Read Baibul, Mizo Matthaia 26 Bible Online

Matthaia 26 - Baibul, Mizo bible

Matthaia 26

¹Tin, heti hi a ni a, Isua'n chung thu zawng zawng chu a sawi zawin a zirtirte hnenah,

²Ni hnih achinah Kalhlen Kut a lo awm dawn tih in hria a, Mihring Fapa hi khenbeh turin an mantir dawn a ni, a ti a.

³Chu mi lai chuan Puithiam Lalber Kaiapha an tiha in hual chhung kawtlaiah chuan puithiam lalte leh vantlang upate chu an inkhawm a.

⁴Isua chu ngamthlema man a, an tihhlum theihna turin an inrawn a.

⁵Nimahsela, Kut chhung chuan ni suh se, chutilochuan vantlang zingah buaina a lo awm dah ang e, an ti a.

⁶Tin, Isua Bethani khuaah, phar Simona inah chuan a awm laiin,

⁷hmeichhe pakhat alabasta bawma hriak rimtui to tak kengin, a hnenah a lo kal a, a chaw kil laiin a luah a leih a.

⁸Nimahsela, zirtirte chuan chu chu an hmuhin an thinur a, Enga tan nge hetia a tihboral mai mai ni?

⁹He hriak hi man tam taka hralh a, mi retheite hnenah pek theih a ni si a, an ti a.

¹⁰Isua erawh chuan chu chu a hriatin an hnenah, Hmeichhia hi engah nge in tihbuai ni? ka chungah hian thil tha tak a ti a ni.

¹¹Mi retheite chu kumkhuaa inhnena awm an ni alawm, kei erawh chu kumkhuaa in hnena awm tur ka ni lo.

¹²He hriak rimtui ka taksaa a leih hi, phum tura mi buatsaih turin a ti a nih hi.

¹³Tih tak meuhin ka hrilh a che u, khawvel zawng zawngah khawiah pawh he Chanchin Tha hi an hrilna apiangah he hmeichhe thiltih pawh hi amah hriat rengna turin an sawi ve zel ang, a ti a.

¹⁴Chu mi hnuah chuan sawm leh pahnihte zinga mi pakhat, Juda Iskariota an tiha chu, puithiam lalte hnenah a kal a.

¹⁵Amah chu ka mantir ang che u a, eng nge min pek ang? a ti a. Tin, tangka sawmthum an buksak ta a.

¹⁶Chu mi chinah chuan mantirna remchang a zawng ta a.

¹⁷Tin, chhang dawidim telh loh ni, ni hmasa berah chuan zirtirte chu Isua hnenah an lo kal a, Kalhlen Kut chaw eina turin khawiah nge buatsaihsak che i la i duh? an ti a.

¹⁸Tin, ani chuan, Khawpuiah tuemaw hnenah kal u la, a hnenah, 'Zirtirtu chuan, Ka hun a hnai ta a; ka zirtirte nen Kalhlen Kut i inah kan kut ang e, a ti e,' va ti ang che u, a ti a.

¹⁹Tin, Isua'n an hnena a tih angin zirtirte chuan an ti a; Kalhlen Kut chaw chu an buatsaih ta a.

²⁰Tin, khua a lo tlai lam chuan zirtir sawm leh pahnihte nen chaw an kil a.

²¹Tin, an ei laiin ani chuan, Tih tak meuhin ka hrilh a che u, in zinga mi pakhat hian mi mantir ang, a ti a.

²²Tin, an lungngai ta em em a, a hnenah, Lalpa, keimah em ni? an ti ta theuh a.

²³Tin, ani chuan, Thleng mi zenpuitu ngei chuan mi mantir ang.

²⁴Mihring Fapa hi a chanchin an ziak ang tak khan a kal dawn a ni; nimahsela Mihring Fapa mantirtu tur mihring chung chu a pik e! Chu mihring chu piang suh sela a tan a tha zawk ang, tiin a chhang a.

²⁵Tin, a mantirtu tur Juda chuan a chhang a, Rabbi, keimah em ni? a ti a. Ani chuan a hnenah, Ni e, a ti a.

²⁶Tin, an ei laiin Isua'n chhang a la a, mal a sawmsak a, a phel a; tin, zirtirte hnenah chuan a pe a, La u la, ei rawh u; hei hi ka taksa a ni, a ti a.

²⁷Tin, no a la a, lawm thu a sawi a, an hnenah a pe a, In zain in rawh u.

²⁸Hei hi ka thisen, sualte ngaihdamna'na mi tam tak tana chhuak tur, thuthlunna chu a ni.

