Read Baibul, Mizo Matthaia 27 Bible Online

Matthaia 27 - Baibul, Mizo bible

Matthaia 27

¹Tin, zing a lo nih chuan puithiam lalte leh vantlang upate zawng zawng chu Isua tihlum turin a chung thuah an inrawn a.

²Tin, an phuar a, an hruai a, Ram Awptu Pilata hnenah an pe ta a.

³Tin, Juda a mantirtu khan Isua thiam loh an chantir tih a hriat veleh a inchhir a, tangka sawmthum kha puithiam lalte leh upate hnenah chuan a rawn la leh a.

⁴Mi thiam thisen ka mantir kha thil ka lo tisual a ni, a ti a. Anni erawh chuan, Chu chu kan tan eng nge pawi ang? Nangin i tih tihin ti rawh, an tihsan a.

⁵Tin, ani chuan tangka chu hmun thianghlimah chuan a paih lut a, a kal bo a; a va inawkhlum ta a.

⁶Tin, puithiam lalte chuan tangkate chu an la a, Hei hi thawhlawm bawma dah a thiang lo e, thisen man a ni si a, an ti a.

⁷Tichuan an inrawn a, mikhualte phumna turin Belvawtu hmun chu an lei ta a.

⁸Chuvangin a ni, chu mi hmun chu tun thlenga 'Thisen Hmun' an tih tak ni.

⁹Chu mi lai chuan Zawlnei Jeremia'n, Tin, tangka sawmthum an chhiara man, Israel thlah, tute'n emaw an chhiara man chu an la a.

¹⁰Lalpa'n min tiam angin Belvawtu hmun mana tan an pe a, tia a sawi kha a lo thleng ta a ni.

¹¹Tin, Isua chu ram Awptu hmaah chuan a ding a. Tin Ram Awptu chuan Judate lal i ni em? tiin a zawt a. Tin, Isua'n a hnenah, Ni e, a ti a.

¹²Tin, puithiam lalte leh upaten an hek laiin engmahin a chhang lo a.

¹³Tichuan Pilata'n a hnenah, An hekna zozai che hi i hre lo em ni? a ti a.

¹⁴Tin, kam khat mahin a chhang lo a; chutichuan Ram Awptu chuan mak a ti hle a.

¹⁵Tin, Ram Awptuin kut niah chuan mi tang pakhat, an duh apiang, mipuite chu a chhuahsak thin a.

¹⁶Tin, chu mi lai chuan mi tang hmingthang tak, Barabba an tih chu an nei a.

¹⁷Chutichuan an rawn inkhawm chuanin Pilata'n an hnenah, Tunge chhuahsak che u i la in duh? Barabba nge, Isua, Krista an tiha chu? a ti a.

¹⁸Itsiknaa vangin ani chu an mantir tih a hre si a.

¹⁹Tin, rorelna thutphahah chuan a thutlaiin a nupuiin, Kha mi fel tak chungah khan engmah ti suh; vawiinah hian amah avangin mumangah thil tam tak ka tuar a ni, tiin a chah a.

²⁰Tin, puithiam lalte leh upaten Barabba dila Isua tiboral turin mipuite chu an thlem a.

²¹Ram Awptu erawh chuan anniho chu a bia a, Anni pahnih chu a tu zawk nge chhuahsak che u i la in duh a ti leh a. Tin, anni chuan, Barabba, an ti a.

²²Pilata'n an hnenah, Isua, Krista an tih hi, engtin nge ka tih tak ang le? a ti a. An zain, Ani chu Kraws-ah khenbehtir rawh, an ti a.

²³Tin, ani chuan, Engah maw? Eng nge a tihsual ni? a ti a. Nimahsela anniho chu, Kraws-ah khenbehtir rawh, tiin an au chiam a.

²⁴Tichuan Pilata'n engmah a ti thei lo a, a lo buai deuh deuh zawk dawn tih a hriatin, tui a la a, mipuiho hmaah chuan a kut a sil a, He mi fel thisenah hian ka thiang e; nangni'n in tih tihin ti rawh u, a ti a.

²⁵Tin, vantlang zawng zawng chuan, A thisen chu keimahni chungah leh kan fate chungah awm rawh se, tiin an chhang a.

²⁶Chu mi zawhah chuan Barabba chu a chhuahsak a; Isua erawh chu a vua a, kraws-a khenbeh turin a pe ta a.

²⁷Chu mi zawhah chuan Ram Awptu sipaite chuan Isua chu lal inah an hruai lut a, an pawla mi zawng zawng a hnenah an ko khawm a.

²⁸Tichuan a puante an hlihsak a, puansen an sintir a.

²⁹Tin, hling lukhum an phiar a, an khumtir a, a kut ding lamin luang an kentir a; a hmaah an thingthi a, Chibai, Judate lal! tiin nuihza siamna'n an hmang a.

³⁰Tin, amah chu chil an chhak a, luang chu an laksak a, a luah chuan an vua a.

³¹Tin, nuihza siamna'n an hman zawhin puan chu an hlihsak a, ama puante chu an sintir leh a, kraws-a khenbeh turin an hruai ta a.

³²Tin, an kal chhuah laiin, Kurini khuaa mi, a hming Simona an hmu a; chu mi chu a kraws pu turin an man a.

³³Tin, Golgotha an tih hmun an thleng a. (Chu chu 'Lu ruh hmun' tihna a ni).

