Read Baibul, Mizo Marka 7 Bible Online

Marka 7 - Baibul, Mizo bible

Marka 7

¹Tin, Pharisaite leh lehkhaziaktute zinga mi tute emaw, Jerusalem khua atanga lo kalte chu a hnenah an rawn inkhawm a.

²Chunghote chuan a zirtir thenkhatte kut bawlhhlawha chhang an ei an lo hmu tawh a. ('Bawlhhlawh' tih hi 'sil loh' tihna a ni.).

³(Pharisaite leh Judaho zawng zawng chuan upate thurochhiah chu an pawm tlat avangin an kut ngun taka an sil loh chuan an ei ngai si lo a.

⁴Tin, dawr hmun atanga an hawn pawhin an inbual loh chuan an ei ngai lo. Tin, thu dang tam tak pawm tlat tura an dawn chhawnte chu a awm, no te, bel te, dar bel te sil angte hi.)

⁵Chutichuan Pharisaite leh lehkhaziaktute chuan, "Engati nge i zirtirte upa thurochhiah ang zela awm lo a, kut bawlhhlawhin chhang an ei thin ni?" tiin an zawt a.

⁶Tin, ani chuan an hnenah, "Isaia hian nangni mi vervekte thu hi a lo hril lawk dik zet mai. 'He miteho hian an kain mi chawimawi a, An thinlung erawh chuan mi hlat si a.

⁷Engpawhni se la, an zirtirnaa mihring thupekte an zirtir avangin an mi biak thin hi a thlawn mai mai a ni," tih ziak ang hian.

⁸Pathian thupekte chu thlahthlamin mihring thurochhiah chu in vuan tlat a nih hi," a ti a.

⁹Tin, amah vekin an hnenah, "Nangmahni thurochhiahte chu in pawm theihna turin Pathian thupekte in duh lo hi rem in hre zet mai e!

¹⁰Mosia'n, "I nu leh i pa chawimawi rawh,' 'Tupawh a nu emaw, a pa emaw sawichhia apiang chu thi mawlh rawh se,' a ti si a;

¹¹nangni erawh chuan heti hian in ti thin, 'Miin, a nu emaw, a pa emaw hnenah, I mi chhawrna tur hi Korban a ni tawh, a tih chuan,' (chu chu 'Pathian hnena pek,' tihna a ni a)

¹²a nu tan emaw, a pa tan emaw engmah tihsak in phal tawh thin lo;

¹³mi hnena in thurochhiah pek chhawn hianin Pathian thu hi in bawh bo thin a ni; chutiang thil chu tam tak in ti thin," a ti a.

¹⁴Tin, mipuite chu a ko leh a, an hnenah, "In zain ka thu hi ngaithla theuh u la, lo ngai thiam rawh u:

¹⁵mihring pawn lam ata a kawchhunga luta amah tibawlhhlawh thei engmah a awm lo; mihring kawchhung ata lo chhuakte chu mihring tibawlhhlawhtu a ni zawk e," a ti a.

¹⁶Tu pawhin hriatna tura beng an neih chuan hre rawh se

¹⁷Tin, mipuihote chu ina a luhsan hnuin, azirtirte chuan tehkhin thu chu amah an zawt fiah ta a.

¹⁸Tin, ani chuan an hnenah, "Nangni pawh chuti ema hriatna nei lo in ni maw?

¹⁹Engpawh pawn lam ata mihring kawchhunga lut apiang, a thinlung chhunga lut loin, a pum chhunga luta dailenaa a chhuah zawk avangin amah chu a tibawlhhlawh thei lo tih in hre lo'm ni?" a ti a. (Chu chu ei tur tinreng ei a thiang a tihna a ni.)

²⁰Tin, amah vekin, "Mihring kawchhung ata lo chhuak chuan, chu ngei chuan mihring a tibawlhhlawh thin a ni.

²¹Kawchhunga mi, mihring thinlung atangte chuan ngaihtuahna sualte a lo chhuak si thin; inngaihna te, rukrukna te, tualthahna te,

²²uirena te, awhna te, sualna te, bumna te, hurna te, itsikna te, sawichiatna te, chapona te, atna te hi;

²³chung thil sual zawng zawngte chu kawchhung atangin a lo chhuak a, mihring chu a tibawlhhlawh thin," a ti a.

²⁴Tin, a tho a, chuta tang chuan Tura leh Sidon bialah a kal ta a; tin, inah a lut a, tuma hriat a duh lo a; nimahsela a inthup thei si lo.

²⁵Chutichuan hmeichhe pakhat, fanu naupang te, ramhuai bawlhhlawh pai nei chuan a chanchin a lo hria a, a ke bulah a va bawkkhup ta nghal a.

²⁶Hmeichhia chu Grik mi a ni a, pianna lamah chuan Suro-Phoiniki mi a ni a. Ani chuan a fanu kawchhung ata ramhuai hnawt chhuak turin a ngen a.

²⁷Tin, ani chuan a hnenah, "Fate chu lo puar hmasa rawh se; fate chhang laksaka uite hnena paih chu a mawi lo e," a ti a.

²⁸Ani chuan a hnenah, "Lalpa, nih zawng a ni a, nimahsela dawhkan hnuaia uite pawhin fate chhang nawite chu an ei thin alawm," tiin a chhang a.

²⁹Tin, ani chuan a hnenah, "I thu sawi avang chuan kal tawh le; ramhuai chu i fanu kawchhung ata a chhuak tawh e," a ti a.

³⁰Tin, a inah chuan a va hawng a, a fa chu ramhuai lo chhuahsan tawh a, khuma mu a va hmu ta a.

³¹Tin, Tura ram atangin a chhuak leh a, Sidon khua tlawhin Dekapoli ram kal tlang zelin Galili dil chu a thleng ta a.

³²Tin, mi pakhat bengngawng, tawng pawh tawng fiah thei lo, a hnenah an rawn hruai a, a chunga a kut nghat turin an ngen a.

³³Tin, ani chuan mipui zing ata amah chauh chu a hruai hrang a, a kut zungtangte chuan a beng kuate a khawih a, tin chil a chhak a, a lei a dehsak a;

³⁴tin, van lam enin a thaw huai a, a hnenah, "Ephatha," a ti a. (Chu chu "Lo inhawng rawh," tihna a ni.)

³⁵Tichuan a bengte chu a lo inhawng a, a lei phuarna pawh chu a lo inphelh a, fiah takin a tawng thei ta a.

³⁶Tin, ani chuan an hnenah, tumah hrilh loh tur a ti tlat a; nimahsela khap nasat veleh an tlangaupui zual zawk mah thin a."Ani chuan engkim tha takin a ti a; bengngawngte a tihvarsak a, tawng thei lote pawh a titawng thin," an ti a, mak an ti nasa em em a.

³⁷Ani chuan engkim tha takin a ti a; bengngawngte a tihvarsak a, tawng thei lote pawh a titawng thin," an ti a, mak an ti nasa em em a.