Read Baibul, Mizo Marka 8 Bible Online

Marka 8 - Baibul, Mizo bible

Marka 8

¹Chung niahte chuan mipui tam tak an lo awm leh a, ei tur engmah an neih loh lai chuan ani chuan a zirtirte chu a ko a, an hnenah,

²Mipuiho hi tunah ni thum ka hnenah an awm tawh a, ei tur engmah an neih loh avangin ka khawngaih em em a ni;

³chaw ngheia an ina ka hawntir chuan kawng lakah an chau dawn si a; thenkhatte phei chu an lo kalna a hla hle si a," a ti a.

⁴Tin, a zirtirte chuan, "Miin heta thlalerah hian khawia chhangin nge hengho hi an tihtlai theih ang?" tiin amah an chhang a.

⁵Tin, ani chuan, "Chhangper engzat nge in neih?" tiin anni chu a zawt a. Tin, anni chuan, "Per sarih," an ti a.

⁶Tin, mipuiho chu leia thu turin thu a pe a; tin, chhangper pasarih chu a la a, lawm thu a sawi zawhin a phel a, an hmaa hlui turin a zirtirte hnenah a pe a; tin, mipuihote hmaah chuan an hlui ta a.

⁷Nghate tlem te an nei bawk a; tin, ani chuan mal a sawmsak a, chungte pawh chu an hmaa hlui turin thu a pe a.

⁸Tichuan an ei a, an puar ta hlawm a; an ei bang nawi pawh chu bawm sarih an rut khat a.

⁹Anni chu sangli lai an ni a; tin, ani chuan anni chu a tintir ta a.

¹⁰Tin, ani chu a zirtirte hnenah lawngah chuan a chuang ta nghal a, Dalmanutha ram chu a thleng ta a.

¹¹Tin, Pharisaite an lo chhuak a, amah fiahna'n, a lakah van ata chhinchhiahna zawngin ani chu an hnial ta a.

¹²Tin, ani chu a rilruin nasa takin a rum a, "Engati nge tun lai chhuante hian chhinchhiahna an zawn?Tih tak meuhin ka hrilh a che u, tun lai chhuante hnenah hian chhinchhiahna reng reng pek a ni lo ang," a ti a.

¹³Tin, anni chu a kalsan a, lawngah chuan a chuang leh a, ral lehlamah a kal ta a.

¹⁴Tin, a zirtirte chuan chhang an ken theihnghilh a, chhang tlang khat chauh lo chu lawngah chuan chhang dang reng an nei si lo a.

¹⁵Tin, ani chuan an hnenah, "Pharisaite dawidim leh Heroda dawidim lakah chuan inveng u la, fimkhur rawh u," a ti tlat a.

¹⁶Tin, anni chuan, "Chhang kan nei hauh lo," tiin an inngaihtuah a.

¹⁷Tin, Isua'n chu chu a lo hria a, an hnenah "Engati nge chhang in neih loh avanga in inngaihtuah ni? Tunah pawh in rilruin in la hre lo fo maw? a ngaihna pawh in la hre lo maw? in thinlung chu in tisak ta em ni?

¹⁸Mit nei siin in hmu lo em ni? beng nei siin in hre lo em ni? in hre reng lo vem ni?

¹⁹Sangnga zinga chhangper panga ka phel lai khan a nawi kha bawmrang engzat nge in ruh khah?" a ti a. Tin, anni chuan a hnenah, "Sawm leh pahnih," an ti a.

²⁰Tin, sangli zinga pasarih ka phel lai khan, a nawi kha bawm engzat nge in ruh khah?" a ti a. Tin anni chuan a hnenah, "Bawm sarih," an ti a.

²¹Tin, ani chuan an hnenah, "Tunah pawh a ngaihna in la hre lo fo maw?" a ti a.

²²Tin, Bethsaida khua chu an lo thleng a. Tin, a hnenah mitdel an rawn hruai a, amah dek turin an ngen a.

²³Tin, ani chuan mitdel kut chu a chelh a, khua ata a kai chhuak a; tin, a mitah chil a chhak a, a chunga a kut a nghah zawhin, "Khua i hmu thei em?" tiin a zawt a.

²⁴Tin, a han dak chhuak a, "Mihring ka hmu a, thing kal ang maiin ka hmu si," ti a.

²⁵Tin, a mitah chuan a kut a nghat leh a; tin, ani chuan a en reng a, a lo dam ta mai a, engkim fiah takin a hmu thei ta a.

²⁶Tin, Isua chuan, "Khuaah pawh hian lut suh ang che," tiin a inah a hawntir ta a.

²⁷Tin, Isua leh a zirtirte chu an kal chhuak a, Philipa Kaisari khawperahte chuan an kal a; tin, kal pahin a zirtirte hnenah, "Miten tu nge a ni mi tih?" tiin a zawt a.

²⁸Tin, anni chuan, " 'Baptistu Johana a ni,' an ti chia; mi dangin 'Elija a ni, an ti chia; thenkhat erawh chuan, 'Zawlnei tua emaw a ni,' an ti che," tiin an hrilh a.

²⁹Tin, ani chuan an hnenah, "A nih leh nangni'n tu nge a ni mi tih?" tiin a zawt a, Petera chuan a hnenah "Krista chu i ni," tiin a chhang a.

³⁰Tin, ani chuan a chanchin tumah hrilh loh tur a ti tlat a.

³¹Tin, Mihring Fapa chuan thil tam tam a tuar tur te, upate, puithiam lalte, lehkhaziaktute duh loha a awm tur te, tihhluma a awm tur te, ni thum china a thawhleh tur te chu anmahni a zirtir tan ta a.

³²Chung thu chu chiang takin a sawi a ni a. Tin, Petera chuan ani chu a hruai hrang a, a zilh ta a.

³³Ani erawh chu a lehhawi a, a zirtirte chu a en a, "Setan, ka hnungah kal rawh, Pathian thilte ngaihtuah loin, mihring thilte i ngaihtuah zawk a nih hi," tiin Petera a zilh ta a.

³⁴Tin, mipuiho chu a zirtirte nen a ko a, an hnenah, "Tupawhin mi zui a duh chuan, mahni hrehawm pawisa loin, a kraws puin mi zui rawh se.

³⁵Tupawh a nun humhim duh apiangin a chan ang a; tupawh keimah avang leh Chanchin Tha avanga nun chan apiangin a humhim ang.

³⁶Miin khawvel hi apumin nei se la, a nun chan si se la, a tan eng nge sawt ang?

³⁷Miin a nun aiah eng nge a pek theih ang?Tupawh tun lai chuan uire leh thil tihsual hmangte zinga keimah leh ka thu zahpui apiang, Mihring Fapa hian, vantirhkoh thianghlimte nena a Pa ropuinaa inthuama a lo kal hunah chuan, chu mi chu a rawn zahpui ve thung ang," a ti a.

³⁸Tupawh tun lai chuan uire leh thil tihsual hmangte zinga keimah leh ka thu zahpui apiang, Mihring Fapa hian, vantirhkoh thianghlimte nena a Pa ropuinaa inthuama a lo kal hunah chuan, chu mi chu a rawn zahpui ve thung ang," a ti a.