²⁹Nimahsela ka hrilh a che u, ka Pa ramah nangmahni nena a thar ka in ni a thlen hma loh zawng tun achinah grep hrui raha mi hi ka in leh tawh lo ang, a ti a.

³⁰Tin, hla an sak zawhin an chhuak a. Olive Tlangah chuan an kal ta a.

³¹Tin, Isua'n an hnenah, Zaninah hian in zain ka chung thuah lungni loin in awm vek ang; 'Beram vengtu chu ka vua ang a, beram rual chu an darh ang,' tih ziak a ni si a.

³²Nimahsela, ka thawhleh hnuin Galili ramah in hmaah ka kal ang, a ti a.

³³Petera erawh chuan a hnenah, An zain i chung thuah lungni loin awm mah se la kei zawng lungni loin ka awm tawp lo ang, tiin a chhang a.

³⁴Isua'n a hnenah, Tih tak meuhin ka hrilh a che, zaninah hian ar a khuan hmain, nangin vawi thum mi phat ang, a ti a.

³⁵Petera'n a hnenah, I thihnaah chuan thi ve dawn mah i la ka phat tawp lo ang che, a ti a. Chutiang bawkin zirtirte zawng zawng chuan an ti ta theuh a.

³⁶Chu mi zawhah chuan Isua chu anniho nen hmun pakhat Gethsemane an tih chu an thleng a; tin, ani chuan a zirtirte hnenah, Sawta ka va tawngtai chhung zawng hetah hian lo thu rawh u, a ti a.

³⁷Tin, Petera leh Zebedaia fapate pahnih chu a hruai a, a lungngaiin a lo mangang ta em em a.

³⁸Tin, an hnenah, Ka rilru a lungngai em em a, thihna khawp hial a ni; hetah hian awm u la, mi venpui rawh u, a ti a.

³⁹Tin, tlemin hma lamah a va kal hlek a, a bawkkhup a, Aw ka Pa, a theih chuan he no hian mi pel lul rawh se; nimahsela keima thu ni loin, nangma thu thu ni zawk rawh se, tiin a tawngtai a.

⁴⁰Tin, zirtirte hnenah chuan a lo kal a, anni chu muhilin a rawn hmu a, tichuan Petera hnenah, E khai! Nangin darkar khat pawh mi venpui thei lo a ni maw?

⁴¹Thlemnaa in luh lohna'n inring rengin tawngtai rawh u; thlarau zawngin a peih a, tisa erawh chu a chak lo a ni, a ti a.

⁴²Tin, vawi hnihnaah a va kal a, a tawngtai leh a, Aw ka Pa, ka in loha hei hian mi pelh theih lul loh chuan nangma thu thu ni rawh se, a ti a.

⁴³Tin, a lo kal leh a, anniho chu muhilin a rawn hmu leh a, an mut a chhuak hle si a.

⁴⁴Tin, a kalsan leh a, a vawi thumnaah a thu sawi ngai sawiin a tawngtai leh a.

⁴⁵Chu mi zawhah chuan zirtirte hnenah a lo kal leh a, an hnenah, Tunah zawng muhil u la, chawl tawh rawh u! Ngai teh u, a hun chu a lo thleng ta a, Mihring Fapa hi mi sualte kutah an mantir dawn hi.

⁴⁶Tho u la, i kal ang u; en teh u, mi mantirtu tur chu a lo hnaih tak hi, a ti a.

⁴⁷Tin, a la sawi lai mekin Juda, sawm leh pahnihte zinga mi pakhat chu a lo thleng ta a, ama rual chuan puithiam lalte leh lehkhaziaktute leh upate hnen ata mipui tam tak khandaih leh talhtum kengin an lo thleng bawk a.

⁴⁸Tin, a mantirtu tur chuan chhinchhiahna tur a lo hrilh lawk diam a, Ka fawh apiang chu amah a ni ang, man ang che u, tiin.

⁴⁹Tichuan Isua chu a va pan ta nghal a, Chibai, Rabbi! tiin a fawp ta ngawih ngawih a.

⁵⁰Tin, Isua'n a hnenah, Thiana, i rawn kal chhan chu ti rawh, a ti a. Chu veleh Isua chu an chelh a, an man ta a.

⁵¹Tin, ngai teh, Isua hote zinga pakhat chuan a kutin a ban a, a khandaih a phawi a, Puithiam lalber bawih chu a sat a, a beng a sah thlaksak a.

⁵²Tin, Isua'n a hnenah, I khandaih kha a dahnaah dah leh rawh, khandaih ruaitute zawng zawng chu khandaih vekah an thi dawn si a.

