Read Baibul, Mizo Marka 6 Bible Online

Marka 6 - Baibul, Mizo bible

Marka 6

¹Tin, chuta ta chu a chhuak a, a awmna khaw lam chu a thleng ta a; a zirtirte chuan an zui zel a.

²Tin, chawlhni a lo ni a, inkhawmna inah a zirtir ta a; tin, mi tam tak a thu hriate chuan, "He mi hian he'ng thute hi khawi ata nge a hriat ni? He mi hnena finna pek hi eng finna nge ni? A kutin heti kauva thilmak a tih hi engtizia nge ni?

³He mi hi Mari fapa, Jakoba te, Josea te, Juda te, Simona te unaupa, thingrem siamtu kha a ni lo em ni?" A farnute pawh hetah kan hnena awm an ni lo em ni?" an ti a, mak an ti hle a. Tichuan a chungah an lungni ta lo a.

⁴Tin, Isua'n an hnenah, "Zawlnei chu ama khaw lamah te, ama laichin zingah te, ama inah te chauh lo chuan chawimawi lohin a awm ngai lo," a ti a.

⁵Tin, mi damlo tlemte chunga kut nghata a tihdam chauh lo chu, chutah chuan thil mak reng a ti thei lo a.

⁶An rin loh avangin mak a ti hle a. Tin, zirtir chung zelin khuate chu a fang vel a.

⁷Tin, sawm leh pahnihte chu a ko a, pahnih zelin a tir chhuak ta a; ramhuai bawlhhlawhte chunga thuneihna a pe bawk a.

⁸Tin, an zinna atan tiang chauh lo chu engmah - chhang pawh, ipte pawh, an kawnghrena tangka pawh - ken loh tur a ti tlat a;

⁹pheikhawk erawh chu bun tur a ti a; "Kawr pahnih ha suh u," a ti bawk a.

¹⁰Tin, amah vekin an hnenah, "Khawiah pawh in thlenna inah chuan, chuta ta in chhuah hma loh chu thleng reng ang che u.

¹¹Tin, khawii khua pawhin an lawm loh che u a, in thu an ngaihthlak lohna apiangah, chuta tanga in chhuah hun chuan anmahni hriattirna turin in kephah hnuaia vaivut kai chu thing thla ang che u," a ti a.

¹²Tichuan an kal chhuak a, simna tur thu an hrilh a;

¹³ramhuai tam tak pawh an hnawt chhuak a, dam lo tam tak pawh hriak an hnawih a, an tidam bawk a.

¹⁴Tin, lal Heroda chuan a lo hria a, a hming chu a lo thang ta si a; "Baptistu Johana kha mitthi zing ata a lo tho leh ta a, chuvangin chung thiltihtheihnate chuan amahah a thawk a nih chu," a ti a.

¹⁵Mi dang erawh chuan, "elija a nih chu," an ti a; mi dangin, "Zawlnei a nih chu, zawlneite zinga pakhat ang kha," an ti a.

¹⁶Heroda erawh chuan a lo hriatin, "Johana, a lu ka tana ngei kha, a lo tho leh ta a nih chu," a ti a.

¹⁷Heroda ngei chuan a unau Philipa nupui Herodi avangin mi a tir chhuak a, Johana chu a mantir a, tan inah phuar chungin a lo khung tawh si a; Herodi chu nupuiah a lo nei tawh si a;

¹⁸Johana chuan Heroda hnenah, "I unau nupui i neihsak hi a thiang lo a ni," a lo ti tawh bawk a ni.

¹⁹Chuvngin Herodi chuan amah chu a hal riau a, tihhlum a chak a; nimahsela a thei si lo a.

²⁰Herodan Johana chu mi fel leh thianghlim tak a ni tih a hriat avangin amah chu a hlau a, a humhim tlat si a; a thu a ngaihthlak chuan a mangang hle thin a; nimahsela lawm takin a ngaithla si thin.

²¹Tin, Herodan a pian champhaphak niah chuan a mi ropuihote, sipai hotu lian hote, Galili rama mi lianhote tana zana ruai a theh laiin hun remchang a lo awm ta a.

²²Herodi fanu ngei chu a lo lut a, a lam a, Heroda leh a chaw kilpuite chu a tilawm ta a; tichuan lal chuan hmeichhe naupang hnenah chuan, "I duh apiang mi dil rawh, ka pe ang che," a ti a.

²³Engpawh mi dil apiang chu, ka ram chanve hial pawh ka pe ang che," tiin a hnenah chhia a chham bawk a.

²⁴Tin, ani chu a chhuak a, a nu hnenah chuan, "Engnge ka dil ang?" a va ti a. Tin, ani chuan, "Baptistu Johana lu le," a lo ti a.

²⁵Tin, ani chu hmanhmawh takin lal hnenah chuan a va lut ta nghal a, "Thlengin Baptistu Johana lu i mi pek nghal ka duh a ni," tiin a dil a.

²⁶Tin, lal chu a lungngai ta em em mai a, nimahsela a chhechhamte leh a chaw kilpuite avang chuan a lo hnial duh lo a.

