Read Baibul, Mizo Marka 1 Bible Online

Marka 1 - Baibul, Mizo bible

Marka 1

¹Pathian Fapa Isua Krista Chanchin Tha thlen tantirhna chu ti hian zawlnei Isaia lehkhabuah ziah a ni.

²Ngai teh, ka tirhkoh i hmaah ka tir a, Ani chuan i kawng a siam ang.

³Thlalera mi au rawl chuan, 'Lalpa lamlian sial u la, A kawngte tingil rawh u.'

⁴Johana, thlalera baptistu kha, thiltihsual ngaihdamna'n simna baptisma thu hrilin a lo chhuak a.

⁵Tin, Judai rama mi zawng zawng leh Jerusalem khuaa mi zawng zawngte an chhuak a, a hnen lamah an kal a, an sualte thupha chawiin Jordan luiah chuan a hnenah baptisma an chang ta hlawm a.

⁶Tin, Johana chu sanghawngsei hmul puanin a inthuam a, a kawng savun kawnghrenin a hreng a, a chaw chu khaukhuap leh ram khawizu a ni.

⁷Tin, "Ka hnungah keimah aia ropui zawk a lo kal mek a ni; kuna a pheikhawk hrui phelh tlak pawh ka ni lo e.

⁸Kei zawngin tuiin ka baptis thin che u a; ani erawh chuan Thlarau Thianghlimin a baptis ang che u," tiin a hril a.

⁹Tin, chung niahte chuan heti hi a lo ni a, Isua chu Galili rama nazaret khua atangin a lo kal a, Jordan luiah chuan johana hnenah baptisma a chang ta a.

¹⁰Chu veleh tui ata a chhuahin, van inhawnga Thlarau thuro anga a chunga lo chhuk a hmu a.

¹¹Tin, "Nang ka Fapa duh tak i ni a, i chungah ka lawm em am a ni," tiin van atangin aw a lo chhuak a.

¹²Tin, Thlarau chuan ani chu thlalerah a tir chhuak ta nghal a.

¹³Tichuan Setana thlem chungin thlalerah chuan ni sawmli a awm a, ram sa zingahte a awm a; vantirhkohte chuan a rawng an bawlsak a.

¹⁴Tin, Johana an man hnuin, Isua, Pathian Chanchin Tha hrilin, Galili ramah a lo kal a,

¹⁵Hun chu a lo thleng ta a, Pathian ram pawh a lo hnai ta; sim u la Chanchin Tha hi ring rawh u," a ti zel a.

¹⁶Tin, Galili dil kam chu a hrut laiin Simona leh Simona unau Andria chu dilah chuan len dengin a hmu a; sangha mantu an ni reng a.

¹⁷Tin, Isua'n an hnenah, "Mi zui rawh u, tichuan mihring mantuah ka siam ang che u," a ti a.

¹⁸Tin, lente chu kalsanin an zui ta nghal a.

¹⁹Tin, thui lo te a kalin Zebedaia fapa Jakoba leh a unau Johana chu a hmu a, chu mite chu len siamthain lawngah bawk an awm a.

²⁰Tin, ani chuan anni chu a ko ta nghal a; tichuan an pa Zebedaia chu inhlawhfa an rawihte hnenah chuan lawngah an kalsan a, an zui ta a.

²¹Tin, Kapernaum khuaah an va lut a; tin Chawlhniah chuan inkhawmna inah a lut a, a zirtir ta nghal a.

²²A thu zirtir chu mak an ti hle a; lehkhaziaktute ang lo a, thuneihna nei awm taka anmahni a zirtir avangin.

²³Tin, an inkhawmna inah chuan ramhuai bawlhhlawh pai mi pakhat a lo awm a;

²⁴ani chuan, "Nazaret Isu, keini leh nang eng nge kan inzawlna awm? Min tiboral turin i lo kal em ni? Nang ka hria a che, Pathian mi thianghlim i ni e," tiin a au chhuak ta nghal a.

²⁵Tin, Isua'n a hau a, "Ngawi la, a chhung ata lo chhuak rawh," a ti a.

²⁶Tin, ramhuai bawlhhlawh chu, amah sawisaa ring taka auin a chhung ata a lo chhuak ta a.

²⁷Tin, an zain mak an ti em em a, chutichuan, "Hei hi eng nge ni le? zirtirna thar a nih hi le! Ramhuai bawlhhlawhte pawh thu nei takin thu a pe a, a thu an awi zel hi le," tiin an inhnial a.

²⁸Tin, Galili ram vel zawng zawngah ram tinah a chanchin a thang ta nghal a.

²⁹Tin, inkhawmna in ata chu an chhuahin, Jakoba leh Johana nen Simona leh Andria inah chuan an lut ta nghal a.

³⁰Tin, Simona nupuia nu chu khawsikin a na a, a lo mu a; tichuan a chanchin chu Isua an hrilh ta nghal a;

³¹tin, ani chuan a kut a va chelh a, a kaitho ta a; tichuan a khawsik chu a reh a, an rawng a bawlsak ta a.

³²Tin, tlai lamah ni a tlak hnu chuan, damlo zawng zawng leh ramhuai mante a hnenah an rawn hruai a.

³³A khuain kawngkhar bulah chuan an lo awm khawm ta mup a.

³⁴Tin, mi tam tak nat tinrenga nate chu a ti dam a, ramhuai tam tak a hnawt chhuak bawk a; ramhuaite chuan amah chu an hriat avangin an tawng a phal lo.

³⁵Tin, zingah khawvar hma daihin a tho a, a chhuak a, thlaler hmunah a va kal a, chutah chuan a tawngtai a.

³⁶Tin, Simona leh a thiante chuan a hnungah an zui ta a;

³⁷tin, ani chu an va hmuh chuan a hnenah, "Mi zawng zawngin an zawng che a sin le," an ti a.

³⁸Tin, ani chuan an hnenah, "Hmun dangah khaw hnaiahte chuan i kal ang u, chungahte pawh chuan thu ka hrilh theihna turin; chu chu ka rawn chhuah chhan a ni si a," a ti a.

³⁹Tichuan thu hrila ramhuaite hnawt chhuak zelin Galili ram zawng zawnga an inkhawmna inahte a lut zel a.

⁴⁰Tin, a hnenah phar a lo kal a, "I duh chuan mi tithianghlim thei e," tiin a hmaah thingthiin a ngen chiam a.

⁴¹Tin, ani chuan a lo khawngaih em em a, a han ban a, a dek a, "Ka duh e, lo thianghlim tawh ang che," a ti a.

⁴²Tichuan chawplehchilhin a phar chu a lo reh ta nghal a, a lo thianghlim ta a.

⁴³Tin, Isua chuan, "Tuma hnena engmah sawi lo turin fimkhur ang che;

⁴⁴amaherawhchu puithiam hnenah va inentir la, i inthenna'n Mosia'n thil a ruatte kha hlan rawh, anhriat fiahna turin," a ti tlat a, a kaltir ta nghal a.Nimahsela ani chu a chhuak a, chu mi chanchin chu nasa taka tlangaupuiin a puang darh ta a: chutichuan Isua chu alangin khuaah a lut thei ta lo a, thlaler hmunahte a awm ta zawk a; tin, hmun tin ata a hnenah an lo kal thin a.

⁴⁵Nimahsela ani chu a chhuak a, chu mi chanchin chu nasa taka tlangaupuiin a puang darh ta a: chutichuan Isua chu alangin khuaah a lut thei ta lo a, thlaler hmunahte a awm ta zawk a; tin, hmun tin ata a hnenah an lo kal thin a.