⁵³Tunah pawh vantirhkoh sangruk hmun sawm leh hmun hnih aia tam zawk mi rawn tirhsak turin ka Pa hnenah ngen thei loin mi ring em ni le?

⁵⁴Nimahsela ngen ang i la, engtin nge Pathian Lehkha Thu - hetianga a lo awm tur thu hi - a thlen theih ang le? a ti a.

⁵⁵Chu mi lai tak chuan Isua'n mipuite hnenah chuan, Khandaihte, talhtumte kengin suamhmang man tur ang rengin mi man turin in lo chhuak a ni maw? Pathian biak inah ni tin zirtirin ka thu thin a, mi man si lo a.

⁵⁶Nimahsela zawlnei lehkha thute chu a lo thlen theihna turin he'ng zawng zawng hi a lo awm ta a nih hi, a ti a. Chu mi lai chuan zirtirte zawng zawng chuan amah chu an thlahthlam a, an tlan bo ta vek a.

⁵⁷Tin, Isua mantute chuan Puithiam Lalber Kaiapha in a, lehkhaziaktute leh upate awm khawmnaah chuan ani chu an hruai ta a.

⁵⁸Nimahsela Petera'n hla tak atangin amah chu a zui a, Puithiam Lalber in hual chhung kawtlai thlengin; tin, a va lut a, a tawpna hmu turin chhiahhlawhte zingah a thu ve a.

⁵⁹Tin, amah an tihhlum theihna turin puithiam lalte leh roreltuho zawng zawng chuan Isua hekna an zawng a.

⁶⁰Hretu der tam tak lo kal mah se la, an hmu si lo. Nakinah erawh chuan mi pahnih an lo kal a.

⁶¹He mi hian, 'Pathian biak in hi thiat a, ni thum chhunga sa leh thei ka ni,' a ti e, an ti a.

⁶²Tichuan Puithiam Lalber chu a ding chhuak a, a hnenah, Engmahin i chhang lo maw? He'ng hian an hekna che hi engtizia nge ni? a ti a.

⁶³Isua erawh chu a ngawi reng a. Tin, Puithiam Lalber chuan a hnenah, Pathian nung chhalin thu ka pe a che, Krista Pathian Fapa chu i ni emaw? min hrilh rawh, a ti a.

⁶⁴Isua'n a hnenah, Ni e. Nimahsela ka hrilh a che, tun hnuah Mihring Fapa hi thiltihtheihna ding lama thu a, van chhum chunga lo kal in la hmu dawn a ni, a ti a.

⁶⁵Tin, Puithiam Lalber chuan a silhfente a pawt thler a, Pathian a sawichhe ta; hretu dang engah nge kan ngaih tawh ang? Ngai teh u, Pathian a sawichhiatzia chu tunah in hre tawh e.

⁶⁶Engtin nge in ngaih? a ti a. Anni chuan, Thi tlak a ni, tiin an chhang a.

⁶⁷Tin, a hmaiah chil an chhak a, an hnek a.

⁶⁸Thenkhat chuan, Nang Krista, tuin nge beng che? Min hrilh rawh, tiin an beng a.

⁶⁹Tin, Petera chu pawnah, in hual chhung kawtlaiah chuan a thu a; tin, nula pakhat hnenah a lo kal a, Nang pawh Isua Galili rama mi hnena awm kha i nih hi, a ti a.

⁷⁰Ani erawh chuan, I thu sawi chu ka hre hauh lo mai, tiin an zaa hmaah a pha a.

⁷¹Tin, sumhmuna a va chhuah veleh nula dangin ani chu a hmu a, chuta awmte hnenah chuan, He mi pawh hi Isua Nazaret mi hnena awm kha a nih hi, a ti a.

⁷²Tin, Chu mihring chu ka hre lo, tiin chhechhamin a pha leh a.

⁷³Tin, rei lo te achinah a kianga dingte chuan, Petera hnenah, Nang pawh an zinga mi i ni ngei mai, i tawngah a hriat alawm, an ti a.

⁷⁴Tin, ani chuan, Chu mihring chu ka hre lo, tiin anchhia inlawhin chhia a chham ta a. Tin, ar a khuang ta nghal a.Tin, Petera chuan Isua'n, Ar a khuan hmain nangin vawi thum mi phat ang, a tih thu kha a lo hre leh ta a. Tin, a chhuak a, a tap ta zawih zawih a.

⁷⁵Tin, Petera chuan Isua'n, Ar a khuan hmain nangin vawi thum mi phat ang, a tih thu kha a lo hre leh ta a. Tin, a chhuak a, a tap ta zawih zawih a.