Read Baibul, Mizo Marka 10 Bible Online

Marka 10 - Baibul, Mizo bible

Marka 10

¹Tin, a tho a, chuta tang chuan Judai ramah leh Jordan ralah a kal ta a; tin, mipuihote chu a hnenah an rawn inkhawm leh a, tichuan a tih dan pangngaiin a zirtir leh a.

²Tin, Pharisai thenkhat a hnenah an lo kal a, amah fiahna'n, "Miin nupui mak a thiang em?" tiin an zawt a.

³Tin, ani chuan an hnenah, "Mosia'n engtin nge thu a pek che u?" tiin a chhang a.

⁴Tin, anni chuan, "Mosia chuan inmakna lehkha ziakin mak a phal thin a ni," an ti a.

⁵Nimahsela Isua'n an hnenah, "In thinlung khauh avngin a sin chu thupek chu a ziaksak che u ni.

⁶Nimahsela leilung piantirh atang chuan, 'Anni chu hmeichhia leh mipaah a siam a ni,

⁷Chu mi avang chuan 'Mipain a nu leh a pa a kalsan ang a, a nupui a vuan ang;

⁸tichuan an pahnih chuan tisa pumkhat an lo ni tawh ang,' chutichuan pahnih an ni tawh lo a, tisa pumkhat an ni tawh zawk a ni.

⁹Chutichuan Pathianin a zawm tawh chu mihringin then suh se," a ti a.

¹⁰Tin, inah chuan a zirtirte chuan chung thu chu amah an zawt leh a.

¹¹Tin, ani chuan an hnenah, "Tupawh a nupui maa mi dang nei apiang chuan a nupui chu a uiresan a ni;

¹²ani pawh chuan a pasal a then a, mi dang a neih chuan a uire a ni bawk," a ti a.

¹³Tin, a deh atan a hnenah naupang tete an rawn hruai a; tin, zirtirte chuan an lo hau a.

¹⁴Nimahsela Isua'n chu chu a hmuhin a lungni lo em em a, zirtirteho hnenah chuan, "Naupang tete ka hnenah han kaltir u la, hnar suh u; Pathian ram chu hetiang mite ta a ni si a.

¹⁵Tih tak meuhin ka hrilh a che u, tupawh Pathian ram chu naupang tein a lawm anga lawm lo apiang a chhungah an lut tawp lo ang," a ti a.

¹⁶Tin, anmahni chu a kuangkuah a, an chungah a kut nghatin mal a sawmsak ta a.

¹⁷Tin, kal tura a chhuah laiin mi pakhat a lamah a lo tlan a, a hmaah a thingthi a, a hnenah, "Zirtirtu tha, chatuana nunna ka chan theihna'n engtin nge ka tih ang?" tiin a zawt a.

¹⁸Tin, Isua'n a hnenah, "Engati nge tha mi tih? mi pakhat chauh lo chu tumah tha an awm lo, chu chu Pathian a ni.

¹⁹Thupekte chu i hria alawm - 'Tual that suh, Uire suh, Ru suh, Dawtin hek suh, Bum suh, I nu leh i pa chawimawi rawh,' tihte hi," a ti a.

²⁰Tin, ani chuan a hnenah, "Zirtirtu, chung thu zawng zawng chu ka naupan tet ata ka zawm thin," a ti a.

²¹Tin, Isua'n amah chu a en a, a hmangaih ta a, a hnenah, "Kawng khat i la bak e; kal la i neih apiang hralh la, pachhiate hnenah pe rawh, chutichuan vanah ro i nei ang; tin, lo kal la, mi zui ang che," a ti a.

²²Amaherawhchu chung thu chungah chuan a hmel a lo dur ta khup a, lungngai takin a kal bo ta a; sum tam tak nei mi a nih avangin.

²³Tin, Isua'n a en vel a, a zirtirte hnenah chuan, "Sum ngahte tan Pathian rama luh a va harsa dawn em!" a ti a.

²⁴Tin, a zirtirte chuan a thusawi chu mak an ti hle a. Isua erawh chuan a chhang leh a, an hnenah, "Naute u, sum ringte tan Pathian rama luh a va harsa thin em!

²⁵Mi hausa Pathian rama luh aiin sanghawngsei, hriau benga luh tlang a awl zawk," a ti a.

²⁶Tin, anni chuan mak an ti nasa em em a, a hnenah, "a nih leh, tu nge chhandam ni thei ang le?" an ti a.

²⁷Isua'n anni chu a en a, "Chu chu mihring tan tih rual loh a ni lo; Pathian nen engkim tih theih a ni si a," a ti a.

²⁸Petera'n a hnenah, "Ngai teh, keini'n engkim kalsanin kan zui ta chia," tiin a han sawi tan a.

