Read Baibul, Mizo Marka 12 Bible Online

Marka 12 - Baibul, Mizo bible

Marka 12

¹Tin, tehkhin thuin an hnenah a sawi ta a: "Tuin emaw grep huan a siam a, palin a hung vel a, gep sawrna tur khur a lai a, in sang a sa a, lo enkawltute hnenah thlawhhlawh turin a pe a, ram dangah a kl ta a.

²Tin, a lawh hun chuan huana rah chu a chanai lo enkawltute hnen ata la turin lo enkawltute hnenah chuan a bawih pakhat a tir a.

³Tin, chu mi chu an lo man a, an vel a, kutruakin an kaltir leh ta a.

⁴Tin, bawih dang an hnenah a tir leh a; chu pawh chu lungin an deng a, a lu-ah an lo tipem a, zahthlak takin an lo sawisa a.

⁵Tin, bawih dang a tir leh pek a; chu mi chu an lo tihlum a. Bawih dang tam tak pawh - thenkhat an vel a, thenkhat an lo tihlum a.

⁶Tin, pakhat, fapa duh tak a la nei a; 'Ka fapa hi chu an zah ang,' tiin ani chu a hnuhnung berah an hnenah a tir a.

⁷Nimahsela chung lo enkawltute chuan, 'He mi hi roluahtu tur a ni; i that ang u khai! tichuan a roluah tur hi kan ta a ni mai ang,' an inti a.

⁸Tichuan ani chu an lo man a, an tihlum a, grep huan ata chu an theh chhuak ta a.

⁹Chutichuan huan neitupa chuan engtin nge a rawn tih ang? Lo enkawltute chu a rawn tiboral ang a, huan chu mi dangte a pe ang.

¹⁰He Pathian Lehkha thu hi in chhiar lo'm ni?'In satute lung duh loh kha, 'Chu ngei chu a kila lung tangkai ber a lo ni ta.

¹¹Chu chu Lalpa tih a ni a,Kan mithmuhah a mak a ni,'tih hi," a ti a.

¹²Tin, amah chu man an tum ta a, nimahsela mipui chu an hlau a; chu tehkhin thu chu anmahni demin a sawi tih an hre si a. Tichuan amah chu an kalsan a, an kal bo ta a.

¹³Tin, a thusawia man turin Pharisaite leh Heroda pawla mi tute emaw a hnenah an tir a.

¹⁴Tichuan anni chu an lo thlen chuan a hnenah, "Zirtirtu, mi dik tak i ni a, pawisak chuan tumah i nei lo tih kan hria, tumah thlei bik loin, tih tak zetin Pathian kawng thu i zirtir thin a ni; Kaisara hnena chhiah chawi hi a thiang nge thiang lo?

¹⁵Kan pe ang nge pe lo ang?" an ti a. Ani erawh chuan an vervekzia chu hriain, an hnenah, "engah nge mi fiah? Duli mi han lak u la, ka lo en ang e," a ti a.

¹⁶Tin, an rawn la a. Tin, ani chuan an hnenah, "Hei hi tu lem leh tu hming nge ni?" a ti a. Tin, anni chuan, "Kaisara," an ti a.

¹⁷Tin, Isua'n an hnenah, "Kaisara thilte chu Kaisara hnenah pe u la, Pathian thilte chu Pathian hnenah pe ta che u," a ti a. Tichuan mak an ti nasa em em a.

¹⁸Tin, Saddukaiho, thawhlehna a awm lo tite chu a hnenah an lo kal a; a hnenah,

¹⁹Zirtirtu, Mosia'n, 'Tupawh a unaupain fa nei loin a nupui thihsan se la, a unaupa chuan a nupui chu rochungin a uanupa tan chi a thlahsak tur a ni,' tiin min ziaksak a ni.

²⁰Aw le, sal sarih an awm a; a upa berin nupui a nei a, chi thlah loin a thi a.

²¹Tichuan a phanihna chuan a rochung a, chi thlah loin a thi leh bawk a; a pathumna chuan chutiang bawkin.

²²Tichuan sal sarihte chu chi reng reng thlah loin an thi zel a. A hnuhnung beran hmeichhia pawh chu a thi ta a.

²³Thawhleh hunah chuan a tu bera nupui nge ni ang? an pasarih chuan nupuiah an nei theuh si a," tiin an zawt a.

²⁴Isua'n an hnenah, "He mi avang hian a ni lawm ni, in ngaih sual thin, Pathian Lehkha Thu leh Pathian thiltihtheihna in hriat loh avang hian?

