam erawh chu mitthi ruhte leh bawlhhlawh tinrenga khat angte chu in ni a sin.

²⁸Nangni pawh chutiang takin pawnlamah chuan mihring mithmuhin fel takin in lang thin a, in chhung lamah erawh chuan vervekna leh sualnain in khat si a.

²⁹Nangni lehkhaziaktu leh Pharisai vervekte u, in chung a pik e! Zawlneiho thlan inte in sa a, mi fel thlante pawh in cheimawi a.

³⁰Kan pute dam lai khan lo awm ve mah i la, zawlneite thisen an chhuahnaah chuan kan tel ve lo ang,' in ti thin.

³¹Chutichuan, zawlneiho thattute fa in ni tih in inhriattir a ni.

³²In pute tehkhawng chu tikhat nghal mai rawh u.

³³Rulte u, rul thlahte u, Gehenna rorelna chu engtin nge in pumpelh theih ang?

³⁴Ngai teh u, chu mi avang chuan in hnenah zawlneite, mi fingte, lehkhaziaktute ka rawn tir dawn; thenkhat in tihlum ang a, kraws-ah in khengbet ang, thenkhat in inkhawmna inahte savunhruiin in vua ang a, khaw tinah in tiduhdah zui zel ang.

³⁵Chutichuan, Abela mi fel tak thisen atangin, Pathian biak in leh maicham inkara Barakia fapa Zakaria in thaha thisen thleng khan, lei chunga mi fel thisen an chhuah zawng zawng chu nangmahni chungah a lo la thleng thei ang.

³⁶Tih tak meuhin ka hrilh a che u, chung zawng zawng chu tun lai chhuante chung hian a lo la thleng ang.

³⁷Aw Jerusalem, Jerusalem! Zawlneiho thattu, i hnena an rawn tirhte lunga lo denghlumtu, arpuiin a note a thla hnuaia a awp khawm angin i fate vawi engzat nge awp khawm ka tum kha! Nimahsela in duh si lo.

³⁸En teh u, in in chu a ruaka hnutchhiah che u in a awm ta.Ka hrilh a che u, 'Lalpa hminga lo kal chu fakin awm rawh se,' in tih hma loh chuan, tun achinah mi hmu leh dawn tawh lo a nih hi, a ti a.

³⁹Ka hrilh a che u, 'Lalpa hminga lo kal chu fakin awm rawh se,' in tih hma loh chuan, tun achinah mi hmu leh dawn tawh lo a nih hi, a ti a.