²⁹Isua chuan, "Tih tak meuhin ka hrilh a che u, tupawh keimah avang leh Chanchin tha avanga in emaw, unaupate emaw, farnute emaw, nu emaw, pa emaw, fate emaw, ramte emaw kalsan tawh phawt chu,

³⁰tun dam chhung la la hian, inte, unaupate, farnute, nute, fate, ramte a leh zain, tihduhdahnate nen, hmu lo tur tumah an awm lo; hun lo la thleng tura chatuana nunna nen.

³¹Nimahsela mi tam tak hmasa bera awmte chu hnuhnung berah an lo awm ang a, hnuhnung berte pawh hmasa berah an la awm ang," a ti a.

³²Tin, Jerusalem khuaa chho turin kawngah an awm a; Isua chuan an hma a hruai a; anni chuan mak an ti hle a; a rawn zuitute chuan an hlau a. Tin, ani chuan sawm leh pahnihte chu a hruai hrang leh a,

³³Ngai teh u, Jerusalem khuaah kan chhoh dawn hi; Mihring Fapa hi puithiam lalte leh lehkhaziaktute hnenah mantirin a awm dawn a ni; tin, anni chuan thi turin a chungah thu an titlu ang a, Jentailte hnenah an pe ang;

³⁴tin, anni chuan nuihza siamna'n an hmang ang a, chil an chhak ang a, an vua ang a, an tihlum ang; tin, ni thum chinah a tho leh ang," tiin a chunga thil lo thleng turte chu an hnenah a hrilh ta a.

³⁵Tin, Zebedaia fapa Jakoba leh Johana chuan ani chu an rawn hnaih a, a hnenah "Zirtirtu, i hnena kan dil tur apiang che chu i mi tihsak kan duh e," an ti a.

³⁶Tin, ani chuan an hnenah, "In tan eng nge tihsak che u i la in duh le?" a ti a.

³⁷Tin, anni chuan a hnenah, "I ropuinaah chuan, i ding lamah pakhat, i vei lamah pakhat min thuttir ang che," an ti a.

³⁸Isua erawh chuan an hnenah, "In dil chu in hre lo a ni. Ka no in tur chu in in thei em ni? ka baptisma chan tur pawh in chang thei em ni?" a ti a.

³⁹Tin, anni chuan a hnenah, "Thei e," an ti a. Tin, Isua'n an hnenah, "Ka no in tur chu in in ang a, ka baptisma chan tur pawh chu in chang ve ang;

⁴⁰nimahsela ka ding lamah emaw, ka vei lamah emawa thut tur thu chu keia pek tur a ni lo a, an buatsaihsakate tan a ni zawk ang," a ti a.

⁴¹Tin, sawmte chuan chu chu an lo hriatin Jakoba leh Johana chungah chuan an lungni ta lo em em a.

⁴²Isua erawh chuan anniho chu a ko a, an hnenah, "Jentailte chunga roreltua an ruatte chu an chungah an lal em em thin a, an mi liante chuan an chungah thu an nei em em bawk thin tih in hria.

⁴³Nimahsela, nangni zingah zawng chutiang a ni lo ang; tupawh in zinga mi lian nih duh apiang chu in rawngbawltuah a awm zawk tur a ni,

⁴⁴tupawh in zinga hmasa ber nih duh apiang chu mi zawng zawng chhiahhlawhah a awm bawk tur a ni.

⁴⁵Mihring Fapa meuh pawh rawngbawlsaka awm turin a lo kal lo a, rawngbawl tur leh mi tam tak tlanna'na a nun pe zawk turin a lo kal a ni si," a ti a.

⁴⁶Tin, Jeriko khua an lo thleng a, tin, Isua Jeriko atang chuan a zirtirhote leh mipui tam tak nen a chhuah laiin kutdawt mitdel, Timaia fapa Bartimaia chu kawng sirah a lo thu a.

⁴⁷Tin, Nazaret Isua a ni tih a hriat veleh, "Isu, Davida Fapa, mi khawngaih rawh," tiin a au ta a.

⁴⁸Tin, mi tam takin ngawi turin an hau a; nimahsela ani chuan, "davida Fapa, mi khawngaih rawh," tiin a au zual sauh a.

⁴⁹Tin, Isua a ding a, "Amah chu han ko the u," a ti a. Tin, mitdel chu an ko a, a hnenah chuan, "Thlamuang takin awm la, tho rawh; a ko va che," an ti a.

⁵⁰Tin, ani chuan a puan a paih a, a zuang tho a, Isua hnenah a kal a.

⁵¹Tin, Isua'n amah chu a lo bia a, "I chungah engtia ka tih nge i duh?," a ti a. Tin, mitdel chuan a hnenah, "Rabboni, hmuh theih ka duh," a ti a.Tin, Isua'n a hnenah, "Kal tawh rawh, i rinna hi i dampui a ni e," a ti a. Tichuan a hmu thei ta nghal a, kalkawngah chuan Isua a zui ta a.

⁵²Tin, Isua'n a hnenah, "Kal tawh rawh, i rinna hi i dampui a ni e," a ti a. Tichuan a hmu thei ta nghal a, kalkawngah chuan Isua a zui ta a.