Read Baibul, Mizo Marka 14 Bible Online

Marka 14 - Baibul, Mizo bible

Marka 14

¹Tin, ni hnih chinah chuan Kalhlen Kut leh Chhang Dawidim telh loh Kut a awm dawn a; puithiam lalte leh lehkhaziaktute chuan amah chu ngamthlema man a, an tihhlum theihna turzia an zawng an zawng a;

²nimahsela, "Kut chhung chuan ni suh se, chutilochuan vantlang zingah buaina a lo awmhlauh dah ang e," an ti a.

³Tin, Bethani khuaa phar Simona inah chuan a awm laia chaw a kil laiin, hmeichhe pakhat alabasta bawma spiknard hriak rimtui to tak kengin a lo kal a, a bawm chu a tikeh a, a lu-ah a leih a.

⁴Nimhsela, thenkhat chu an tinur ta hlawm a, "eng atan nge hriak rimtui hi a tihboral mai mai ni?

⁵He hriak hi duli zathum aia tam zawka hralh a, mi rethei te hnena pek theih a ni si a," an ti a. Tichuan a chungah chuan an phunnawi ta a.

⁶Isua erawh chuan, "Engmah tih suh u; engah nge in tihbuai ni? ka chungah hian thil tha tak a ti a ni.

⁷Mi retheite chu kumkhuaa in hnena awm an ni a, in duh hun apiangin anni chu in khawngaih thei si a; kei erawh chu kumkhuaa in hnena awm tur ka ni lo.

⁸A tih theih tawk a ti a ni; ka taksa hi phum turin a lo hnawih lawk a nih hi.

⁹Tichuan tih tak meuhin ka hrilh a che u, khawvel zawng zawngah khawiah pawh Chanchin Tha an hrilhna apiangah he hmeichhe thiltih pawh hi amah hriat rengna turin an sawi ve zel ang," a ti a.

¹⁰Tin, Juda Iskariota, sawm leh pahnihte zinga mi pakhat khan, Isua chu an hnena a mantir theihna'n puithiam lalte hnenah a va kal a.

¹¹Tin, anni chuan a hriat veleh an lawm hle a, a hnenah tangka pek an tiam ta a. Tichuan a mantirna turzia remchang a zawng ta a.

¹²Tin, chhang dawidim telh loh ni, ni hmasa ber, Kalhlen Kutna beram no an talh thinna niah chuan a zirtirten a hnenah, "Kalhlen Kut chaw i ei theihna turin khawiah nge va buatsaih i la i duh?" an ti a.

¹³Tichuan a zirtirte zinga mi pahnih a tir a, an hnenah, "Khawpuiah va lut u la, chutah chuan mipa bela tui puin a tawk ang che u a; amah chu zui ang che u.

¹⁴Tin, a luhna apiangah chu in neitupa hnenah chuan, 'Zirtirtu chuan, Ka zirtirteho nen Kalhlen Kut chaw kan eina tur, ka mikhual pindan chu khawiah nge? A ti e,' ti ang che u.

¹⁵Tichuan amah ngei chuan pindan chungnung zau tak, bungraw awm sa peih diam, a entir ang che u; chutah chuan kan tan buatsaih ang che u," a ti a.

¹⁶Tin, zirtirte chu an chhuak ta a, khawpuiah chuan an va lut a, an hnena a sawi ang takin an hmu a; tin, Kalhlen Kut chaw chu an buatsaih ta a.

¹⁷Tin, khua a lo tlai lam chuan ani chu sawm leh pahnihte nen an va kal ta a.

¹⁸Tin, an kil a, an ei laiin Isua'n, "Tih tak meuhin ka hrilh a che u, in zinga mi pakhat, ka hnena ei ve ngei hian mi mantir ang," a ti a.

¹⁹Tin, an lungngai ta hle a, a mal malin a hnenah, "Keimah em ni?" an ti ta theuh a.

²⁰Tin, ani chuan an hnenah, "Sawm leh pahnihte zinga mi pakhat, thlenga mi chiahpuitu hi a ni.

²¹Mihring Fapa hi a chanchin an ziak ang tak khan a kal dawn a ni; nimahsela Mihring Fapa mantirtu tur mihring chung chu a pik e! Chu mihring chu piang suh se la a tan a tha zawk ang," a ti a.

²²Tin, an ei laiin Isua'n chhang a la a, mal a sawmsak zawhin a phel a, an hnenah a pe a, "La rawh u; hei hi ka taksa a ni," a ti a.

²³Tin, no a la a, lawmthu a sawi zawhin an hnenah a pe a; tichuan an zain an in ta theuh a.