²⁷Tin, lal chuan a vengtu sipai pakhat a tir ta nghal a, a lu rawn lak tur thu a pe a. Tin, ani chuan tan inah chuan a lu a va tan a,

²⁸a lu chu thlengin a rawn la a, hmeichhe naupang hnenah chuan a pe a; tin, hmeichhe naupang chuan a nu hnenah a pe a.

²⁹Tin, a zirtirte chuan an hriat veleh a ruang chu an va hlawm a, thlanah an zalh ta a.

³⁰Tin, tirhkohte chu Isua hnenah an rawn inkhawm a, engkim, an thiltih apiang leh an zirtir apiang an hrilh a.

³¹Tin, ani chuan an hnenah, "Nangmahniho ngwtin thlaler hmunah ahrangin lo kal u la, chawl rih rawh u," a ti a. (Mi tam tak an insul zut zut a, chaw takngial pawh an ei hman si lo a.)

³²Tichuan thlaler hmun panin lawngin an va kal hrang ta a.

³³Tin, mitten an kal lai chu an hmu a, mi tam takin anmahni chu an hria a, khaw tin ata chutah chuan kein an tlan khawm a, an lo lehkhalh ta a.

³⁴Tichuan ani chu vukama a chhuah chuan mipui tam tak a hmu a, vengtu nei lo beramte ang an nih avangin a khawngaih ta em em a, thu tam tak a zirtir ta a.

³⁵Tin, khua chu a lo tlai ta hle a, zirtirte chu a hnenah an lo kal a, "Hei hi thlaler hmun a ni a, khua pawh a tlai tawh si a;

³⁶anniho hi kan kiang vel loah leh khuaahte kalin, an ei tur eng emaw tal an lei theihna'n kaltir ta che," an ti a.

³⁷Ani erawh chuan an hnenah, "Nangmahni'n ei tur pe rawh u," tiin a chhang a. Tin, anni chuan a hnenah, "Chhang duli zahnih man va leiin ei tur kan pe em ni ang?" an ti a.

³⁸Tin, ani chuan an hnenah, "Chhangper engzat nge in neih? han en teh u," a ti a. Tin, an neih chin an hriat veleh, "Panga, sangha pahnih nen," an ti a.

³⁹Tin, ani chuan an vaiin hlobet hring chungah chuan apawl zelin thuttir turin an hnenah thu a pe a.

⁴⁰Tin, atlarin zakhat te, sawmnga te zelin an thu ta hlawm a.

⁴¹Tin, ani chuan chhangper panga leh sangha pahnih chu a la a, van lam enin mal a sawm a, chhangperte chu a phel a, an hmaa hlui turin a zirtirte hnenah chuan a pe a; sangha pahnih pawh chu mi zawng zawng zingah a sem bawk a.

⁴²Tin, an vaiin an ei a, an puar ta hlawm a.

⁴³Tin, chhang nawi leh sangha nawite chu bawmrang sawm leh pahnih an rut khat a.

⁴⁴Chhangper eitute chu patling hlir pawh sangnga an ni a.

⁴⁵Tin, amah ngeiin mipui chu a tintir vel chhungin ral lehlama Bethsaida khuaa lo kal hmasa turin a zirtirte chu lawngah a chuan luihtir ta nghal a.

⁴⁶Tin, anni chu a tintir hnu chuan tawngtai turin tlangah chuan a kal ta a.

⁴⁷Tin, khua a lo tlai lamin, lawng chu dil lai takah chuan a lo awm a, ani chu amah chauhin khawmualah chuan a awm a,

⁴⁸Tin, an lawng karah chuan an mangangin a hmu a, (thliin a ni lo lamah a nem si a). khawfing chah dawn lai velin dil chungah kea kalin an lam a rawn pan a; anmahni kal pelh a tum a.

⁴⁹Nimahsela anni chuan amah chu dil chunga kea a kal an han hmuh chuan hmuithla emaw an ti a, an au ta vak mai a,

⁵⁰an vaiin amah an hmu a, an thlaphang hle a. Nimahsela ani chuan anmahni a be ta nghal a, anhnenah, "Thlamuang takin awm rawh u; keimah ka ni alawm; hlau suh u," a ti a.

⁵¹Tin, lawngah chuan an hnenah a chuang chho ve ta a, thli chu a bang ta mai a. Tin, mak chu an ti rilru hle a;

⁵²chhang thu chu a ngaihna an hre thiam si lo a, an thinlung a sak si a.

⁵³Tin, ral lehlam an kai chuan Genesaret ram khawmual an thleng a, vaukamah chuan lawng chu an thlung a.

⁵⁴Tin, lawng ata an chhuah hnu chuan mitten ani chu an lo hre ta nghal a,

⁵⁵chu mi ram vel zawng zawngah an tlan ta sup sup a, a awm tih an hriatna apiangah damlote an awngphaha mu chungin an zawn vel ta ruai a.Tin, khaw teahte, khaw lianahte, loahte, khawiah pawh a luhna apiangah damlote chu dawr hmunahte an muttir hlawm a, a puan hmawr tal deh theih an dil chiam a; tin, amah dek apiang chu an dam ta zel a.

⁵⁶Tin, khaw teahte, khaw lianahte, loahte, khawiah pawh a luhna apiangah damlote chu dawr hmunahte an muttir hlawm a, a puan hmawr tal deh theih an dil chiam a; tin, amah dek apiang chu an dam ta zel a.