Read Baibul, Mizo Marka 5 Bible Online

Marka 5 - Baibul, Mizo bible

Marka 5

¹Tin, dil ral, Gerasin mite ram chu an lo thleng a.

²Tin, lawng ata a chhuah hnu chuan mi pakhat, ramhuai bawlhhlawh pai, thlan atanga lo chhuakin a rawn tawk ta nghal a;

³chu mi chuan thlanahte chuan awmna a nei thin a, tumahin khaidiat pawhin an phuar thei tawh lo a;

⁴kawlte leh khaidiatte pawhin an phuar fo tawh si a; nimahsela khaidiatte chu a pawt chat a, kawlte pawh chu a tisawm thin a; tumahin an tidawl zo hek lo.

⁵A chhun a zanin thlanahte leh tlangahte chuan a au a au thin a, lungte pawhin a inzai fo thin.

⁶Tin, hla tak atangin Isua chu a hmuh veleh a tlan a, chibai a va buk a;

⁷tin, aw ring taka auin, "Isu, Pathian chungnungbera Fapa, kei leh nang eng nge kan inzawlna awm? Mi nghaisa lul lo turin Pathian hmingin ka ngen chiam a che," a ti a.

⁸(Isua chuan a hnenah "Nang, ramhuai bawlhhlawhpa, mihring chhung ata hi chhuak rawh," a lo ti tawh si a.)

⁹Tin, ani chuan, "I hming eng nge ni?" tiin a zawt a. Tin, ani'n a hnenah, "Ka hming chu Nuaia a ni, tam tak kan ni si a," a ti a.

¹⁰Tin, chu mi ram ata chu anmahni tir chhuak lo turin Isua hnenah a ngen ta chiam a.

¹¹Tin, chuta tlang pangah chuan vawk rual tam tak an tla a.

¹²Tin, ramhuai bawlhhlawhte chuan, "Vawk kawchhungahte sawn min luhtir rawh, anmahnia kan luh theihna'n," tiin a hnenah an ngen a.

¹³Tin, ani chuan thu a pe a. Tichuan ramhuai bawlhhlawhte chu an chhuak a, vawk kawchhungahte chuan an lut a; tichuan vawk rual chu (sanghnih lai an ni a) khamah an tlan chhuk chiam a, dilah an tlan lut ta a; tin, dilah chuan tui hakin an thi ta a.

¹⁴Tin, a vulhtute chu an tlan a, khuaah leh loahte chuan an sawi a. Tin, "Engnge lo ni ta?" tia en turin an lo kal hlawm a.

¹⁵Tin, Isua hnen an lo thleng a, ramhuaiman, nuaia mana kha, puan sin a, rilru pangngai pua thu an rawnhmu a; tichuan an hlau ta a.

¹⁶Tin, a hretute chuan ramhuai mana chunga thil thlenzia leh vawk chanchinte chu chungho chu an lo hrilh a.

¹⁷Tin, chunghote chuan ani chu an ram ata chhuak turin an ngen ta a.

¹⁸Tin, lawnga a chuan dawn lai takin ramhuai man hnua khan Isua hnena awm reng a ngen a.

¹⁹Nimahsela Isua'n a phal lo a, a hnenah, "I inah i thiante hnenah hawl la, Lalpa'n i tan thil a tihsak che hi a ropuizia leh a khawngaihzia che hi va hrilh rawh," a ti ta zawk a.

²⁰Tichuan a kal a, Dekapoli khuaahte chuan Isua'n a tan thil a tihsak ropuizia chu a tlangaupui ta a; tin, mi zawng zawng chuan mak an ti hle a.

²¹Tin, Isua chu lawnga ral lehlama a lo kai leh chuan mipui tam tak a hnenah an lo kal khawm a; tin, ani chu dil kamah a awm a.

