Read Baibul, Mizo Matthaia 3 Bible Online

Matthaia 3 - Baibul, Mizo bible

Matthaia 3

¹Tin, chu'ng lai chuan Baptistu Johana chu Judai thlalerah thu hrilin a lo kal a.

²Sim rawh u! Vanram chu a hnai tawh e, tiin.

³(Amah chu a ni, zawlnei Isaia'n, thlalera mi au rawl chuan, 'Lalpa lamlian sial u la, A kawngte tingil rawh u,' a ti, tia a sawia kha).

⁴Tin, chu mi Johana chuan sanghawngsei hmul puan a sin a, a kawng chu savun kawnghrenin a hreng a; a chaw chu khaukhuap leh khawizu a ni.

⁵Chu mi lai chuan Jerusalem khuaa mi te, Judai rama mi zawng zawngte, Jordan lui dung vela mi zawng zawngte an chhuak a, a hnen lamah an kal a.

⁶An sualte thupha chawiin Jordan luiah chuan, ama hnenah baptisma an chang ta hlawm a.

⁷Nimahsela, Pharisaite leh Saddukaite tam tak a baptisma chang tura lo kal a hmuh veleh an hnenah, Rul thlahte u! Thinur lo thleng tur hi tlansan turin tuin nge zilh che u?

⁸Sim hming pu tlakin rah rawh u.

⁹Abrahama kan thlahtu a ni a lawm, tiin, inngaihtuah suh u; Pathianin he'ng lungte hi Abrahama thlahahte a dintir thei e, ka tih che u hi.

¹⁰Tun apangin thing bul tinah hreipui an dah ta; chutichuan thing tin rah thaa rah lo apiang an kit a, meiah an paih thin.

¹¹Kei zawngin in simna turin tuiin ka baptis thin che u a; nimahsela ka hnunga lo kal tur chu keimah aiin a ropui zawk a, a pheikhawk keng tlak pawh ka ni lo e. Ani chuan Thlarau Thianghlim leh meiin a baptis ang che u.

¹²A kutin a sisep a keng a, a hruih a zap fai hliau ang a, zemah chuan a buh a khung ang. A si erawh chu mei mit thei loin a halral ang, a ti a.

¹³Chu mi lai chuan a hnena baptisma chang turin, Galili ram atangin Jordan luiah Johana hnenah Isua a lo kal a.

¹⁴Johana erawh chuan, i mi baptis ka tul zawk si a, ka hnenah i lo kal zawk a ni maw? tiin, khap a tum a.

¹⁵Nimahsela Isua'n a hnenah, Tunah rem ti hram rawh, hetianga felna zawng zawng hlen chhuah hi kan tan a mawi a ni, tiin a chhang a. Tichuan, rem a ti ta a.

¹⁶Tin, Isua'n baptisma a chan veleh tui atang a chhuak ta nghal a: tin, ngai teh, a tan van a lo inhawng a, Pathian Thlarau chu thuro anga lo chhukin, a chunga lo fu a hmu a.Tin, ngai teh, van atangin awin, Hei hi ka Fapa duh tak, ka lawm em ema chu a ni, a ti a.

¹⁷Tin, ngai teh, van atangin awin, Hei hi ka Fapa duh tak, ka lawm em ema chu a ni, a ti a.