²⁵Mitthi zing ata an thawhlehin nupui pasal an innei dawn tawh lo a, vana vantirhkohte ang an ni dawn tawh zawk a ni.

²⁶Tin, mitthite kaihthawha an awm tur thu chu - Mosia lehkhabua hnim buk thuah khan, Puithiamin, 'Kei Abrahama Pathian, Isaaka Pathian, Jakoba Pathian ka ni,' ti a, a biakzia kha in chhiar lo em ni?

²⁷Ani chu mitthi Pathian a ni lo a, mi nung Pathian a ni zawk; in ngai sual nasa hle a ni," a ti a.

²⁸Tin, lehkhaziaktute zinga mi pakhat a lo kal a, an inhnial chu a lo ngaithla a, Isua'n anniho chu tha takin a chhang tih a hria a, a hnenah, "Thupek zawng zawngah eng hi nge ropui ber?" tiin a zawt a.

²⁹Isua'n, "A ropui ber chu hei hi a ni; 'Israelhote u, ngai teh u, Lalpa kan Pathian chu Lalpa pakhat chauh a ni a;

³⁰Lalpa i Pathian chu i thinlung zawng zawngin, i thlarau zawng zawngin, i rilru zawng zawngin, i chakna zawng zawngin i hmangaih tur a ni,' tih hi.

³¹A dawttu chu hei hi a ni, 'Nangmah i inhmangaih angin i vengte pawh i hmangaih tur a ni,' tih hi. Heng aia thupek ropui zawk reng reng hi a awm lo," tiin a chhang a.

³²Tin, lehkhaziaktu chuan a hnenah, "A ni tak e, zirtirtu, amah chu pakhat chauh a ni a, amah lo chu tumah dang an awm lo a,

³³Amah chu thinlung zawng zawnga, hriatna zawng zawnga, chakna zawng zawnga hmangaih a, mahni inhmangaih anga vengte hmangaih hi pumhal thilpek leh inthawina zawng zawng aiin a tha zawk em em tih hi i sawi dik zet mai," a ti a.

³⁴Tin, fing takin a chhang tih Isua'n a hriatin, a hnenah chuan, "Pathian ram I hlat lo e," a ti a. Chu mi chinah chuan tuma'n thu reng reng an zawt ngam ta lo.

³⁵Tin, Isua'n Pathian biak inah chuan a zirtir laiin anmahni a bia a, "Krista chu Davida fapa a ni tih lehkhaziaktuten engtiziaa sawi thin nge an nih?

³⁶Davida ngeiin, Thlarau Thianghlimin, Lalpa chuan, ka Lalpa hnenah 'I hmelmate i ke nghahchhana ka siam hma loh zawng ka ding lamah thu rawh,' a ti, a ti a.

³⁷Davida ngei chuan ani chu 'Lalpa,' a ti si a, khawiah nge a fapa a nih ang?" a ti a.Tin, vantlangho chuan lawm takin a thu an ngaithla a.

³⁸in, a zirtirnaah chuan, "Lehkhaziaktute lakah fimkhur rawh u; anni chuan kawr fual haa len an duh thin a, dawr hmunah chibai buk te,

³⁹inkhawmna inah thutphah tha ber te, ruaithehnaah hmun tha ber te an ngiat thin a:

⁴⁰hmeithai sum an ei a, tlang bumna'n rei tak an tawngtai thin; chungho chuan thiam loh an chang nasa lehzual ang," a ti a.

⁴¹Tin, thawhlawm bawm zawnah chuan a thu a, thawhlawm bawma mipuiho tangka thlakzia chu a en a; mi hausa tam takin hnem tak ang thlak a.

⁴²Tin, hmeithai rethei te a lo kal a, dar tangka dere pahnih a thlak a (chu chu pawisa pakhat hu a ni.)

⁴³Tin, Isua chuan a zirtirte a ko a, an hnenah, "tih tak meuhin ka hrilh a che u, thawhlawm bawma thlaktu zawng zawng ai hian he hmeithai rethei te hian a thlak tam zawk.Heng zawng zawng hian an neih liama mi an thlak a ni; ani erawh hi chuan a duh lai tak, a neih chhun tak, a intunnunna tur zawng zawng chu a thlak vek a ni," a ti a.

⁴⁴Heng zawng zawng hian an neih liama mi an thlak a ni; ani erawh hi chuan a duh lai tak, a neih chhun tak, a intunnunna tur zawng zawng chu a thlak vek a ni," a ti a.