Read Baibul, Mizo Marka 3 Bible Online

Marka 3 - Baibul, Mizo bible

Marka 3

¹Tin, inkhawmna inah chuan a lut leh a: chutah chuan mi pakhat kut zeng a lo awm a.

²Tin, amah an hek theihna'n Chawlhniin a tihdam dawn leh dawn loh an mitmei a.

³Tin, ani'n kut zeng hnenah chuan, "Lo ding chhuak rawh," a ti a.

⁴Tin, an hnenah chuan, "Chawlhniah hian tihthat nge thiang, tichhiat? chhandam nge thiang, tihhlum?" tiin a zawt a. Nimahsela an ngawi ta reng a.

⁵Tin, an thinlung sakzia chu pawi tihsak em emin, thinur chunga anmahni a en vel hnuin, chu mi hnenah chuan, "I kut phar rawh," a ti a. Tin, a han phar chhuak a, a kut chu a dam ta a.

⁶Tin, Pharisaite chu an chhuak a, amah an tihhlum theihnazia tur ngaihtuahin Heroda pawla mite nen chuan an inrawn ta nghal a.

⁷Tin, Isua chu a zirtirte nen dil lamah chuan an kal bo a; tin, Galili ram atangin mipui tam takin an zui ta a.

⁸Tin, a thiltih ropuizia chu an hriatin Judai ram atang te, Jerusalem khua atang te, Idumai ram atang te, Jordan ral atang te, Tura leh Sidon khaw vel atangtein mipui tam tak a hnenah an lo kal ve a.

⁹Tin, mipui avang chuan a tan lawngleng lo ruatsak turin a zirtirte a hrilh a, "Chutilochuan mi nek huai huai dah ang e," a ti a.

¹⁰Mi tam tak a tidam tawh si a; chutichuan na nei apiangin amah an deh theihna turin an bawh huai huai a.

¹¹Ramhuai bawlhhlawhte pawhin amah chu an hmuh apiangin a hmaah bawkkhupin, "Nang Pathian Fapa chu i ni," tiin an au thin a.

¹²Tin, ani chuan a chanchin chu puan loh tur an hnenah a ti tlat zel a.

¹³Tin, tlangah chuan a han kal a, amahin a duhzawng apiangte chu a ko a; tin, anni chu a hnenah an han kal a.

¹⁴Tin, a hnena an awm theihna'n leh thu hril tur leh

¹⁵ramhuaite hnawh chhuahna thu nei tura a tirh chhuah theihna'n, sawm leh pahnih a ruat a.

¹⁶Chungte chu Simona, Petera a vuah te,

¹⁷Zebedaia fapa Jakoba leh Jakoba unau Johana te, (chu mite chu 'Boanergea' a vuah a, chu chu 'Khawpuiri Fate' tihna a ni.)

¹⁸Andria te, Philipa te, Bartholomaia te, Matthaia te, Thoma te, Alphaia fapa Jakoba te, Thaddaia te, Kanana mi Simona te,

¹⁹a mantirtu Juda Iskariota te an ni.

²⁰Tin, inah a va lut a. Tin, mipui chu an lo kal khawm leh a, chutichuan chhang takngial pawh an ei thei ta lo a.

²¹Tin, a chhungte chuan chu chu an hriatin, "A a a nih chu le," tiin amah man tumin an thawk a.

²²Tin, lehkhaziaktute Jerusalem khua atanga lo chhukte chuan, "Beelzebula a zawl a nih hi," an ti a, "Ramhuai lal avangin alawm ramhuaite a hnawh chhuah thin ni," an ti bawk a.

²³Tin, Isua chuan lehkhaziaktute chu a ko a, tehkhin thuin an hnenah, "Setanan Setana vek engtin nge a hnawh chhuah theih?

²⁴Ram pawh mahni a indo chuan, chu mi ram chu a ding chhuak thei lo ang.

²⁵Chhung khat pawh mahni an indo chuan, chu mite chhung chu an ding chhuak thei lo ang.

²⁶Setana pawh mahni indoin a inkhin si chuan a ding chhuak thei lo ang a, a boral mai zawk ang.

²⁷Tuma'n mi chak ina lutin a sum chu an laksak thei thin lo, mi chak chu an phuar hmasak zet loh chuan; chu mi hnuah erawh chuan a in chu an ramsak mai ang.

²⁸Tih tak meuhin ka hrilh a che u. Mihring fate hi an sualna zawng zawngah leh Pathian sawichhiatna kawngah engah pawh an sawichhiatnaahte chuan ngaihdam an ni ang;

²⁹tupawh Thlarau Thianghlim meuh sawichhia erawh chuan engtikah mah ngaihdamna a hmu lo ang a, chatuan sualna kawngah chuan thiam lohin a lo awm zawk ang," a ti a.

³⁰("Ramhuai bawlhhlawh a zawl a ni," an tih avang khan chu chu a sawi a ni.)

³¹Tin, a nu leh a unaute chu an lo kal a, pawnah an ding a, amah kovah mi an tir a.

³²Tin, a velah chuan mipui an lo thu hlawm a; tin, a hnenah chuan, "Ngai teh, pawnah sawn i nu leh i unauten an zawng a che," an ti a.

³³Tin, ani chuan an hnenah, "Ka nu leh ka unaute chu tute nge ni?" tiin a chhang a.

³⁴Tin, a kiang vela thute chu a han en vel a, "En teh u, ka nu leh ka unaute hi!Tupawh Pathian duhzawng ti apiang chu, chu mite ngei chu ka unaute, ka farnute, ka nute an ni a sin," a ti a.

³⁵Tupawh Pathian duhzawng ti apiang chu, chu mite ngei chu ka unaute, ka farnute, ka nute an ni a sin," a ti a.