Read Baibul, Mizo Marka 16 Bible Online

Marka 16 - Baibul, Mizo bible

Marka 16

¹Tin, Chawlhni chu a lo ral chuan Mari Magdalini te, Mari Jakoba nu te, Salomi te chuan amah hnawih tura an va kal theihna'n englo rimtui an lei a.

²Tin, ni sarih ni hmasa berah, zing takah, ni chhuah hnuin thlan chu an va thleng a.

³Tin, "Thlan kawngka ata lung chu tuin nge min lum sawnsak ang aw?" an intih lai mekin,

⁴an han dak a, lung chu lum sawn sain an hmu ta a, a lian hle si a.

⁵Tin, thlan chhungah an lut a, tlangval pakhat puan var sin, ding lam panga thu an hmu a; an mangang ta a.

⁶Tichuan ani chuan an hnenah, "Mangang suh u; Isua, Nazaret mi an khenbeh kha, in zawng a ni awm a, a tho leh ta; hetah a awm tawh lo; en teh u, an zalhna hi!

⁷Nimahsela kal u la, a zirtirte leh Petera hnenah chuan, 'Galili ramah in hmaah a kal dawn a; in hnena a sawi ang ngei khan chutah chuan in hmu ang,' tiin hrilh rawh u," a ti a.

⁸Tichuan an lo khurh a, an lo mangan tak avangin, an chhuak a, thlan atang chuan an tlan ta vang vang a; an hlauh avangin tuma hnenah engmah an sawi lo.

⁹Tin, ni sarih ni hmasa ber zinga a thawhleh chuan Mari Magdalini, a kawchhung ata ramhuai pasarih a hnawh chhuaha hnenah khan a inlar hmasa ber a.

¹⁰Tin, ani chu Isua awmpui thinte hnenah a va kal a, mitthi ngaia an tap lai chu a hrilh ta a.

¹¹Nimahsela anni chuan a nung leh a, hmuh pawh a hmu tih an hre na a, an awi si lo.

¹²Tin, chu mi hnuah chuan an zinga mi pahnih ram lam pana an kal laiin hmel danglam puin an hnenah a inlar leh a.

¹³Tin, anni chuan zirtir dangte an va hrilh a, anni thu pawh chu an awi chuang lo.

¹⁴Tin, chu mi hnu lehah chuan chaw an kil laiin sawm leh pakhatte hnen ngeiah a inlar a, a thawhleh hnua a hmutute thu chu an awi loh avangin an rin loh leh an thinlung sak kawngah chuan a zilhhau ta a.

¹⁵Tin, an hnenah, "Khawvel zawng zawngah kal u la, thil siam zawng zawng hnenah chuan Chanchin Tha hi hril rawh u.

¹⁶A ringa baptisma chang chu chhandamin an awm ang a; a ring lo erawh chu thiam loh changin an awm ang.

¹⁷Tin, he'ng chhinchhiahnate hian ringtute chu a zui zel ang: Ka hmingin ramhuaite an hnawt chhuak ang a, tawng thartein an tawng ang a;

¹⁸rulte kutin an la ang a; thihna tur engpawh in mah se la engmah an ti lo ang a; damlote chungah an kut an nghat ang a, an dam zel ang," a ti a.

¹⁹Chutichuan, Lal Isua chu, an hnena thu a sawi zawh chuan vana hruai chhohin a awm a. Pathian ding lamah a han thu ta a.Tichuan anni chu an kal chhuak a, ram tinah thu an hril ta a, Lalpa'n anmahni a thawhpui a, a zuitu chhinchhiahnate chuanin thu chu a tinghet zel a. Amen.

²⁰Tichuan anni chu an kal chhuak a, ram tinah thu an hril ta a, Lalpa'n anmahni a thawhpui a, a zuitu chhinchhiahnate chuanin thu chu a tinghet zel a. Amen.