Read Baibul, Mizo Matthaia 6 Bible Online

Matthaia 6 - Baibul, Mizo bible

Matthaia 6

¹In thil tha tihte mi hmuha tan, mihring mithmuha ti lo turin fimkhur rawh u. Chutilochuan in Pa vana mi hnenah chuan lawmman in nei lo ang.

²Chutichuan, mi hnena thil i pekin, mi vervekte'n mi fak an hlawh theihna tura inkhawmna inahte, kawtthlerahte an tih thin ang hian, i hmaah tawtawrawt hamtir suh. Tih tak meuhin ka hrilh a che u, an lawmman chu an hmu zo tawh.

³Nang erawh chuan mi hnena thil i pekin, i kut ding lamin a tih chu i kut vei lamin hre suh se.

⁴I thil pek chu a rukin a awm theihna'n; chutichuan, i Pa a ruka hmu thintu chuan a rul ang che.

⁵Tin, in tawngtaiin, mi vervekte angin in ti tur a ni lo; miin an hmuh theihna turin, inkhawmna inahte, kawtthler peng takahte, ding chunga tawngtai an ngaina si thin a. Tih tak meuhin ka hrilh a che u, an lawmman chu an hmu zo tawh.

⁶Nang erawh chuan i tawngtaiin, i pindan chhungrilah lut la, i kawng khar la, i Pa a ruka awm hnenah chuan tawngtai rawh; tichuan, i Pa a ruka hmu thintu chuan a rul ang che.

⁷Tin, in tawngtaiin, Jentailte angin sawi nawn mai mai suh u; an tawng tam vangin hriain an ring a ni.

⁸Chutichuan, anmahni angin awm suh u; amah in dil hmain in Pa chuan engte nge in mamawh tih a hre reng si a.

⁹Chutichuan, nangni chuan hetiang hian tawngtai rawh u - 'Kan Pa vana mi, i hming zahawm rawh se.

¹⁰I ram lo thleng rawh se. I duhzawng vana an tih angin leia mi'n ti rawh se.

¹¹Vawiinah hian kan ei khawpin chaw min pe ang che.

¹²Kan batte hi min ngaidam ang che. Keini pawhin kan thil bate kan ngaihdam tak ang khan.

¹³Sual tura thlemnaah min hruai lut suh la, mi sual lakah chuan min chhandam zawk ang che,' tiin.

¹⁴Mi an bawhchhiatte in ngaihdam chuan, in Pa vana miin a ngaidam ve ang che u.

¹⁵Nimahsela, mite in ngaihdam si loh chuan, in Pain in bawhchhiatte a ngaidam bik lo ang.

¹⁶Chaw in nghei hun pawhin, mi vervekte angin ngui hmel pu suh u; anni zawngin mi mithmuha chaw ngheia an lan theihna turin, an hmel an tipawr si thin a. Tih tak meuhin ka hrilh a che u, an lawmman chu an hmu zo tawh.

¹⁷Nang erawh chuan chaw i nghei hunin sahriak inthih la, i hmai phih rawh.

¹⁸Chutichuan i Pa a ruka awm mithmuhah chauh lo chuan, mihring mithmuhah chaw ngheiin i lang lo ang; tichuan, i Pa a ruka hmu thintu chuan a rul ang che.

¹⁹Leia sulrul leh tuiekin a ei chhiatnaah, rukrute'n an reh pawha an ruknaah hian, in tan rote khawl khawm suh u.

²⁰Vanah, sulrul leh tuiekin a ei chhiat lohnaah, rukrute'n an reh pawha an ruk hek lohnaah chuan, in tan rote khawl khawm zawk rawh u.

²¹I ro awmna apiangah i rilru pawh a awm ang.

²²Taksa khawnvar chu mit hi a ni; chutichuan i mit a fim chuan i taksa a pumin a eng chhuak ang.

²³I mit a chhiat erawh chuan i taksa a pumin a thim zo vek ang. Chutichuan, i chhunga eng chu thim ni se la, thim chu a va nasa dawn em!

²⁴Tuma'n hotu pahnih rawng an bawl kawp thei lo; pakhat huain pakhat an duh ang; a nih loh leh, pakhat tannin pakhat an hmusit ang. Pathian leh sum rawng in bawl kawp thei lo e.

²⁵Chuvangin, ka hrilh a che u, 'Engnge ka ei ang a, eng nge ka in ang aw?' tiin in nunna thu leh, 'Engnge ka silhin ka fen ang aw?' tiin in taksa thu lungkham suh u. Ei tur aiin nunna a thupui zawk lo em ni? Silhfen aiin taksa pawh a thupui zawk lo em ni?

²⁶Chungleng savate hi en rawh u; buh an tuh lo a, an at hek lo, buh inah an seng lut hek lo; nimahsela in Pa vana mi chuan a chawm si a. Nangni chu anni ai chuan nasa takin in hlu zawk lo em ni?

²⁷Tin, nangni zingah lungkhama vangin tuin nge mahni dung lam tawng khata tisang chuang thei?

²⁸Tin, silhfen thu engah nge in lungkham ni? Ram tuktinpar thanzia hi ngun takin ngaihtuah rawh u; hna an thawk lo, la pawh an kai hek lo.

²⁹Nimahsela ka hrilh a che u, Solomona meuh pawh a ropuina zawng zawnga a inthuam khan, he'ng tuktinpar pakhat tluk pawh hian cheiin a awm lo.

³⁰Chutichuan, ram hnim, vawiin anga nung, a tuka thuka tuah leh mai tur mah Pathianin chuti kaua a chei chuan, aw nangni rin tlemte u, silhfen a pe zawk em em dawn lo che u em ni?

³¹Chutichuan, 'Engnge kan ei ang?' emaw, 'Engnge kan in ang?' emaw, 'Eng sinin nge kan awm ang?' emaw tih, lungkham suh u.

³²Jentailte'n chu'ng zawng zawng chu an zawng thin a ni. Chu'ng zawng zawng chu in mamawh tih in Pa vana mi'n a hre reng a ni.

³³A ram leh a felna chu zawng hmasa zawk rawh u, tichuan chu'ng zawng zawng chu a pek belhchhah dawn che u nia.Chutichuan, a tuka tan lungkham suh u, a tuk chuan ama tan a lungkham chawp dawn si a. Ni khat atan ni khat hrehawm chu a tawk a ni.

³⁴Chutichuan, a tuka tan lungkham suh u, a tuk chuan ama tan a lungkham chawp dawn si a. Ni khat atan ni khat hrehawm chu a tawk a ni.