Read Baibul, Mizo Marka 2 Bible Online

Marka 2 - Baibul, Mizo bible

Marka 2

¹Tin, ni eng emaw zat lai hnuah Kapernaum khuaa a lo luh lehin, inah chuan a awm tih thu a lo thang ta a.

²Tichuan kawngka bulah pawh awmna reng awm lo khawp hialin mi tam tak an lo awm khawm ta a; tin, an hnenah thu a hril ta a.

³Tin zeng pakhat, mi paliina zawn, a hnenah an rawn hruai a.

⁴Tin, mipui avanga a kiang hnaia an lo kal theih loh avangin a awmna in chung chu an thiat ta a; tin, an reh pawh zawhin a awngphah chu a chunga mi zeng mu chawp chuan an zuk thlak a.

⁵Tichuan Isua'n an rinzia chu a lo hmuhin zeng hnenah chuan, "Ka fa, i sualte ngaihdam a ni tawh e," a ti a.

⁶Tin, lehkhaziaktu thenkhatte chu chutah chuan an thu a,

⁷He mi hian engati nge hetiang thu a sawi ni? Pathian a sawichhia a nih hi; mi pakhat, Pathian chauh lo chuan, tuin nge sualte ngaidam thei ni?" tiin an thinlungin an ngaihtuah a.

⁸Tin, Isua'n an rilruin chutiangin an ngaihtuah tih a rilruin a lo hre ta nghal a, an hnenah, "Chung thu chu engati nge in thinlunga in ngaihtuah ni?

⁹Zeng hnenah hian, 'I sualte ngaihdam a ni tawh,' tih leh, 'I awngphah lal la, kein kal tawh rawh,' tih hi a eng nge sawi awl zak?

¹⁰Engpawh ni se la, khawvelah Mihring Fapain sual ngaihdam theihna a nei tih in hriatna'n,' "(zeng hnenah chuan)

¹¹Tho la, i awngphah la la, i inah kal rawh, ka ti a che," a ti a.

¹²Tichuan ani chu a tho a, a awngphah chu a la ta nghal a, an zaa mithmuhin a kal chhuak ta a; chutichuan an zain mak an ti hle a, "Hetiang reng reng hi kan la hmu ngai lo," tiin Pathian an fak ta a.

¹³Tin, a chhuak leh a, dil kamah chuan a kal ta a; tin, mipui zawng zawng chu a hnenah an va kal a, a lo zirtir ta a.

¹⁴Tin, a kal pahin, Levia, Alphaia fapa chu chhiah chawina hmuna thu a hmu a, a hnenah, "Mi rawn zui rawh," a ti a. Tin, a tho a, a zui ta a.

¹⁵Tin, heti hi a ni a, Isua chuan Levia inah chuan chaw a kil a, chhiahkhawntute leh misual tam takin Isua leh a zirtirte chu an kilpui hlawm a; an tam hle si a, amah chu an zui ve bawk thin a.

¹⁶Tin, Pharisaite zinga lehkhaziaktute chuan Isua'n mi sual leh chhiahkhawntute a kilpui an hmuhin, a zirtirte hnenah chuan, "Engtizia nge chhiahkhawntute leh mi sualte hnenah a eia a in le?" an ti a.

¹⁷Tin, Isua'n chu chu a lo hria a, an hnenah chuan, "Mi chakte chuan daktawr an ngai lo a, mi bawrhsawmte zawkin an ngai a ni; mi fel takte lam tura lo kal ka ni lo a, mi sualte zawk lam tura lo kal ka ni," a ti a.

¹⁸Tin, Johana zirtirte leh Pharisaite chuan chaw an nghei a; tin, mi an lo kal a, Isua hnenah chuan, "Engati nge Johana zirtirte leh Pharisai zirtirte chuan chaw an nghei thin a, i zirtirte lemin an nghei ve thin loh?" an ti a.

¹⁹Isua'n an hnenah, "Mo hruaitute hnenah a pasal tur chu a awm chhung zawng mo hruaitute chuan chaw an nghei thei em ni? A pasal tur chu an hnena a awm chhung zawng an nghei thei lo ang.

²⁰Nimahsela a pasal tur chu an hnen ata hruai bo nite a la thleng ang a, chu mi niah erawh chuan an la nghei ang.

²¹Tuma'n puan hlui, puan la thlakmar loh themin an bel ngai lo; bel ang se la, a bel phuina tur chuan a kai tet zawk ang a, a thar chuan a hlui chu a kai tet ang a, a lo thler nasa lehzual ang.

²²Tin, tuma'n uain thar, savun uain peng hluahte an thun ngai lo; thun ang se la, uain chuan savun pengte chu a tawn puak ang a, uain leh savun pengte chu a boral ve ve ang; uain thar chu savun uain peng tharahte an thun zawk thin a ni," a ti a.

²³Tin, heti hi a ni a, Isua chu Chawlhniah chuan buh hmunahte a kal tlang a; tin, a zirtirte chuan an kal pahin buh vuite chu an thliak ta a.

²⁴Tin, Pharisaite chuan a hnenah, "en the, engati nge Chawlhnia tihthiang lo chu an tih ni?" an ti a.

²⁵Tin, ani chuan an hnenah, "Davida leh a thiante an tlakchhama an riltam laia a thiltih kha in chhiar lo em ni?

²⁶Khatia Abiathara Puithiam Lalber a nih lai a, Pathian ina a luh a, puithiamte chauh lo chuan ei thian loh chhangdah chu a ei a, a thiante hnena a pek ve thu kha?" a ti a.

²⁷Tin, amah vekin an hnenah chuan, "Chawlhni hi mihring tana siam a ni a, mihring hi Chawlhni tana siam a ni lo;Chutichuan, Mihring Fapa hi Chawlhni chungah lam pawh hian Lal a ni," a ti a.

²⁸Chutichuan, Mihring Fapa hi Chawlhni chungah lam pawh hian Lal a ni," a ti a.