²⁴Tin, ani chuan an hnenah, "Hei hi ka thisen, mi tam tak tana chhuak tur, thuthlunna chu a ni.

²⁵Tih tak meuhin ka hrilh a che u, Pathian rama a thar ka in ni a thlen hma loh zawng grep hrui raha mi ka in leh tawh lo ang," a ti a.

²⁶Tin, hla an sak zawhin an chhuak a, Oliv tlangah chuan an kal ta a.

²⁷Tin, Isua'n an hnenah, "In zain lungni loin in la awm vek ang, 'Beram vengtu chu ka vua ang a, beramte chu an darh ang,' tih ziak a ni si a.

²⁸Nimahsela ka thawhleh hnuin Galili ramah in hmaah ka kal ang," a ti a.

²⁹Petera erawh chuan a hnenah, "An zain lungni loin awm mah se la, kei zawng ka awm lo ang," a ti a.

³⁰Tin, Isua'n a hnenah, "Tih tak meuhin ka hrilh a che, vawiinah, zanin la laah hian, ar vawi hnih a khuan hmain, nangin vawi thum mi phat ang," a ti a.

³¹Ani erawh chuan nasa takin, "I thihnaah chuan thi ve dawn mah i la ka phat tawp lo ang che," a ti chiam a. Tin, chutiang bawk chuan an ti ta theuh a.

³²Tin, Gethsemane an tih hmun chu an thleng a; tin, ani chuan a zirtirte hnenah, "Ka tawngtai chhung zawng hetah hian lo thu rawh u," a ti a.

³³Tin, Petera te, Jakoba te, Johana te chu a hruai a, nasa takin a thlaphangin a lo mangang ta em em a.

³⁴Tichuan an hnenah, "Ka rilru a lungngai em em a, thihna khawp hial a ni; hetah hian awm u la, inring reng rawh u," a ti a.

³⁵Tin, tlemin hma lamah a va kal hlek a, leiah a bawkkhup a, theih ni se la, chu mi hun chuan amah pel turin a tawngtai a.

³⁶Abba! (Ka pa!) engkim i ti thei a; he no hi ka hnen ata la sawn rawh; nimahsela keia thu ni loin nangma thu thu ni zawk rawh se," a ti a.

³⁷Tin, a lo kal a, anniho chu muhilin a rawn hmu a; tichuan Petera hnenah, "Simon, i muhil a ni maw? Darkar khat pawh inring rengin i awm thei lo maw?

³⁸Thlemnaa in luh lohna'n inring rengin tawngtai rawh u. Thlarau zawngin a peih a, tisa erawh chu a chak lo a ni," a ti a.

³⁹Tin, a va kal leh a, a thusawi ngai sawiin a tawngtai leh a.

⁴⁰Tin, a lo let leh chuan anniho chu muhilin a rawn hmu leh a, an mut a chhuak hle si a; chhan ngaihna pawh an hre lo a.

⁴¹Tin, a lo kal vawi thumnaah chuan an hnenah, "Tunah zawng muhil u la, chawl tawh rawh u! A tawk tawh e; a hun chu a lo thleng ta; ngai teh u, Mihring Fapa hi mi sualte kutah an mantir dawn hi.

⁴²Tho u la, i kal ang u; en teh u, mi mantirtu tur chu a lo hnaih tak hi," a ti a.

⁴³Tin, a la sawi lai mekin Juda, sawm leh pahnihte zinga mi pakhat chu a lo thleng ta nghal a, ama rual chuan puithiam lalte leh lehkhaziaktute leh upate hnen ata mipuiho, khandaih leh talhtum kengin an lo thleng bawk a.

⁴⁴Tin, a mantirtu tur chuan, "Ka fawh apiang chu amah a ni ang; man u la, fel takin hruai bo ang che u," tiin chhinchhiahna tur a lo hrilh lawk tawh diam a.

⁴⁵Tichuan a thlen veleh amah a va pan ta nghal a, "Rabbi!" tiin a fawp ta ngawih ngawih a.

⁴⁶Tin, ani chu an chelh a, an man ta a.

⁴⁷Tin, a kianga dingte zinga mi tuin emaw a khandaih a phawi a, Puithiam Lalber bawih chu a sat a, a beng a sah thlaksak a.

⁴⁸Tin, Isua'n anniho chu a bia a, an hnenah, "Khandaihte, talhtumte kengin suamhmang man tur ang rengin mi man turin in lo chhuak a ni maw?

