Read Baibul, Mizo Matthaia 5 Bible Online

Matthaia 5 - Baibul, Mizo bible

Matthaia 5

¹Tichuan, mipuite chu a hmuhin tlangah a kal chho a, tin, a thu a, a zirtirte a hnenah an lo kal a.

²Tin, thu a sawi a, anmahni a zirtir a.

³Rilrua retheite chu an eng a thawl e; van ram an ta a ni si a.

⁴Lungngaite chu an eng a thawl e, thlamuanin an la awm dawn si a.

⁵Thuhnuairawlhte chu an eng a thawl e; lei hi an la rochung dawn si a.

⁶Felnaa riltama tuihalte chu an eng a thawl e; an la tlai dawn si a.

⁷Mi khawngaih thei takte chu an eng a thawl e; khawngaih an la hlawh dawn si a.

⁸Thinlunga thianghlimte chu an eng a thawl e; Pathian an la hmu dawn si a.

⁹Remna siamtute chu an eng a thawl e; Pathian faa vuahin an la awm dawn si a.

¹⁰Felna avanga tihduhdah tuar hnute chu an eng a thawl e; van ram an ta a ni si a.

¹¹Miin keimah avanga an hau che u a, an tihduhdah che u a, dawta sual tinrenga an hek hunah che u, in eng a la thawl ang.

¹²Lawm u langin, nasa takin hlim rawh u; vanah in lawmman a awm hnem si a; chutiang bawkin in hmaa zawlnei awmte pawh an tihduhdah thin kha.

¹³Lei chi in ni e; nimahsela chi hi a dak tawh chuan engin nge an tihal leh ang? Chuta chinah chuan paih chhuaha mihringte rah mai mai chauhah lo chuan engatan mah a tlaktlai lo.

¹⁴Khawvel eng in ni e. Tlang chhipa khaw awm chu thuhruk theih a ni lo.

¹⁵Miin Khawnvar halin hrai hnuaiah an dah ngai lo, a dahnaah an dah zawk thin; tichuan in chhunga mi zawng zawng a en thin.

¹⁶Chutiang bawkin in eng chu mi mit hmuhin eng rawh se, chutichuan in thil tih thatte an hmu ang a, in Pa vana mi an chawimawi thei ang.

¹⁷Dan thu emaw, zawlneite thu emaw tiboral tura lo kal ka nih ring suh u; tiboral tura lo kal ni lo a, tifamkim tura lo kal ka ni zawk.

¹⁸Tih tak meuhin ka hrilh a che u, lei leh van hi a boral hma loh chuan Dan thu a mi chhun han te tak te emaw, thai han te tak te emaw, pakhat mah a boral tawp lo ang, a zaa a thlen kim hma loh zawng.

¹⁹Chutichuan, tupawh he'ng thupek te ber zingah hian pakhat pawh bawhchhiaa, chutiang ti ve tura mite zirtir apiang chu, van ramah chuan mi te ber an ti ang; amaherawhchu, tupawh zawma, zirtir ve apiang chu, van ramah chuan mi lian an ti ang.

²⁰In felnain lehkhaziaktute leh Pharisaite felna hi a khum loh chuan, van ramah in lut tawp lo ang tih ka hrilh che u a nih hi.

²¹Hman laia mite hnenah chuan, 'Tual thah tur a ni lo,' an tih leh, 'Tupawh tual that apiang chu a chung thu rel a ni ang' tih a nih in hria a.

²²Kei erawh chuan ka hrilh a che u, tupawh a unau chunga thinur apiang chu, a chungthu rel a ni ang a; tupawh a unau 'mi chhawih pa' ti apiang chu, rorelna sanga a chungthu rel a ni ang; tin, tupawh 'mi a pa' ti apiang chu, hremhmun meia kal tlak a ni ang tih ka hrilh a che u.

²³Chutichuan, maicham bula i thilpek i hlan lai ngeia, i unauin i chungah lungnih lohna a nei tih i hriat chhuah leh chuan,

²⁴chuta maicham hmaah chuan i thil pek chu hnutchhiah la, kal langin i unau rem zet la, chu mi hnuah chuan i thilpek chu rawn hlan rawh.

