Read Baibul, Mizo Marka 13 Bible Online

Marka 13 - Baibul, Mizo bible

Marka 13

¹Tin, Pathian biak in ata chu a kal chhuah laiin a zirtirte zinga mi pakhatin a hnenah, "Zirtirtu, en teh, a lung leh a inte hi a ropui the a nia!" a ti a.

²Tin, Isua'n a hnenah, "Heng in nasa tak hi i hmu maw? tihchim loha lung intiang reng reng hetah a awm lo ang," a ti a.

³Tin, Oliv Tlanga Pathian biak in zawna a thut laiin Petera te, Jakoba te, Johana te,Andria te chuan a hnenah,

⁴Chung chu engtikah nge a lo awm ang? chung zawng zawng chu a thlen dawn hunah chhinchhiahna eng nge awm ang? min hrilh rawh," tiin an zawt ru a.

⁵Tin, Isua'n an hnenah, "Tuma'n an tihder lohna'n che u fimkhur rawh u.

⁶Mi tam tak 'Krista chu ka ni,' tiin keima hming chhalin an lo kal ang a, mi tam tak an tihder ang.

⁷Tin, indo thu leh indo thu thangte in hriat hunin mangang suh ang che u; chung chu a lo thleng tur reng a ni; nimahsela tawpna chu a la ni rih lo ang.

⁸Hnam hrang leh hnam hrang an indo ang a, ram hrang leh ram hrang an indo vang a; hmun hrang hrangah lirte a nghing ang a; tam te a tla ang. Chung chu nau vei tantirhna a ni.

⁹Nimahsela, fimkhur rawh u; roreltute an mantir dawn che u a; inkhawmna inahte an vua ang che u a; keimah avangin hotute leh lalte hmaah anmahni hriattirna turin in la ding bawk ang.

¹⁰Tin, Chanchin Tha hi hnam zawng zawng hnena hrilh hmasak tur a ni.

¹¹Tin, an hruai che u a, an mantir hunah che u chuan, 'Engnge ka sawi ang,' tiin ngaihtuah lawk suh u; a hun takah chuan a hriattir che u apiang, chu ngei chu sawizawk rawh u; a sawitu chu nangni in ni dawn si lo a. Thlarau Thianghlim a ni zawk ang.

¹²Tin, tihhlum turin unaupa leh unaupa an inmantir ang a, pa pawhin a fa a mantir bawk ang; fate pawhin an nu leh an pate an do ang a, an tihhlumtir bawk ang.

¹³Keima hming avngin mi zawng zawng huat in ni ang; nimahsela a tawp thlenga tuar peih apiang chu, chu mi ngei chu chhandamin a awm ang.

¹⁴Nimahsela titiautu tenawm chu a din lohna tura ding inhmuh hunah, (a chhiar apiangin a awmzia hre rawh se) chu mi hunah chuan Judai rama awmte chu tlangahte tlan bo rawh se.

¹⁵Tin, in chunga awm chu chhuk suh se, a ina englo chuh turin lut hek suh se.

¹⁶Tin, loa awm chu a puan chuh turin kir leh suh se.

¹⁷Chu'ng ni chuan raite leh nauno pawmte chung chu a pik ang.

¹⁸Tin, chu'ng chu thlasika a lo thlen lohna'n tawngtai rawh u.

¹⁹Chung ni chu hrehawmna ni a ni dawn si a, chutianga nasa reng reng chu Pathian siam leilung pian tirh ata tun thlengin a la awm ngai lo a, engtikah mah a lo awm leh tawh hek lo ang.

²⁰Tin, Lalpa'n chung nite chu titawi suh se la mihring reng reng damin an chhuak lo vang; nimahsela mi thlan, a ruatate avang chuan nite chu a titawi a ni.

²¹Tin, chutih hunah chuan tupawhin, in hnenah, 'En teh u! sawta saw,' emaw an tih chuan awi suh ang che u;

²²Krista derte leh zawlnei derte an lo chhuak dawn si a, chung chuan chhinchhiahna leh thilmakte an ti ang, thei ang se la, thlante meuh pawh an tihder theihna'n.

²³Nangni erawh chu fimkhur rawh u, ngai teh u, engkim ka hrilh lawk tawh che u hi.

²⁴Nimahsela chung ni a, chung hrehawmna hnuah chuan, ni tihthimin a awm ang a, thla a eng tawh lo ang a,

²⁵van atangin arsite an lo tla ang a, vana thiltihtheihna awmte chu tihnghin a ni ang.

²⁶chutih hunah chuan Mihring Fapa hi thiltihtheihna nasa tak leh ropuina nasa tak nen chum zinga lo kal an hmu ang.

²⁷Chu mi hunah chuan vantirhkohte chu a tir chhuak ang a, a thlante chu kawl kil li ata - lei tawp atanga van tawp thlengin - a lawr khawm ang.

²⁸Tichuan theipui kungah hian a tehkhin thu zir rawh u: A tang a lo no a, a hnah a lo chawr chuan nipui a thaw dawn tih in hre thin;

²⁹chutiang bawkin nangni pawhin chung chu a lo thleng in hmuh hun chuan amah chu a lo hnai tawh a, kawngka bul ngeiah a awm tih hria ang che u,

³⁰Tih tak meuhin ka hrilh a che u, chung zawng zawng chu a thlen hma loh zawng tun lai chhuante hi an ral lo ang.

³¹Lei leh van a ral ang a, ka thu erawhchu a ral lo ang.

³²Nimahsela chu mi ni leh a dar thu chu Pa chauh lo chuan tuma'n, vana vantirhkohte pawhin, Fapa pawhin an hre lo.

³³Fimkhur u la, inring renga awmin tawngtai rawh u; a hun chu in hre si lo a.

³⁴Mi, a in kalsan a, a bawihte chu thu neihtir a, an hnathawh tur pe theuh a, kawngkhar vengtu pawh inrin tur thu pe zeta ram hla taka zin ta daih ang a ni.

³⁵Chutichuan inring rengin awm rawh u; in neitupa lo haw hun tur chu tlai lamah nge, zanah nge, ar khuanah nge, zingah nge a nih dawn in hre si lo;

³⁶chutilochuan a lo haw phutin, muhilin a rawn hmu hlauh dah ang che u.Tin, in hnena ka sawi hi mi zawng zawng hnena sawi ka ni. Inring rengin awm rawh u," a ti ta a.

³⁷Tin, in hnena ka sawi hi mi zawng zawng hnena sawi ka ni. Inring rengin awm rawh u," a ti ta a.