Read Baibul, Mizo Marka 11 Bible Online

Marka 11 - Baibul, Mizo bible

Marka 11

¹Tin, Jerusalem khua an thlen dawna Oliv tlanga Bethphage leh Bethani khaw kiang an thlenin, a zirtirte zinga mi pahnih a tir a,

²an hnenah, "In hma zawn khuaah sawn va kal ta u la; tin, in luh tiring sabengtung no thlun, tuma la chuan ngai lohna in va hmu mai ang; chu chu phelh u la, han kai rawh u.

³Tin, tupawhin, 'Kha kha engah nge in tih?' an tih che u chuan, 'Lalpain a duh a ni,hetah a rawn dah tir leh thuai ang e,' ti ang che u," a ti a.

⁴Tin, an kal ta a, kawtthlerah kawngkhar pawn lama sabengtung no thlun an va hmu a; tin, chu chu an phelh ta a.

⁵Tin, chuta ding tute emaw chuan an hnenah, "Sabengtung no kha engah nge in phelh?" an ti a.

⁶Tin, anni chuan Isua sawi ang tak khan an hnenah an sawi a; tichuan an kal an phal ta a.

⁷Tin, sabengtung no chu Isua hnenah an rawn kai a, a chungah chun an puante an phah a; tichuan a chungah a chuang ta a.

⁸Tin, mi tam takin kalkawngah chuan an puan an phah a; mi dangin loa mi chhawl satin an phah bawk a.

⁹Tin, a hma lama kalte leh a hnung lama rawn zuite chuan, "Hosanna! Lalpa hminga lo kal chu fakin awm rawh se,

¹⁰Ram lo thleng tur, kan Pa Davida ram chu chawimawiin awm rawh se. Chungnung berah khian Hosanna! tiin an au a.

¹¹Tin, Jerusalem khuaa Pathian biak inah chuan a va lut a; tin, engkim a en vel zawh chuan tlai lam pawh a lo ni ta a, a chhuak a, sawm leh pahnihte nen Bethani-ah an kal ta a.

¹²Tin, atukah chuan Bethani atanga a chhuah hnuin a ril a lo tam ta a.

¹³Tin, theipui kung hnah nei hla takah a han hmu a, "A rah ka hmu dah law maw," tiin a va kal a; tin, a va thlen chuanin a hnah chauh lo chu engmah a hmu lo a; theipui rah hun a ni lo reng a.

¹⁴Tichuan, Isua'n thing chu a bia a, "Tun achinah kumkhuain i lakah tuma'n rah ei tawh suh se," a ti a. A zirtirhote chuan chu chu an hria a.

¹⁵Tin, Jerusalem khua chu an thleng a, Pathian biak inah chuan a va lut a, biak ina englo zuartute leh leitute chu a hnawt chhuak ta a, tangka thlengtuho dawhkante leh thuro zuarho thutphahte pawh chu a nam thluksak bawk a;

¹⁶Tin, Pathian biak inah chuan tumahin bungrual an ken tlang a phal ta lo bawk a.

¹⁷Tin, an hnenah chuan, "'Ka in chu hnam tin tan tawngtaina in an ti ang,' tih ziak a ni lo em ni? Nangni erawh chuan suamhmangte pukah in siam zawk hi," tiin a zirtir ta a.

¹⁸Tin, puithiam lalte leh lehkhaziaktute chuan chu chu an hria a, amah an hlauh avangin a tihboralna turzia an zawng a; mipui zawng zawng chuan a zirtirna chu mak an ti hle si a.

¹⁹Tin, tlai lam apiangah khawpui ata chu a kal chhuak thin a.

²⁰Tin, zinga an kal pahin theipui kung chu a zung thlenga thi zo vekin an hmu ta a.

²¹Tichuan Petera'n a lo hre chhuak leh a, a hnenah chuan, "Rabbi, en teh! Theipui kung anchhia i lawh kha a thi zo ta," a ti a.

²²Tin, Isua'n an hnenah, "Pathian ring rawh u.

²³Tih tak meuhin ka hrilh a che u, tupawh he tlang hnenah hian, 'Lo insawn la, tuifinriatah lo inpaih rawh,' tia, a rilruaa ringhlel loa a sawi chu a lo thleng ngei ang tih ring apiangin an sawi ang apiang chu an hmu ang.

²⁴Chuvngin ka ti a che u, engkim in tawngtaia in dil apiang chu hmu tawhah inngai u la, tichuan in hmu ang.

²⁵Tin, tawngtaia in din hun apiangin tu chungah pawh thupawi eng emaw in neih chuan ngaidam rawh u; in Pa vana mi pawhin in bawhchhiatnate chu a ngaihdam theihna tur che uin," a ti a, a chhang a.

²⁶Nimahsela, in ngaihdam si loh chuan, in Pa vana miin in bawhchhiatte a ngaidam bik lo ang.

²⁷Tin, Jerusalem khua chu an thleng leh a; tin, Pathian biak ina a len laiin puithiam lalho te, lehkhaziaktuho te, upaho te chu a hnenah an lo kal a,

²⁸a hnenah chuan, "tu thuin nge he'ng thil hi i tih? Heng thil hi ti turin tuin nge thu pe che?" an ti a.

²⁹Tin, Isua'n an hnenah, "Kei pawhin thu kam khat ka zawt ve ang che u; mi chhang u la, tichuan tu thuin nge he'ng thil hi ka tih ka hrilh ang che u.

³⁰Johana baptisma kha vana mi thu nge, mihring thu? mi chhang rawh u," a ti a.

³¹Tin, an inngaihtuah a, " 'Vana mi thu,' kan tih chuan, 'Engah nge a thu in awi loh le?' min ti si ang a,

³²Mihring thu,' kan ti emaw chu ni ang?" an ti a. Nimahsela mipui chu an hlau a; mi zawng zawngin Johana chu zawlnei taktakah an ruat hlawm si a.Tichuan Isua an chhang a, "Kan hre lo," an ti a. Tin, Isua'n an hnenah, "Kei pawhin tu thuin nge he'ng thil hi ka tih ka hrilh bik lo ang che u," a ti a.

³³Tichuan Isua an chhang a, "Kan hre lo," an ti a. Tin, Isua'n an hnenah, "Kei pawhin tu thuin nge he'ng thil hi ka tih ka hrilh bik lo ang che u," a ti a.