Read Baibul, Mizo Marka 4 Bible Online

Marka 4 - Baibul, Mizo bible

Marka 4

¹Tin, dil kamah chuan a zirtir leh ta a. Tin, mipui tam tak mai a hnenah an rawninkhawm a, chutichuan dilah chuan lawngah a chuang a, a thu a; mipuiho zawng zawng chu dil kama khawmualah chuan an awm a.

²Tin, tehkhin thuin thu tam tak a zirtir a; a zirtirnaah chuan an hnenah,

³Ngaithla u la, en teh u; buh chi thehtu buh chi theihin a feh a;

⁴tin, heti hi a lo ni a, a theh laiin a then kalkawng dungah a tla a, savaten an rawn tlan zo ta a.

⁵Tin, a then pialtlep chung lei pan hmunah a tla a; lei a chhah loh avangin a to ta nghal a;

⁶nimahsela ni a lo tlangsan deuhin em vuaiin a lo awm a, zung a neih loh avangin a rawp ta mai a.

⁷Tin, a then hnimhlingnei zingah a tla a, hnim chu a lo to sang a, a dipral ta a, rah reng reng a rah ta lo a.

⁸Tin, a then lei thaah a tla a, a to a, a thang lian a, a rah ta a; sawmthum te, sawmruk te, za tein a pung ta hlawm a," a ti a.

⁹Tin, amah vekin, "Tupawh hriatna tura bengnei chuan hre rawh se," a ti a.

¹⁰Tin, fianriala a awm laiin sawm leh pahnihte leh a thuihruai dangte chuan tehkhin thute chu an zawt fiah a.

¹¹Tin, ani chuan an hnenah, "Pathian ram thuruk chu nangni hriat zawng phal a ni a, pawna mite tan erawh chuan engkim tehkhin thua tih a ni;

¹²chutichuan, 'Hmuh zawng an hmu thei na a, hriat erawh chu an hriat theih lohna tur leh, beng zawngin an hre thei na a, a ngaihna erawh chu an hriat theih lohna turin, chutilochuan an hawi kir leh ang a, ngaihdam an lo ni hlauh dah ang e,'" a ti a.

¹³Tin, amah vekin an hnenah chuan, "He tehkhin thu hi in hre thei lo maw? Chuti a nih chuan engtin nge tehkhin thu dang zawng zawngte chu in hriat hleih ang?

¹⁴Buh chi thehtu chuan thu chu a theh a ni.

¹⁵Tin, kawng dunga thu thehnate chu he'ng hi an ni: thu an hriat veleh Setana chuan an rilrua thu theh chu a laksak nghal thin.

¹⁶Tin, chutiang bawkin pialtlep chunga theh chu he'ng hi an ni: thu anhriat veleh lawm taka pawm nghalte hi;

¹⁷nimahsela anmahniah chuan zung reng an nei lo a, rei lo te chauh an awm a; chu mi hnuah chuan thu avanga hrehawmna emaw, tihduhdahna emaw a lo awm veleh an tlu nghal mai thin.

¹⁸Tin, mi dangte chu hnimhlingnei zinga theh chu an ni a: chungte chuan thu chu an hre tawh a,

¹⁹nimahsela, khawvel lungkhamnate, hausakna bumna te, thil dang chaknate chu a lo luhin, thu chu a dip a, rah loin a lo awm thin.

²⁰Tin, lei thaa theh chu he'ng hi an ni: thu chu hriaa, pawma, a leh sawmthum te, a leh sawmruk te, a leh za tea rahte hi an ni," a ti a.

²¹Tin, amah vekin an hnenah chuan, "Khawnvar chu a dahnaa dah lo a, hrai hnuaiah emaw, khum hnuaiah emaw dah turin an rawn la ngai em ni?

²²Puang lo tura zep engmah a awm si lo a, lang lo tura thuhruk engmah a awm hek lo.

²³Tupawhinhriatna tura beng an neih chuan hre rawh se," a ti a.

²⁴Tin, amah vekin an hnenah chuan, "In ngaihthlak chu eng nge a nih fimkhur rawh u; in tehna ngai bawkin an tehsak ang che u a, an pe tam zawk mah ang che u.

²⁵Tupawh a nei chu an pe belhchhah ang a; tupawh a nei lo chu a neih chhun pawh an laksak ang," a ti a.

²⁶Tin, amah vekin, "Pathian ram chu hetiang hi a ni: miin leiah hian chi theh sela,

²⁷zanah muhilin chhunah tho thin se la, chi chu, a zia a hriat lohin, lo tiakin lo thang se la; chutiang chu a ni.

²⁸Lei hian amahin rah a chhuah thin; a tir berah a kung, chu mi hnuah chuan a vui; tin, chu mi hnu lehah a vuiah chuan buh fang pum chu.

²⁹Nimahsela, rah chu a lo hmin hunin, buh lak a lo hun tak avangin, favah chu a phawrh nghal thin," a ti a.

³⁰Tin, amah vekin, "Pathian ram chu engtin nge kan tehkhin ang? a nih loh leh, eng tehkhin thuin nge kan tehkhin ang?

³¹Antam chi fang khat leia an thehin, leia chi zawng zawng aiin te ber mah se la,

³²a theh hnuah erawh chuan a lo tiak a, thlai zawng zawng aiin a lo lian ta zawk a, zar lian tak takte a lo nei a, chutichuan chungleng savate chu a bukah chuan an riak thei thin; chutiang chu a ni," a ti a.

³³Tin, chutiang tehkhin thu tam tak chuan an hriat theih tawk tawkin thu chu an hnenah a sawi thin a.

³⁴Nimahsela, tehkhin thu loin an hnenah thu a sawi ngai lo; amaha zirtirte hnenah erawh chuan fianrialah engkim a hrilhfiah thin a ni.

³⁵Tin, chu mi ni vekah chuan khua a lo tlai lamin, ani chuan an hnenah, "Ral lehlamah sawn i kai ang u," a ti a.

³⁶Tichuan, mipuite chu kalsanin, amah chu a awm pangngai ang chuan lawngah chuan an kalpui ta nghal a. Lawng dangte pawh a hnenah a awm a.

³⁷Tin, thlipui nasa tak a lo tleh a, tuifawnte chu lawngah chuan a lo fawn lut hlawp hlawp a, chutichuan lawng chu a lo khat dawn ta mai a.

³⁸Tin, ani chu lukham chu khama muhilin, lawng mei lamah chuan a awm a. Tin, an kaitho a, a hnenah chuan, "Zirtirtu, kan boral hi pawi i ti lo em ni?" an ti a.

³⁹Tin, ani chu a lo harh a, thli chu a hau a, dil hnenah pawh chuan, "Ngawi la, awm hle hle rawh!" a ti a. Tin, thli chu a bang a, a lo reh ta thup mai a.

⁴⁰Tin, ani chuan an hnenah, "engati nge chuti ema in hlauh ni le? Rinna reng in la nei lo a ni maw?" a ti a.Tin, hlauh namenin an hlau ta lo a, "He mi hi tu nge ni le, thli leh dil lam pawhin a thu an awi hi?" an inti hlawm a.

⁴¹Tin, hlauh namenin an hlau ta lo a, "He mi hi tu nge ni le, thli leh dil lam pawhin a thu an awi hi?" an inti hlawm a.