²²Tin, inkhawmna in hotute zinga mi pakhat, a hming Jaira chu a lo kal ; Isua a hmuh veleh a ke bulah a bawkkhup a,

²³Ka fanu naupang te a thi lek lek a; a lo harha a lo dam theihna'n lo kala a chunga i kut nghat turin ka ngen a che," tiin a ngen chiam a.

²⁴Tichuan Isua a hnenah a va kal a; tin mipui tam takin an zui a, an nek huai huai a.

²⁵Tin, hmeichhe pakhat kum sawm leh kum hnih thi putin a dam lo a,

²⁶daktawr tam tak lakah nasa takin a tuar tawh a, a neih zwng zawng pawh a dekral zo tawh a, thathnem ahnekin a lo zual zawk mah a;

²⁷chu mi chuan Isua chanchin thute chu a lo hria a, a hnunga mipui zingah chuan a lo kal a, a puan chu a dek a.

²⁸A puan chauh pawh dek i la, tihdamin ka awm mai ang," tih a rilruk a ni.

²⁹Tin, chawplehchilhin a thi put chu a reh ta nghal a, a na chu tihdam a ni tih a taksaah a inhre ta a.

³⁰Tin, Isua chuan a chhung ata thiltihtheihna chhuak thin chu a chhuak tih a lo hria a, mipui zingah chuan a hawi vel ta nghal a, "Tunge ka puante dek kha?" a ti a.

³¹Tin, a zirtirte chuan a hnenah, "Mipuiin an nek huai huai che hi i hmu si a, 'Tunge mi dek?' engtiziaa ti nge i nih leh?" an ti a.

³²Tin, ani chuan chu mi titu chu hmuh tumin a en vel a.

³³Chutichuan hmeichhia chuan a chunga thil a tihsak chu hriain, hlau leh khur chungin a lo kal a, a hmaah bawkkhup a, a hnenah thu dik takin a hrilh ta vek a.

³⁴Tin, ani chuan a hnenah, "Ka fanu, i rinna hi i dampui a ni e, thlamuang takinkal la, i natna ata chu lo dam hlen tawh ang che," a ti a.

³⁵A la tawng lai mekin inkhawmna in hotu in ata chu mi an lo kal a, "I fanu a thi ta; engah nge zirtirtu hi i la tihhah cheu dawn?" an ti a.

³⁶Isua erawh chuan an thu sawi chu bengkhawn loin, inkhawmna in hotu hnenah chuan, "Hlau suh, ring mai rawh," a ti a.

³⁷Tin, Petera te, Jakoba te, Jakoba unau Johana te chauh lo chu tumah amah zui ve a phal ta lo a.

³⁸Tin, inkhawmna in hotu in chu an va thleng a, Isua chuan an lo buai mur mur leh an lo tap tuar tuar a, an lo chiau vak vak chu a hmu a.

³⁹Tin, a va luh chuan an hnenah, "engati nge in bengchhena in tah ni? naupang chu a thi lo e, a muhil a ni zawk," a ti a.

⁴⁰Tin, anni chuan an nuihsan ta mai a. Ani erawh chuan an zain a hnawt chhuak a, naupang nu leh pa leh a hnena awmte chu a hruai a, naupang awmnaah chuan a va lut a.

⁴¹Tin, naupang kut chu a chelh a, a hnenah chuan, "Talitha Kumi!" a ti a, (chu chu "Chemte, tho rawh, ka ti a che," tihna a ni.)

⁴²Tin, hmeichhe naupang chu a lo tho a, a kal thei ta nghal a; amah chu kum sawm leh kum hnih mi a ni tawh reng a. Tin, anni chuan mak tih namenin mak an ti lo a.Tin, ani'n an hnenah, "Hei hi tuma'n hre suh se," a ti tlat a; tin, ei tur pek tur thu a pe a.

⁴³Tin, ani'n an hnenah, "Hei hi tuma'n hre suh se," a ti tlat a; tin, ei tur pek tur thu a pe a.