²⁵I khingpui chu kalkawnga in kal dun laiin rem thuai rawh. Chutilochuan i khingpui chuan roreltu a mantir ang chia, roreltu chuan tiangkengtu hnenah chuan a pe ang chia, tan inah an khung hlauh dah ang che.

²⁶Tih tak meuhin ka hrilh a che, Pawisa te pawh i tlak kim hma loh chuan, chuta ta chu i chhuak lo hul hual ang.

²⁷'I uire tur a ni lo,' an ti tih in hre tawh.

²⁸Kei erawh chuan, tupawh ngaih chaka hmeichhe melh apiang chu, a thinlungah a uire tawh reng a ni tih ka hrilh a che u.

²⁹Tin, i mit ding lamin a tihtluk che chuan, kher chhuak la, paih daih rawh; i taksa a puma Gehenna-a paih ai chuan, i taksa peng pakhat boral chu i tan a tha zawk a ni.

³⁰Tin, i kut ding lamin a tihtluk che chuan, tan la, paih daih rawh; i taksa a puma Gehenna-a kal ai chuan, i taksa peng pakhat boral chu i tan a tha zawk a ni.

³¹'Tupawh nupui ma apiang chuan inmakna lehkha a hnenah pe rawh se,' an ti bawk a.

³²Kei erawh chuan, tupawh tlangval ngaih vang ni lo a, nupui ma apiang chuan, amah chu a uiretir a ni; tih, tupawh mak hnu nei apiang chu a uire a ni tih ka hrilh a che u.

³³Hman laia mite hnenah, 'Dawtah chhia chham suh la, Lalpa hnenah i chhechhamte chu hlen zawk rawh,' an ti tih in hre tawh bawk a.

³⁴Kei erawh chuan ka hrilh a che u, chhia reng reng chham suh u; van chhalin chham suh u, chu chu Pathian lalthutphah a ni si a.

³⁵Lei chhalin chham hek suh u, chu chu a ke nghahchhan a ni si a; Jerusalem chhalin chham hek suh u, chu chu Lal ropui tak khawpui a ni si a.

³⁶I lu chhalin i chham tur a ni hek lo, pakhat pawh i tivarin, i tidum thei si lo a.

³⁷In thu sawi chu 'A ni, a ni,' 'Ni lo, ni lo' ni ngawt rawh se; chung aia chuang liam chu sual laka chhuak a ni.

³⁸'Mit aia mit, ha aia ha' an ti tih in hre tawh.

³⁹Kei erawh chuan ka hrilh a che u, mi sual dodal suh u; i biang ding lama bengtu hnenah chuan a lehlam pawh dawh rawh.

⁴⁰Tin, tupawhin i lakah thupawi siamin, i kawr lak a tum chuan, i puan pawh laktir nghal rawh.

⁴¹Tin, mel khat kala phut luitu apiang che hnenah chuan mel hnih kal rawh.

⁴²A diltu che hnenah pe la, i laka puk duhtu chu hawisan suh.

⁴³'I vengte hmangaih la, i hmelma haw rawh,' an ti tih in hre tawh.

⁴⁴Kei erawh chuan ka hrilh a che u, in hmelmate chu hmangaih u la, a tiduhdahtu che u chu tawngtaisak rawh u.

⁴⁵In Pa vana mi fate in nih theihna'n; ani chuan mi sualte leh mi thate chungah chuan a ni a chhuahtir thin a, mi felte leh mi fel lote chungah pawh ruah a surtir thin a ni.

⁴⁶In hmangaitute chauh in hmangaih hian lawmman eng nge in hmuh ang? chhiahkhawntute pawhin chutiangin an ti ve lo'm ni?

⁴⁷Tin, in unaute chauh chibai in buk hian eng nge in tih hnem chuan bik? Jentailte pawhin chutiangin an ti ve lo'm ni?Chutichuan, in Pa vana mi a tha famkim angin in tha famkim tur a ni.

⁴⁸Chutichuan, in Pa vana mi a tha famkim angin in tha famkim tur a ni.