Read Baibul, Mizo Matthaia 9 Bible Online

Matthaia 9 - Baibul, Mizo bible

Matthaia 9

¹Tin, Isua lawngah a chuang a, dil chu a kan a, a awmna khua chu a thleng a.

²Tin, ngai teh, zeng pakhat khuma mu chungin a hnenah an rawn zawn a. Tin, Isua'n an rinzia a hmuhin, zeng hnenah chuan, Ka fa, thlamuang takin awm rawh; I sualte ngaihdam a ni tawh, a ti a.

³Tin, ngai teh, lehkhaziaktu thenkhatte chuan an rilruin, he mi hian Pathian a sawi chhia a nih hi, an ti a.

⁴Tin, Isua'n an ngaihtuahte chu a lo hria a, Engah nge in thinlunga sual in ngaihtuah ni?

⁵I sualte ngaihdam a ni tawh,' tih leh, 'Tho la, kein kal tawh rawh,' tih hi, a eng nge sawi awl zawk ni?

⁶Engpawhnisela, khawvelah Mihring Fapa hian sual ngaihdam theihna a nei tih in hriatna'n, a ti a. (Zeng hnenah chuan) Tho rawh. I khum la la, i inah kal rawh, a ti a.

⁷Tin, a tho a, a inah a haw ta a.

⁸Tin, mipuite chuan chu chu an hmuhin, an hlau a, mihringte hnena chutiang thuneihna petu Pathian chu an fak a.

⁹Tin, Isua chuta tangin a kal zel a, chhiah chawina hmuna thu, mi pakhat, a hming Mathaia a hmu a: tin, a hnenah, Mi rawn zui rawh, a ti a. Tichuan, a tho a, a zui ta a.

¹⁰Tin, heti hi a ni a, inah chuan chaw a kil laiin, ngai tehee, chhiahkhawntute leh mi sualte tam tak an lo kal a, Isua leh a zirtirte chu an kilpui hlawm a.

¹¹Tin, Pharisaite chuan chu chu an hmuhin, a zirtirte hnenah chuan, engati nge in zirtirtuin chhiahkhawntute leh mi sualte hnena a ei le? an ti a.

¹²Nimahsela, Isua'n chu chu a hriat veleh, Mi chakte chuan daktawr an ngai lo a, mi bawrhsawmte zawkin an ngai a ni.

¹³Chutichuan, 'Inthawina duh loin khawngaihna ka duh e,' tih hi, a awmzia va zir rawh u; mi fel takte lam tura lo kal ka ni lo a, mi sualte zawk lam tura lo kal ka ni a sin, a ti a.

¹⁴Chu mi lai chuan Johana zirtirte chu a hnenah an lo kal a, engatinge keini leh Pharisaite hian chaw kan nghei zut thin a, i zirtirte lemin an nghei si loh? an ti a.

¹⁵Tin, Isua'n an hnenah, Mo hruaitute hnenah a pasal tur chu a awm chhung zawng, mo hruaitute chuan an sun thei em ni? Nimahsela, a pasal tur chu an hnen ata hruai bo nite a la thleng ang a, chu mi hunah erawh chuan chaw an la nghei ang.

¹⁶Tin, tuma'n puan hlui puan la thlakmar loh themin an bel ngai lo; a bel phuina tur chuan puan chu a kai thler zawk ang, a lo thler nasa lehzual dawn si a.

¹⁷Tuma'n uain thar savun uain peng hluiahte an thun ngai hek lo; chutilochuan savun pengte chu a puak keh a, uain chu a bua a, savun pengte pawh chu a lo chhe thin; uain thar chu savun uain peng tharahte an thun zawk thin a ni, tichuan tha takin a awm ve ve thin, a ti a.

¹⁸Chung thu chu an hnena a sawi lai takin, ngai teh, hotu pakhat a lo kal a, chibai a buk a, Ka fanu tunah tak hian a thi a; nimahsela, lo kal la, a chungah I kut nghat la, a lo nung leh ang, a ti a.

¹⁹Tichuan, Isua a tho a, a zui ta a, zirtirte pawhin an zui ve a.

²⁰Tin, ngai teh, hmeichhe pakhat, kum sawm leh kum hnih thi puta dam lo a hnungah a lo kal a, a puan hmawr a dek a.

²¹A puan hmawr chauh pawh dek i la, tidamin ka awm mai ang, tih a rilruk a ni.

²²Tin, Isua a hawi a, amah chu a hmu a, Ka fanu, thlamuang takin awm rawh; i rinna hi i dampui a ni e, a ti a. Tichuan, hmeichhia chu, chu mi dar achinah chuan a lo dam ta a.

²³Tin, Isua chu hotu inah chuan a lut a, phenglawng tumte leh mipui bengchheng mur murte a va hmu a.

²⁴Chhuak rawh u; naupang chu a thi lo e, a muhil a ni zawk a sin, a ti a. Tin, anni chuan amah chu an nuihsan ta mai a.

²⁵Nimahsela, mipui chu an hnawh chhuah hnu chuan a lut a, a kutah a chelh a, naupang chu a lo tho ta a.

²⁶Tin, chu mi chanchin chu chung ram zawng zawngah chuan a lo thang chhuak ta a.

²⁷Tin, Isua chuta tangin a kal zel a, mitdel pahnihin, Davida fapa, min khawngaih rawh, tia auin an zui a.

²⁸Tin, ina a luh chuan, mitdelte chu a hnenah an lo kal a; tin, Isua'n an hnenah, Hei hi ti theiin mi ring em? a ti a. Anni chuan a hnenah, Ring e, Lalpa, an ti a.

²⁹Tin, ani chuan an mit a dek a, In rin angin in chungah thleng rawh se, a ti a.

³⁰Tichuan, an mit chu a lo var ta a. Tin, Isua'n an hnenah, Tuma hriat loh turin fimkhur rawh u, a ti tlat a.

³¹Nimahsela, anni chu an chhuak a, chu mi ram zawng zawngah chuan a chanchin an tithang ta a.

³²Tin, an chhuah lai takin, ngai teh, tawng thei lo ramhuai man pakhat a hnenah an rawn hruai a.

³³Tin, ramhuai chu a hnawh chhuah veleh tawng thei lo chu a lo tawng ta a. Tin, mipuite chuan mak an ti hle a, Israelte zingah hetiang hi kan hmu ngai lo, an ti a.

³⁴Pharisaite erawh chuan, ramhuai lal vangin a ni, ramhuaite a hnawh chhuah thin ni, an ti a.

³⁵Tin, Isua'n an inkhawmna inahte zirtirin, Ram Chanchin Tha chu hrilin, dam lohna tinreng leh natna tinrengte tidamin, khaw lian leh khaw tete zawng zawng a fang zel a.

³⁶Chutichuan, mipuite chu a hmuhin, vengtu nei lo beramte anga hrehawm leh darha an awma vangin, a khawngaih ta em em a.Tichuan, a zirtirte hnenah chuan, Buh seng tur a tam hle si a, nimahsela a thawktute an tlem; chutichuan, a buh seng tura thawktu turte tir turin buh Neitupa hnenah chuan ngen rawh u, a ti a.

³⁷Tichuan, a zirtirte hnenah chuan, Buh seng tur a tam hle si a, nimahsela a thawktute an tlem; chutichuan, a buh seng tura thawktu turte tir turin buh Neitupa hnenah chuan ngen rawh u, a ti a.