Read Baibul, Mizo Matthaia 8 Bible Online

Matthaia 8 - Baibul, Mizo bible

Matthaia 8

¹Tin, tlang ata chu a lo chhuk hnuin mipui tam takin amah an zui ta a.

²Tin, ngai teh, a hnenah phar a lo kal a, Lalpa, i duh chuan mi tithianghlim thei e, tiin, chibai a buk a.

³Tin, Isua'n a han ban a, a dek a, Ka duh e, lo thianghlim tawh ang che, a ti a. Tin, chawplehchilhin a phar chu a lo thianghlim ta nghal a.

⁴Tin, Isua'n a hnenah, Tumah hrilh lo turin fimkhur ang che; amaherawhchu puithiam hnenah va inentir la, Mosia'n thilpek tur a ruat kha hlan rawh, an hriat fiahna turin, a ti a.

⁵Tin, Kapernaum khuaa a luhin a hnenah sipai za hotu a lo kal a.

⁶Lalpa, ka naupang zengin inah a mu reng a, nasa taka tihnatin a awm a ni, tiin, a ngen chiam a.

⁷Tin, ani chuan a hnenah, Ka lo kal ang a, ka tidam ang, a ti a.

⁸Tin, sipai za hotu chuan, Lalpa, ka in chhung i luhna tlak a ni lo e; thu chauh sawi la, ka naupang a dam mai ang.

⁹Kei pawh mi thua awm ka ni a, ka hnuaiah sipaite an awm a; chu mi chu, 'Kal rawh' ka tih leh, a kal thin; mi dang hnenah pawh, 'Lo haw rawh' ka tih leh a lo haw thin; ka bawih hnenah pawh, 'Hei hi ti rawh' ka tih leh, a ti thin, tiin a chhang a.

¹⁰Tin, Isua'n chung thu chu a hriatin mak a ti hle a, a zuitute hnenah chuan, Tih tak meuhin ka hrilh a che u, Israelte zingah pawh heti ema rinna nasa hi ka hmu lo.

¹¹Ka hrilh a che u, Chhak leh Thlang atangin mi tam tak an lo kal ang a, van ramah chuan Abrahama te, Isaaka te, Jakoba te hnenah an thu ang a.

¹²Ram fate erawh chu pawn thimah chuan hnawh chhuahin an awm ang a; chutah chuan tah leh ha thial chu a awm ang, a ti a.

¹³Tin, Isua'n sipai za hotu hnenah chuan, Kal tawh rawh i rin angin i chungah lo thleng rawh se, a ti a. Tichuan, naupang chu, chu mi dar ngeiah chuan a lo dam ta a.

¹⁴Tin, Isua chu Petera ina a luhin, a nupuia nu chu khawsika mu a hmu a.

¹⁵Tichuan, a kut chu a dehsak a, a khawsik chu a reh ta a; tin, a tho a, a rawng a bawlsak ta a.

¹⁶Tin, khua a lo tlai lam chuan a hnenah ramhuai mante tam tak an rawn hruai a; tin, thuin ramhuaite chu a hnawt chhuak a, dam lo zawng zawngte chu a tidam bawk a.

¹⁷Zawlnei Isaia'n, Amah ngeiin kan chak lohnate a la a, kan nate a phur a, tia a sawi chu a lo thlen theihna turin.

¹⁸Tin, Isua'n mipui tam tak a vela a hmuhin, ral lehlama kal turin thu a pe a.

¹⁹Tin, lehkhaziaktu pakhat a lo kal a, a hnenah, Zirtirtu, i kalna apiangah ka zui ang che, a ti a.

²⁰Tin, Isua'n a hnenah, Sihalte'n kua an nei a, chungleng savate pawhin bu an nei a, Mihring Fapa erawh hi chuan a lu nghahna a nei lo, a ti a.

²¹Tin, a zirtirte zinga mi dangin a hnenah, Lalpa ka pa mi vuitir zet rawh, a ti a.

²²Nimahsela, ani chuan a hnenah, Mi zui rawh; mitthiin anmahni mitthi chu vui rawh se, a ti a.

²³Tin, lawngah a chuang a, zirtirte chuan an zui a.

²⁴Tin, ngai teh, dil chu nasa takin a lo fawn ta a, chutichuan tui fawnin lawng chu a vur hlup hlup mai a, ani erawh chu a muhil a.

²⁵Tin, a hnenah an lo kal a, an kaitho a, Lalpa, min chhanhim rawh, kan boral dawn hi le, an ti a.

²⁶Tin, ani chuan an hnenah, Rin tlemte u, engahnge in hlauh? a ti a. Chu mi hnuah chuan a tho a, thlite leh dil chu a hau a; tin, a lo reh ta thuap mai a.

²⁷Tin, mite chuan mak an ti hle a, he mi hi mi eng nge a nih, thli leh dil lam pawhin a thu an awi hi? an ti a.

²⁸Tin, ral leh lam Gadarin mite ram chu a thlenin, ramhuai man pahnih, thlan atanga lo chhuakin, an rawn tawk a; an kawlh em a, chutichuan chu mi kawngah chuan tumah an kal thei lo a.

²⁹Tin, ngai teh, anni chuan, Pathian Fapa, keini leh nang eng nge kan inzawlna? Hun tiam thlen hmain min nghaisa turin hetah i lo kal em ni? tiin, an au a.

³⁰Tin, an awmna atanga hla feah vawk rual tam tak an tla a.

³¹Tin, ramhuaite chuan, Min hnawh chhuah chuan vawk rual kawchhungahte sawn min kaltir ang che, tiin, a hnenah, an ngen a.

³²Tin, ani chuan an hnenah, Kal ta che u, a ti a. Tichuan, an lo chhuak a, vawk kawchhungahte chuan an va lut a: tin, ngai teh, vawk rual zawng zawng chu khamah an tlan chhuk chiam a, dilah an tlan lut a, tuiah chuan an boral ta a.

³³Tin, a vulhtute chu an tlan a, khuaah chuan an kal a, engkim an hril ta a, ramhuai mante chunga thil lo thlengte pawh chu.Tin, ngai teh, a khuain Isua hmuak turin an lo chhuak a; tin, amah an hmuh veleh an ram ata chhuak turin an ngen chiam a.

³⁴Tin, ngai teh, a khuain Isua hmuak turin an lo chhuak a; tin, amah an hmuh veleh an ram ata chhuak turin an ngen chiam a.