³⁴Uain thur, englo kha nena pawlh, a in turin an pe a; nimahsela a tem veleh a in duh ta lo a.

³⁵Tin, kraws-a an khenbeh zawhin thum vawrin a silhfente chu an insem a.

³⁶Tin, chutah chuan an thu a, an veng a.

³⁷A hekna, He Mi hi Isua Judate Lal a ni tia ziak, a lu chungah an bel a.

³⁸Tin, ama rual chuan suamhmang pahnih an khengbet ve a, a ding lamah pakhat, a vei lamah pakhat.

³⁹Tin, mi vei apiangte chuan an lu thingin,

⁴⁰Nang Pathian biak in thiata ni thuma sa lehtu, intidam rawh; Pathian Fapa i nih chuan kraws ata kha lo chhuk ta che, tiin an tiel a.

⁴¹Chutiang bawkin puithiam lalte chuan lehkhaziaktute nen tielin,

⁴²Mi dang mah a tidam thin a, mahni a intidam thei si lo. Israel lal a ni alawm tunah hian kraws ata chu lo chhuk ang hmiang, tichuan amah chu kan ring ang.

⁴³Pathian a ring alawm, amah hi a duh chuan tunah hian chhandam rawh se; 'Pathian Fapa ka ni,' a ti si a, an ti a.

⁴⁴Suamhmang an khenbeh vete pawh chuan chutiang bawkin an tiel a.

⁴⁵Tin, chawfak hun achin behliang mun hun thlengin khawvel a lo thim ta vek a.

⁴⁶Tin, behliang mun hun lai vel chuan Isua chu aw ring takin, Eloi, Eloi, lama sabakthani? tiin a au chhuak a. (Chu chu, Ka Pathian, ka Pathian, engah nge mi kalsan? tihna a ni).

⁴⁷Tin, a kianga ding thenkhatte chuan chu chu an hriatin, He mi hian Elija a ko a ni, an ti a.

⁴⁸Tin, an zinga mi pakhat a tlan ta nghal a, spanj a la a, uain thurin a chiah khat a, tiangah a tar a, a han intir a.

⁴⁹Tin, mi dangte chuan, Awm rawh se; amah la thla turin Elija a lo kal emaw i en ang u, an ti a.

⁵⁰Tin, Isua chu aw ring takin a au leh a, a thlarau a thlah ta a.

⁵¹Tin, ngai teh, Pathian biak in puanzar chu a chung lam atangin a hnuai lam thlengin a lo thler chhuak ta a; tin, lirte a lo nghing a, lungpuite a lo khi chat a.

⁵²Thlante a lo inhawng a; mi thianghlim muhil tawhte taksa tam tak pawh kaihthawhin an awm ta a.

⁵³Chu'ngte chu a thawhleh hnuah chuan thlan ata lo chhuakin khaw thianghlimah chuan an lut a, mi tam tak hnenah an inlar ta a.

⁵⁴Tin, sipai za hotu leh a hnena Isua venga awm vete chuan lirnghing leh thil awmziate chu an hmuhin an hlau ta em em a, He mi hi Pathian Fapa a ni ngei mai, an ti a.

⁵⁵Tin, chutah chuan hmeichhe tam tak, a rawngbawlsak chung zela Galili ram atanga Isua rawn zuitute chu an awm a, hla takah an thlir a.

⁵⁶Chu'ng zingah chuan Mari Magdalini te, Mari, Jakoba leh Josea nu te, Zebedaia fapate nu te an tel a.

⁵⁷Tin, tlai lam a lo nih chuan mi hausa, a hming Josefa, Arimathai khuaa mi a lo kal a, amah ngei pawh chu Isua zirtir a ni bawk a.

⁵⁸Chu mi chu Pilata hnenah a va kal a, Isua ruang chu a dil a. Tin, Pilata'n pe turin thu a pe a.

⁵⁹Tichuan Josefa chuan ruang chu a la a, puan zai sin fai takin a tuam a.

⁶⁰Ama thlan thar, lung a kerkuakah chuan a zalh a; thlan kawngkaah chuan lung lian tak a lum a, a kal ta a.

⁶¹Tin, chutah chuan Mari Magdalini leh Mari dang chu an awm a, thlan hma zawnah chuan an thu a.

⁶²Tin, a tukah chuan (chu chu Inrinni zawh tuk a ni) puithiam lalte leh Pharisaite chu Pilata hnenah an awm khawm huai a.

⁶³Ka pu, chu tihdertu chuan a dam lai khan, 'Ni thum chinah ka tho leh ang,' a ti tih kan hre reng a.

⁶⁴Chutichuan thlan chu ni thum ni thlenga veng tha turin thu pe rawh; chutilochuan a zirtirte chuan amah chu an va ru hlauh ang a, vantlang hnenah, 'Mitthi zing ata a tho leh ta a ni,' an ti dah ang e; tichuan tihderna hnuhnung zawk chu a hmasa ai khan a tha lo lehzual ang, an ti a.

⁶⁵Pilata'n an hnenah, Vengtu sipaite in nei alawm; kal u la, in theih ang apiangin ven thattir ta che u, a ti a.Chutichuan vengtu sipaite nen an va kal a, thlan chu an ven thattir a, lung chu an chhinchhiah a.

⁶⁶Chutichuan vengtu sipaite nen an va kal a, thlan chu an ven thattir a, lung chu an chhinchhiah a.