⁴⁹Pathian biak inah ni tin zirtirin in hnenah ka awm thin a, mi man si lo. Nimahsela Pathian Lehkha Thu chu a lo thlen theihna tur a nih hi," a ti a.

⁵⁰Tin, an zain amah chu an thlahthlam a, an tlan bo ta vek a.

⁵¹Tin, tlangval tuin emaw, puan zai sin chauh inbelin amah chu a zui a; tin, ani chu an lo man a;

⁵²nimahsela a puan zai sin chu a kalsan a, saruakin a tlan bo ta a.

⁵³Tin, Isua chu Puithiam Lalber hnenah an hruai a; tin, ama rual chuan puithiam lalte, upate, lehkhaziaktute zawng zawng an lo kal khawm a.

⁵⁴Tin, Petera'n hla tak atangin amah chu a zui a, Puithiam Lalber in hual chhung kawtlai thlengin; tin, chhiahhlawhte zingah mei lum aiin a thu ve a.

⁵⁵Tin, Isua an tihhlum theihna turin puithiam lalte leh roreltuteho zawng zawng chuan amah hekna an zawng a; an hmu si lo a.

⁵⁶Mi tam takin dawtin an hek a, nimahsela an hekna thu chu a inhmu thei si lo.

⁵⁷Tin, tute emaw an ding a, dawtin an hek a,

⁵⁸He mi hian, 'He Pathian biak in kuta sak hi ka thiat ang a, ni thum chhungin biak in dang, kuta sak loh mi, ka sa ang,' a tih kan hria," an ti a.

⁵⁹Nimahsela chuti pawh chuan an hekna thu pawh chu a inhmu thei chuang lo.

⁶⁰Tin, Puithiam Lalber chu a laiah a ding chhuak a, Isua hnenah, "Engmahin i chhang lo maw? Heng hian an hekna che hi engtizia nge ni?" tiin a zawt a.

⁶¹Ani erawh chu a ngawi reng a, engmahin a chhang lo. Puithiam Lalber chuan a hnenah, "Krista, Engthawla Fapa chu i ni em?" tiin a zawt leh a.

⁶²Tin, Isua'n, "Ni e; Mihring Fapa hi Thiltihtheihna ding lama thu a, van chhum zinga lo kal in la hmu dawn a ni," a ti a.

⁶³Tin Puithiam Lalber chuan a silhfente a pawtthler a, "Hretu dang engah nge kan ngaih tawh ang?

⁶⁴Pathian a sawichhiat zia in hre tawh a; engtin nge in ngaih?" a ti a. Tin, an zain ani chu thi tlakah an ruat hlawm a.

⁶⁵Tin, a thenin amah chu chil an chhak ta pang a, a hmai an tuam a, an hnek a, a hnenah, "Sawi rawh," an ti a. Tin, chhiahhlawhte chuan an chelh pahin an beng sawk sawk a.

⁶⁶Tin, Petera chu hnuai lama in hual chhung kawtlaiah chuan a awm laiin Puithiam Lalber rawngbawltu nu la zinga pakhat a lo kal a;

⁶⁷Petera mei lum ai chu a hmu a, a en a; "Nang pawh hi Isua, Nazaret mi hnena awm kha i nih hi," a ti a.

⁶⁸Ani erawh chuan, "I thu sawi chu ka hre hauh lo mai, a ngaihna reng pawh ka hre hek lo," tiin a pha a. Tin, sumhmunah chuan a va chhuak a; tichuan ar a khuang ta a.

⁶⁹Tin, nula chuan a hmu a, a kianga dingte hnenah chuan, "He mi hi an zinga mi a ni," a ti leh ta a.

⁷⁰Nimahsela a pha leh a. Tin, rei lo te achinah a kianga dingte chuan Petera hnenah, "An zinga mi i ni ngei mai, Galili rama mi i ni si a," an ti a.

⁷¹Ani erawh chuan, "Chu mihring in sawia chu ka hre lo," tiin anchhia inlawhin chhia a chham ta a.Tin, ar khuan vawi hnihna chu a khuang ta nghal a. Tin, Petera chuan Isua'n a hnena, "Ar vawi hnih a khuan hmain nangin vawi thum mi phat ang," a tih thu kha a lo hre chhuak leh ta a. Tin, chu chu a ngaihtuahin a tap ta a.

⁷²Tin, ar khuan vawi hnihna chu a khuang ta nghal a. Tin, Petera chuan Isua'n a hnena, "Ar vawi hnih a khuan hmain nangin vawi thum mi phat ang," a tih thu kha a lo hre chhuak leh ta a. Tin, chu chu a ngaihtuahin a tap ta a.